ສູນກາງ ຊປລ ເປີດຫ້ອງວາງສະແດງມູນເຊື້ອຂອງ ຄຊປປລ

 

ໃນວັນທີ 5 ກໍລະກົດ 2018 ນີ້, ຢູ່ທີ່ສູນກາງ ຊປລ ໄດ້ຈັດພິທີເປີດຫ້ອງວາງສະແດງມູນເຊື້ອ ຄຊປປລ ຂຶ້ນ ໂດຍການເປັນກຽດເຂົ້າຮ່ວມຂອງທ່ານ ປະລິນຍາເອກ ໄຊສົມພອນ ພົມວິຫານ ກໍາມະການກົມການເມືອງ ສູນກາງພັກ ປະທານສູນກາງແນວລາວສ້າງຊາດ ທ່ານ ອາລຸນໄຊ ສູນນະລາດ ກໍາມະການສໍາຮອງສູນກາງພັກ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ມີບັນດາຄະນະພັກ ຄະນະເລຂາທິການ ຫົວໜ້າກົມ ບັນດາຄະນະບໍລິຫານງານຊາວໜຸ່ມກະຊວງ ແລະ ແຂກທີ່ຖືກເຊີນເຂົ້າຮ່ວມຢ່າງພ້ອມພຽງ.

ຫ້ອງວາງສະແດງມູນເຊື້ອຂອງຄະນະຊາວໜຸ່ມປະຊາຊົນປະຕິວັດລາວ ກໍແມ່ນອີກໜຶ່ງກິດຈະກໍາທີ່ ສູນກາງ ຊປລ ໄດ້ກໍານົດເຂົ້າໃນແຜນການ-ການເຄື່ອນໄຫວ ເພື່ອສະເຫຼີມສະຫຼອງວັນສ້າງຕັ້ງ ຄຊປປລ ຄົບຮອບ 63 ປີ (14 ເມສາ 1955-14 ເມສາ 2018). ຈຸດປະສົງແນ່ໃສ່ເປັນບ່ອນຮຽນຮູ້ ແລະ ສຶກສາຄົ້ນຄວ້າປະຫວັດສາດຂອງຊາວໜຸ່ມລາວບັນດາເຜົ່າ ເພື່ອເຮັດໃຫ້ຊາວໜຸ່ມ-ເຍົາວະຊົນ ແລະ ອະນຸຊົນ ໄດ້ຮັບຮູ້ ແລະ ເຂົ້າໃຈແຈ້ງເຖິງປະຫວັດສາດ ແລະ ມູນເຊື້ອການເຄື່ອນໄຫວສູ້ຢ່າງພິລະອາດຫານຂອງຊາວໜຸ່ມລາວບັນດາເຜົ່າໃນເມື່ອກ່ອນທີ່ໄດ້ເຮັດບົດບາດປະຈັນບານຕິດພັນກັບການເຕີບໃຫຍ່ຂະຫຍາຍຕົວຂອງພັກປະຊາຊົນປະຕິວັດລາວ ໂດຍສະເພາະແມ່ນການປະກອບສ່ວນ ແລະ ເສຍສະຫຼະເລືອດເນື້ອເພື່ອປົດປ່ອຍປະເທດຊາດອອກຈາກແອກປົກຄອງຂອງຈັກກະພັດຕ່າງດາວໃນແຕ່ລະຍຸກແຕ່ລະສະໄໝຈົນສາມາດຍາດໄດ້ຄວາມເປັນເອກະລາດແຫ່ງຊາດ ແລະ ຜື້ນແຜ່ນດິນອັນຄົບຖ້ວນ ແລະ ສະຖາປານາເປັນປະເທດສາທາລະນະລັດປະຊາທິປະໄຕປະຊາຊົນລາວ. ນອກຈາກນີ້ຊາວໜຸ່ມຍັງເປັນກ້ອນກໍາລັງອັນມະຫາສານໃນການປະກອບສ່ວນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.

ຂ່າວ: ຄໍາສິງ ວິໄລຄໍາ