ຂົວຂ້າມນໍ້າຂອງ ປາກຊັນ-ບຶງການ ຄາດວ່າຕົ້ນປີ 2019 ຈະເລີ່ມກໍ່ສ້າງ

0
186

ຂົວມິດຕະພາບ ລາວ-ໄທ ແຫ່ງທີ 5 ທີ່ມີແຄນເປັນສັນຍະລັກເສົາກາງນໍ້າ ຄາດຈະລົງມືກໍ່ສ້າງຕົ້ນປີ 2019.

ແຜນສ້າງຂົວມິດຕະພາບ ລາວ-ໄທ ແຫ່ງທີ 5 ລະຫວ່າງ ປາກຊັນ-ບຶງການ ແນໃສ່ອຳນວຍຄວາມສະດວກ ເຊື່ອມໂຍງໃນການຄົມມະນາຄົມຂົນສົ່ງດ ຊຸກຍູ້ການຄ້າ ແລະ ການລົງທຶນ ທີ່ລັດຖະບານທັງສອງຝ່າຍຕົກລົງ ໃກ້ຄວາມເປັນຈິງ ເຊິ່ງນັບຖອຍຫຼັງອີກ 8 ເດືອນ ຫາກບໍ່ມີການຄາດເຄື່ອນ ກໍ່ຄືເດືອນມີນາ 2019 ໄດ້ເລີ່ມລົງມືກໍ່ສ້າງ. ຂົວດັ່ງກ່າວນີ້ມີມູນຄ່າກໍ່ສ້າງທັງໝົດ 3.930 ລ້ານບາດ ປັດຈຸບັນທາງລັດຖະບານ ແລະ ຄະນະຮັບຜິດຊອບທັງສອງຝ່າຍ ໄດ້ຕົກລົງເປັນເອກະພາບກັັນ ເອົາຮູບແຄນເປັນສັນຍາລັກຮູບຊົງເສົາກາງນ້ຳ.

ຜູ້ປະສານງານໂຄງການກໍ່ສ້າງຂົວມິດຕະພາບແຫ່ງທີ 5 ກະຊວງໂຍທາທິການ ແລະ ຂົນສົ່ງ ໃຫ້ຮູ້ວ່າ: ຜ່ານການປະຊຸມຄັ້ງຫລ້າສຸດໃນວັນທີ 6 ເດືອນມິຖຸນາ 2018 ຜ່ານມາ ຢູ່ທີ່ຈັງຫວັດໜອງຄາຍ ປະເທດໄທ ເຊິ່ງ ຄະນະທັງ 2 ຝ່າຍຕົກລົງເອົາຮູບຊົງແຄນເປັນສັນຍາລັກເສົາກາງນ້ຳ (ເມື່ອກ່ອນແມ່ນເອກະພາບກັນເອົາຮູບດອກຈັນເປັນສັນຍາລັກ) ຂອງຂົວມິດຕະພາບແຫ່ງທີ 5 ແລະ ຂົວດັ່ງກ່າວແມ່ນມູນຄ່າການກໍ່ສ້າງ ທັງໝົດ 3.930 ລ້ານບາດຫລື ປະມານ1ພັນຕື້ກວ່າກີບ, ໃນນັ້ນ: ວຽກທາງເຊື່ອມຕໍ່ເບື້ອງໄທ 1.340 ລ້ານບາດ, ອາຄານດ່ານ 610 ລ້ານບາດ, ກໍ່ສ້າຂົວ 680 ລ້ານບາດ ລວມເປັນ 2.630 ລ້ານບາດ ປະມານ 680ຕື້ກີບ.

ສ່ວນເບື້ອງລາວ ມູນຄ່າການກໍ່ສ້າງທາງເຊື່ອມຕໍ່ 370 ລ້ານບາດ, ອາຄານດ່ານ 440 ລ້ານບາດ, ມູນຄ່າກໍ່ສ້າງຂົວ 490 ລ້ານບາດ ລວມທັງໝົດ 1.300 ລ້ານບາດ 340ຕື້ກີບ . ຫາກທຸກຢ່າງເປັນປະຕາມແຜນທີ່ກຳນົດໄວ້ ນັບຖອຍຫຼັງອີກ 8 ເດືອນ ແມ່ນຈະໄດ້ເລີ່ມລົງມືກໍ່ສ້າງ (ຈະກໍ່ສ້າງໃນເດືອນມີນາ 2019).

ຜູ້ປະສານງານໂຄງການກໍ່ສ້າງຂົວມິດຕະພາບແຫ່ງທີ 5 ຍັງໃຫ້ຮູ້ຕື່ມວ່າ: ສຳລັບຮູບຊົງສັນຍາລັກໜ້າອາຄານດ່ານຜ່ານການຄົ້ນຄວ້າ ໂດຍການປະສານສົມທົບກັບອຳນາດການປົກຄອງແຂວງ ບໍລິຄຳໄຊ ແລະ ຄະນະຄົ້ນຄວ້າ ຈຶ່ງໄດ້ຕົກລົງເປັນເອກະພາບກັນ ເລືອກເອົາ ສັນຍາລັກ ເປັນໂຕເສົາລາ 3 ໂຕ (ໂຕຜູ້, ໂຕແມ່ ແລະ ລູກ) ຢູ່ເທິງແທ່ນ ຫຼື ເດີ່ນຫຍ້າ ຕໍ່ໜ້າອາຄານດ່ານ. ເນື່ອງຈາກວ່າ: ໂຕເສົາລາ ເປັນສັດທີ່ຫາຍາກ ແລະ ມີຖິ່ນອາໄສ ຊຶ່ງພົບເຫັນຢູ່ແຂວງບໍລິຄຳໄຊ ເທົ່ານັ້ນ ໃນ ສປປ ລາວ ແລະ ສ່ວນຮູບຊົງສັນຍາລັກປະຕູເມືອງ ແມ່ນກຳນົດເອົາຈອມທາດພະບາດໂພນສັນມາໃສ່ເປັນສັນຍະລັກ.

ທ່ານ ທອງລິດ ຟອງສີນວນ ຮອງຫົວໜ້າພະແນກໂຍທາທິການ ແລະ ຂົນສົ່ງ ແຂວງບໍລິຄຳໄຊ ເຄີຍໃຫ້ສຳພາດ ວ່າ: ໂຄງການກໍ່ສ້າງຂົວມິດຕະພາບລາວ-ໄທ ແຫ່ງທີ 5 ປາກຊັນ-ບຶງການ ແມ່ນໄດ້ສຳເລັດການອອກແບບແລ້ວ. ເຊິ່ງຜ່ານການເກັບກຳ, ສຳຫຼວດ ເນື້ອທີ່ດິນທີ່ໄດ້ຮັບຜົນກະທົບຢູ່ບໍລິເວນສົ້ນຂົວໃນເບື້ອງຕົ້ນສະເພາະແລວທາງ, ແລວຂົວ ແລະ ບໍລິເວນອາຄານດ່ານ ມີປະມານ 78 ເຮັກຕາ. ປັດຈຸບັນທາງຄະນະຮັບຜິດຊອບກຽມທາບທາມລາຄາຫົວໜ່ວຍການຊົດເຊີຍເບື້ອງຕົ້ນໃຫ້ປະຊາຊົນ ເບື້ອງສອງຝາກທາງທີ່ເປັນເຂດຈະກໍ່ສ້າງສາງ ແລະ ອາຄານຕ່າງໆທີ່ເປັນການລົງທຶນຂອງບໍລິສັດເອກະຊົນຕື່ມອີກຈຳນວນ 109 ເຮັກຕາ ເພື່ອມາຄິດໄລ່ລາຄາຫົວໜ່ວຍຊົດເຊີຍແຕ່ລະປະເພດ.

ຈຸດທີ່ຕັ້ງຂອງຂົວຂ້າມນ້ຳຂອງມິດຕະພາບ ລາວ-ໄທ ແຫ່ງທີ 5 ປາກຊັນ-ບຶງການ, ແມ່ນຕັ້ງຢູ່ເຂດບ້ານກ້ວຍອຸດົມ ຫ່າງ ຈາກເທດສະບານແຂວງບໍລິຄຳໄຊ ມາທາງທິດເໜືອຕາມທາງເລກ 13 ໃຕ້ປະມານ 10 ກິໂລແມັດ ແລະ ຈາກທາງເລກ 13 ໃຕ້ ເຂົ້າໄປຫານ້ຳຂອງ ປະມານ 2,5 ກິໂລແມັດ.

ທີ່ມາ: ນສພ ເສດຖະກິດ-ການຄ້າ.