ມອບ-ຮັບຕຶກບໍລິການສຸຂະພາບແມ່ ແລະ ເດັກໃຫ້ແກ່ 2 ເມືອງໃນແຂວງຫຼວງພະບາງ

ວັນທີ 27 ມິຖຸນາ 2018 ຜ່ານມານີ້,ທີ່ເດີ່ນໂຮງໝໍເມືອງຊຽງເງິນ ໄດ້ມີພິທີມອບ-ຮັບຕຶກບໍລິການສຸຂະພາບແມ່ ແລະ ເດັກ 2 ຫຼັງ ໃຫ້ແກ່ 2 ເມືອງຂອງແຂວງຫຼວງພະບາງ ຄື: ເມືອງຊຽງເງິນ ແລະເມືອງພູຄູນ,ໂດຍການເປັນປະທານຂອງທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ,ມີຜູ້ຕາງໜ້າກະຊວງສາທາລະນະສຸກ,ຜູ້ຕາງໜ້າອົງການຮ່ວມມືສາກົນສາທາລະນະລັດເກົາຫຼີຫຼືອົງການກອຍກາປະຈຳ ສປປ ລາວ, ພ້ອມດ້ວຍພາກສ່ວນກ່ຽວຂ້ອງຈາກແຂວງ-ເມືອງ ເຂົ້າຮ່ວມ.

ໃນພິທີ ທ່ານ ຊັງຊູໂອ ຜູ້ຕາງໜ້າອົງການກອຍກາ ຜູ້ໃຫ້ທຶນຊ່ວຍເຫຼືອ,ໄດ້ມີຄຳເຫັນກ່າວມອບຕຶກບໍລິການສຸຂະພາບແມ່ແລະເດັກຢ່າງເປັນທາງການ,ພ້ອມດຽວກັນນີ້ ທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ,ກໍ່ໄດ້ຕາງໜ້າອົງການປົກຄອງສອງເມືອງ ມີຄຳເຫັນສະແດງຄວາມຂອບໃຈ ແລະ ຮູ້ບຸນຄູນຢ່າງສູງ ຕໍ່ລັດຖະບານສາທາລະນະລັດເກົາຫຼີ ກໍ່ຄືອົງການກອຍກາ,ທີ່ໄດ້ໃຫ້ການຊ່ວຍເຫຼືອທຶນຮອນອັນໃຫຍ່ຫຼວງ ພັດທະນາວຽກງານສາທາລະນະສຸກ ຂອງເມືອງຊຽງເງິນແລະເມືອງພູຄູນ ໃຫ້ມີຄຸນນະພາບດີຂຶ້ນຕື່ມບາດກ້າວໜື່ງ,ເປັນການສ້າງເງື່ອນໄຂເຮັດໃຫ້ຄຳຂັວນທີ່ວ່າ: ລູກເກີດລອດ ແມ່ປອດໄພ ໄດ້ຮັບການຈັດຕັ້ງປະຕິບັດດ້ວຍປະສິດຕິຜົນດີຢ່າງແທ້ຈິງ. ຈາກນັ້ນ ທ່ານ ຊັງຊູໂອ ຕາງໜ້າອົງການກອຍກາ ໄດ້ຂຶ້ນມອບກຸນແຈຕຶກບໍລິການສຸຂະພາບແມ່ ແລະເດັກໃຫ້ແກ່ 2 ເມືອງ,ຊື່ງຕາງໜ້າເມືອງຊຽງເງິນຂຶ້ນຮັບໂດຍທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ ແລະ ຕາງໜ້າເມືອງພູຄູນໂດຍແມ່ນທ່ານ ເພັດສະໝອນ ວົງສີປະເສີດ ຮອງເຈົ້າເມືອງພູຄູນເປັນຜູ້ຂຶ້ນຮັບ. ຕອນທ້າຍພິທີ ຍັງໄດ້ມີການມອບໃບຍ້ອງຍໍໃຫ້ຜູ້ຕາງໜ້າອົງການກອຍກາ ແລະ ມອບໃບຂອບໃຈໃຫ້ແກ່ບຸກຄົນທີ່ມີຜົນງານ,ພ້ອມທັງໄດ້ຮ່ວມກັນເປີດປ້າຍນຳໃຊ້ຕຶກບໍລິການສຸຂະພາບແມ່ແລະເດັກຢ່າງເປັນທາງການ.

ສຳລັບຕຶກບໍລິການສຸຂະພາບແມ່ແລະເດັກເມືອງຊຽງເງິນ ເປັນອາຄານຖາວອນຊັ້ນດຽວ,ຂະໜາດກວ້າງ 11 ແມັດ ຍາວ 17 ແມັດ,ມີ 7 ຫ້ອງເຮັດວຽກ-ຫ້ອງນ້ຳ 3 ຫ້ອງ ແລະ ຫ້ອງເກັບມ້ຽນເຄື່ອງ 1 ຫ້ອງ,ປະກອບເຄື່ອງປັບອາກາດ ເຄື່ອງເຟີນີເຈີ ແລະ ອຸປະກອນການແພດຄົບຊຸດ, ໄດ້ເລີ່ມກໍ່ສ້າງແຕ່ເດືອນພຶດສະພາ 2017 ແລະ ສຳເລັດໃນເດືອນພຶດສະພາ 2018,ໂດຍແມ່ນບໍລິສັດວິໄລວອນກໍ່ສ້າງເຄຫາສະຖານ (ກຳແພງນະຄອນວຽງຈັນ) ປັນຜູ້ຮັບເໝົາກໍ່ສ້າງ ໃນມູນຄ່າ 77.387,21 ໂດລາສະຫະລັດ ຫຼື ເທົ່າກັບ 619.097.680ກີບ.

ຂ່າວ: ເຫຼັກໄຊ ຄົດໄຊໂຍ