ຄະນະຜູ້ແທນ ພັກປະຊາຊົນປະຕິວັດລາວ ແລະ ພັກກອມ ມູນິດຈີນ ຮ່ວມສຳມະນາທິດສະດີ ຄັ້ງທີ 7

0
373

ໃນ​ວັນ​ທີ 2 ກໍລະກົດ ທີ່​ນະຄອນຫລວງ​ວຽງ​ຈັນ,  ​ໄດ້​ຈັດ​ພິທີ​ເປີດ​ກອງ​ປະຊຸມ​ສຳ​ມະ​ນາ​ທິດ​ສະ​ດີ  ລະຫວ່າງ ພັກ​ປະຊາຊົນ​ປະຕິວັດ​ລາວ ​ແລະ ພັກ​ກອມ​ມູນິດ​ຈີນ ຄັ້ງ​ທີ 7  ພາຍ​ໃຕ້​ຫົວ​ຂໍ້ “ພຶດຕິ​ກຳ ​ແລະ ບົດຮຽນ  ​ແຫ່ງ​ການ​ດຳ​ເນີນ​ການ​ປ່ຽນ​ແປງ​ໃໝ່​ຮອບດ້ານ  ມີ​ຫລັກການ​ຢູ່ ສປປ ລາວ ​ແລະ ການ​ປະຕິ​ຮູບ,  ​ເປີດ​ປະຕູ​ສູ່​ໂລກ​ພາຍ​ນອກ ຢູ່ ສປ ຈີນ​”,  ​ໂດຍ​ມີ​ຄະນະ​ຜູ້​ແທນ​ຂັ້ນ​ສູງ​ ຂອງ​ພັກ​ປະຊາຊົນ​ປະຕິ ວັດ​ລາວ ນຳ​ໂດຍສະຫາຍ ທຸນທອງ ຈິດ​ມະນີ   ກຳມະການ​ກົມ​ການ​ເມືອງ​ສູນ​ກາງ​ພັກ, ຄະນະ​ເລຂາທິການ​ສູນ​ກາງ​ພັກ,  ປະທານ​ຄະນະ​ກວດກາ​ສູນ​ກາງ​ພັກ,  ຮອງ​ນາຍົກລັດຖະມົນຕີ, ສະຫາຍ ກິ​ແກ້ວ ​ໄຂ​ຄຳ​ພິທູນ  ຄະນະ​ເລຂາທິການ​ສູນ​ກາງ​ພັກ,  ຫົວໜ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ  ​ແລະ ຄະນະ​ຜູ້​ແທນ​ຂັ້ນ​ສູງ​ພັກ​ກອມ​ມູນິດ​ຈີນ,  ນຳ​ໂດຍ ສະຫາຍ ຮວງ ຄຸນ​ມິ​ງ ກຳມະການ​ກົມ​ການ​ເມືອງ​ສູນ​ກາງ​ພັກ,  ​ເລຂາທິການ​ສູນ​ກາງ​ພັກ,  ຫົວໜ້າ​ຄະນະ​ໂຄສະນາ​ສູນ​ກາງ​ພັກ​ກອມ​ມູນິດ​ຈີນ,  ສະຫາຍ ຫວັງ ​ເວີນ​ທຽນ ​ເອກ​ອັກຄະ​ລັດຖະທູດ​ຈີ​ນ ປະຈຳ ສປປ ລາວ,  ພ້ອມ​ດ້ວຍ​ຄະນະ​ຜູ້​ແທນ ພັກ​ປະຊາຊົນ​ປະຕິວັດ​ລາວ  ​ແລະ ພັກ​ກອມ​ມູນິດ​ຈີນ  ​ແລະ ບັນດາ​ລັດຖະມົນຕີ, ຮອງ​ລັດຖະມົນຕີ,  ນັກ​ຄົ້ນຄວ້າ​ທິດ​ສະ​ດີ, ນັກວິທະຍາສາດ-ສັງຄົມ ລາວ-ຈີນ ​ເຂົ້າ​ຮ່ວມ.

ກອງ​ປະຊຸມ​ສຳ​ມະ​ນາ​ທິດ​ສະ​ດີ  ສອງ​ພັກ​ລາວ-ຈີນ ຄັ້ງ​ທີ 7 ​ໄດ້​ຈັດ​ຕັ້ງ​ຂຶ້ນ  ​ໃນ​ຂະນະ​ທີ່​ສອງ​ພັກ, ສອງລັດ  ​ແລະ ປະຊາຊົນ​ສອງ​ຊາດ ລາວ-ຈີນ  ພວມ​ອອກ​ແຮງ​ແຂ່ງຂັນ​ຈັດ​ຕັ້ງຜັນຂະຫຍາຍ  ມະຕິ​ກອງ​ປະຊຸມ​ໃຫຍ່ ຄັ້ງ​ທີ XIX  ຂອງ​ພັກ​ກອມ​ມູນິດ​ຈີນ ​ແລະ ກອງ​ປະຊຸມ​ໃຫຍ່​ຄັ້ງ​ທີ X  ຂອງ​ພັກ​ປະຊາຊົນ​ປະຕິວັດ​ລາວ. ພິ​ເສດ​ ກອງ​ປະຊຸມ​ໃນ​ຄັ້ງ​ນີ້,  ກົງ​ກັບ​ການສະ​ເຫລີ​ມສະຫລອງ ວັນ​ສ້າງ​ຕັ້ງ​ພັກ​ກອມ​ມູນິດ​ຈີນ ທີ່​ມີ​ກຽດ​ສະຫງ່າ ຄົບຮອບ 97 ປີ  (ວັນ​ທີ 1/7/1921-1/7/2018)  ​ແລະ ວັນ​ສ້າງ​ຕັ້ງ​ພັກ​ປະຊາຊົນ​ປະຕິ ວັດ​ລາວ ຄົບຮອບ 63 ປີ  (ວັນ​ທີ 22/3/1955 -22/3/2018).

​ໃນ​ໂອກາດ​ດັ່ງກ່າວ,​ ​ໄດ້​ຮັບ​ຟັງ​ບົດ​ຄຳ​ເຫັນ​ຈາກ  ສະຫາຍ ບຸນ​ທອງ ຈິດ​ມະນີ ພາຍ​ໃຕໍ້​ຫົວ​ຂໍ້ “ພັກ​ປະຊາຊົນ​ປະຕິວັດ​ລາວ  ລິ​ເລີ່​ມ ​ແລະ ນຳພາ​ການ​ປ່ຽນ​ແປງ​ໃໝ່​ຮອບດ້ານ  ທີ່​ມີ​ຫລັກການ​ຢູ່ ສປປ ລາວ” ​ແລະ ຮັບ​ຟັງ​ບົດ​ຄຳ​ເຫັນ​  ຈາກ ສະຫາຍ ຮວງ ຄຸນ​ມິ​ງ ​ໃນ​ຫົວ​ຂໍ້ “ການ​ຊອກ​ຄົ້ນ​ດ້ານ​ພຶດຕິ​ກຳ  ​ແລະ ບົດຮຽນ​ສຳຄັນ​ຂອງ​ການ​ປະຕິ​ຮູບ ​ແລະ ​ເປີດ​ປະຕູ​ສູ່​ພາຍ​ນອກ​ຂອງ​ປະ​ເທດ​ຈີນ”.  ພ້ອມ​ນີ້, ​ໃນ​ວາລະ​ການ​ສຳ​ມະ​ນາ ​ ຍັງ​ຈະ​ໄດ້​ຮັບ​ຟັງ​ການ​ນຳ​ສະ​ເໜີ​ຫົວ​ຂໍ້​ຕ່າງ​ໆ  ຂອງ​ຄະນະ​ຜູ້​ແທນ​ລາວ-ຈີນ  ທີ່​ປີ່ນ​ອ້ອມ​ຫົວ​ຂໍ້​ຫລັກ​ຂອງ​ກອງ​ປະຊຸມ   ມີ​ທັງ​ໝົດ 13 ຫົວຂໍ້,  ​ໃນ​ນັ້ນ​ຄະນະ​ຜູ້​ແທນ​ລາວ​ ສະ​ເໜີ 7  ຫົວ​ຂໍ້ ​ເຊັ່ນ:  ພັກ​ກຳນົດ​ເສັ້ນທາງ​ກ້າວ ​ຂຶ້ນ​ສັງຄົມ​ນິຍົມ​ຢູ່​ປະ​ເທດ​ເຮົາ;  ສ້າງ​ສັງຄົມ​ສາມັກຄີ​ປອງ​ດອງ, ປະຊາ​ທິປະ​ໄຕ,  ຍຸຕິ​ທຳ ​ແລະ ສີວິ​ໄລ;  ​ເປີດ​ກວ້າງ​ການ​ພົວພັນ​ຮ່ວມ​ມື​ກັບ​ຕ່າງ ປະ​ເທດ; ພັດທະນາ​ເສດຖະກິດ​ຕະຫລາດ ​ຕາມ​ທິດ​ສັງຄົມ​ນິຍົມ​ຢູ່ລາວ; ​ເດັດດ່ຽວ​ປົກ​ປັກ​ຮັກສາ​ ໝາກຜົນ​ຂອງ​ການ​ປະຕິວັດ ​ແລະ ປະ​ເທດ​ຊາດ;  ສ້າງ​ລັດ​ປະຊາທິປະ​ໄຕ ປະຊາຊົນ ​ທີ່​ປົກຄອງ​ດ້ວຍ​ກົດໝາຍ  ​ແລະ ຍົກ​ສູງ​ຄວາມ​ສາມາດ​ ກຳ​ອຳນາດ​ຂອງ​ພັກ​ປະ ຊາຊົນ​ປະຕິວັດ  ​ໃນ​ເງື່ອນ​ໄຂ​ພັກ​ດຽວ​ກຳ​ອຳນາດ.  ພ້ອມ​ນີ້, ຄະນະ​ຜູ້​ແທນ​ຈີນ ສະ​ເໜີ 6 ຫົວ​ຂໍ້ ​ເຊັ່ນ:  ການ​ປະຕິ​ຮູບ ​ແລະ ​ເປີດ​ປະຕູ​ສູ່​ພາຍ​ນອກ  ​ແມ່ນ​ການ​ປະຕິວັດ​ຄັ້ງ​ທີ​ສອງ​ຂອງ​ປະ​ເທດ​ຈີນ;  ບົດຮຽນ​ອັນ​ລ້ຳ​ຄ່າ​ຂອງ​ການ​ປະຕິ​ຮູບ  ​ແລະ ​ເປີດ​ປະຕູ​ສູ່​ພາຍ​ນອກ​ຂອງ​ປະ​ເທດ​ຈີນ;   ຜົນສຳ​ເລັດ​ທີ່​ເປັນ​ລັກສະນະ​ປະຫວັດສາດ  ​ແລະ ການ​ປ່ຽນ​ແປງ​ຄັ້ງ​ປະຫວັດສາດ  ​ໃນ​ພາລະກິດ​ຂອງ​ພັກ ​ແລະ ຂອງ​ຊາດ  ນັບ​ແຕ່​ກອງ​ປະຊຸມ​​ໃຫຍ່​ຄັ້ງ​ທີ 18 ຂອງ​ພັກ​ກອມ​ມູນິດ​ຈີນ  ​​ເປັນ​ຕົ້ນ​ມາ; ສັງຄົມ​ນິຍົມ​ທີ່​ມີ​ສີສັນ​ພິ​ເສດ​ຂອງ​ຈີນ  ​ແມ່ນ​ຫົວ​ຂໍ້​ຫລັກ​ທັງ​ໝົດ​ຕະຫລອດ​ໄລຍະ  40 ປີ ​ແຫ່ງ​ການ​ປະຕິ​ຮູບ  ​ແລະ ​ເປີດ​ປະຕູ​ສູ່​ພາຍ​ນອກ;  ກໍ່ສ້າງ ​ແລະ ບູລະນະດ້ານ​ພຶດຕິ​ກຳ​ ຂອງ​ການ​ຊອກ​ຄົ້ນ ​ແລະ ຄວາມ​ຮັບ​ຮູ້​  ທີ່​ເປັນ​ກົດ​​ເກນ​ຂອງ​ ລະບອບ​ເສດຖະກິດ​ຕະຫລາດ ​ຂອງ​ສັງຄົມ​ນິຍົມ; ​ເອົາ​ການ​ເປີດ​ກວ້າງ​ມາ​ຊຸກຍູ້​ການ​ປະຕິ​ຮູບ,  ຊຸກຍູ້​ການ​ສ້າງ​ປະຊາ​ຄົມ​ຮ່ວມ​ຊາຕາ​ກຳ ​ຂອງ​ມວນ​ມະນຸ​ດ.

​​ກອງ​ປະຊຸມ ຄະນະ​ຜູ້​ແທນ​ສອງ​ຝ່າຍ  ​ໄດ້​ຄົ້ນ​ຄວ້າ​ແລກປ່ຽນ​ຄຳ​ຄິດ​ເຫັນ  ຮ່ວມ​ກັນ​ຫລາ​ຍບັນຫາ​ທີ່​ສຳຄັນ​ຢ່າງ​ກົງ​ໄປ​ກົງ​ມາ,  ​ເປີດ​ອົກ​ເປີດ​ໃຈ ​ແລະ ພາວະ​ວິ​ໄສ  ລົງ​ເລິກ​ບັນຫາ​ທີ່​ທັງ​ສອງ​ຝ່າຍ​ ມີ​ຄວາມ​ສົນ​ໃຈ​ກ່ຽວ​ກັບ​ການ​ປ່ຽນ​ແປງ​ໃໝ່​ຢູ່  ສປປ ລາວ ​ແລະ ການ​ປະຕິ​ຮູບ​ເປີດ​ປະຕູ​ ສູ່​ໂລກ​ພາຍ​ນອກ ຢູ່ ສປ ຈີນ,  ອັນ​ໄດ້​ເປັນ​ການ​ປະກອບສ່ວນ​ ກ່ຽວ​ກັບ​ດ້ານ​ສະຕິ​ປັນຍາ,  ທິດ​ສະ​ດີ​ວິທະຍາສາດ ​ແລະ ພຶດຕິ​ກຳ  ​ແຫ່ງ​ການ​ນຳພາ​ຂອງ​ພັກ​ທັງ​ສອງ,  ​ເຮັດ​ໃຫ້​ກອງ​ປະຊຸມ​ໃຫ້​ຄັ້ງ​ນີ້​  ກາຍ​ເປັນ​ເວທີ​ແລກປ່ຽນົບ​ດຮຽນ ​ທີ່​ສຳຄັນ, ​ເພີ່ມ​ທະວີ​ຄວາມ​ເຂົ້າ​ອົກ​ເຂົ້າ​ໃຈ  ​ແລະ ​ເພີ່ມ​ທະວີ​ໄມຕີ​ຈິດ​ມິດຕະພາບ​  ທີ່​ເປັນ​ມູນ​ເຊື້ອ​ຮ່ວມ​ຊາຕາກຳ​ສັງຄົ​ມນິຍົມ ລະຫວ່າງ​ສອງ​ພັກ ​ລາວ-ຈີນ.

ພາບ ແລະ ຂ່າວ: ສົມ​ຫວັງ ພາບ: ​ເກດສະໜາ