ສາທາລະນະສຸກເມືອງ ທ່າແຕງ ຫາລືວາງແຜນຄວບຄຸມ ແລະ ໂຕ້ຕອບພະຍາດໄຂ້ຍຸງລາຍປີ 2018

0
89

ຕອນເຊົ້າຂອງວັນທີ 4 ກໍລະກົດ 2018 ສາທາລະນະສຸກເມືອງ ທ່າແຕງ ແຂວງ ເຊກອງ ຈັດກອງປະຊຸມປຶກສາຫາລື ແລະ ວາງແຜນຮ່ວມກັນໃນການຈັດຕັ້ງປະຕິບັດຄວບຄຸມ ແລະ ໂຕ້ຕອບພະຍາດໄຂ້ຍຸງລາຍປີ 2018 ທີ່ສະໂມສອນຂອງເມືອງ,ໂດຍໃຫ້ກຽດເປັນປະທານຂອງທ່ານ ຖາວອນ ພົມມະໄລລຸນ ຮອງເຈົ້າແຂວງ ເຊກອງ,ມີທ່ານ ຄໍາສອນ ກອນເຍີ ເຈົ້າເມືອງ-ເມືອງ ທ່າແຕງ,ທ່ານ ວິສັນ ອິນທະວົງ ຫົວໜ້າພະແນກສາທາລະນະສຸກແຂວງ,ຄະນະກໍາມະການສະເພາະກິດຕ້ານ ແລະ ຄວບຄຸມພະຍາດຂັ້ນແຂວງ,ຂັ້ນເມືອງ,ຫົວໜ້າ-ຮອງຫ້ອງການອ້ອມຂ້າງ,ຫົວໜ້າ-ຮອງສຸກສາລາ,ເຂດຈຸດສຸ່ມພັດທະນາ,ພະນັກງານວິຊາການ ພ້ອມດ້ວຍອົງການປົກຄອງ 47 ໝູ່ບ້ານພາຍໃນເມືອງ ທ່າແຕງເຂົ້າຮ່ວມ.


ທ່ານ ສີສັກດາ ແສງນາລີວົງ ຫົວໜ້າຫ້ອງການສາທາລະນະສຸກເມືອງ ທ່າແຕງກ່າວວ່າ ຈຸດປະສົ່ງກອງປະ
ຊຸມ ເພື່ອປຶກສາຫາລື ແລະ ວາງແຜນຮ່ວມກັນໃນການຈັດຕັ້ງປະຕິບັດກະກຽມການຕ້ານ,ຄວບຄຸມ ແລະ ສະກັດກັ້ນການລະບາດພະຍາດໄຂ້ຍູງລາຍປີ 2018 ໂດຍອີງຕາມຄໍາສັ່ງຂອງນາຍົກລັດຖະມົນຕີ,ເລກທີ 08/ນຍ,ລັງວັນທີ: 19 ພຶດສະພາ 2017,ຄຳສັ່ງແນະນໍາຂອງລັດຖະມົນຕີກະຊວງສາທາລະນະສຸກ,ເລກທີ: 03566/ກສທ,ລົງວັນທີ 5 ເມສາ 2018,ແຈ້ງການຂອງພະແນກກ່ຽວຂ້ອງ,ຄໍາສັ່ງແນະນໍາຂອງທ່ານເຈົ້າເມືອງ ທ່າແຕງ ວ່າດ້ວຍການປ້ອງ
ກັນ ແລະ ສະກັດກັ້ນ ເພື່ອບໍ່ໃຫ້ພະຍາດລະບາດຕາມລະດູການເປັນຕົ້ນ: ພະຍາດໄຂ້ຍູງລາຍ,ພະຍາດຖອກທ້ອງ,ພະຍາດໄຂ້ຫວັດ ແລະ ພະຍາດອື່ນໆເກີດຂື້ນ. ເຊິ່ງໄລຍະຜ່ານມາທົ່ວແຂວງ ເຊກອງ ຕົວເລກໄຂ້ຍຸງລາຍມີ 249 ກໍລະນີ( ໃນອາທິດທີ 1-27 ຂອງວັນທີ 29 ມິຖຸນາ 2018 ),ໃນນີ້ ເມືອງ ທ່າແຕງມີ 15 ກໍລະນີ,ແຕ່ບໍ່ມີກໍລະນີເສຍຊີວິດໃນ 6 ເດືອນຕົ້ນປີ 2018 ນີ້,ສ່ວນປີ 2017 ແມ່ນບໍ່ມີກໍລະນີໃດເກີດຂື້ນ,ສະນັ້ນ ບັນດາຜູ້ເຂົ້າຮ່ວມໄດ້ພ້ອມກັນປະກອບຄໍາຄິດເຫັນ ແລະ ວາງແຜນຮ່ວມກັນຄວບຄຸມ ແລະ ສະກັດກັ້ນພະຍາດດັ່ງກ່າວຢ່າງຮອບດ້ານ ເພື່ອບໍ່ໃຫ້ເກີດຂື້ນໃນຕໍ່ໜ້າ ໂດຍເລີ່ມປະຕິບັດທໍາລາຍແຫຼ່ງເພາະພັນຂອງຍຸງລາຍຢູ່ 3 ບ້ານເທດສະບານ ແລະ ຂະ
ຫຍາຍອອກໄປໃນທຸກບ້ານພາຍໃນເມືອງຢ່າງເປັນຂະບວນ.


ໂອກາດນີ້ ທ່ານ ຖາວອນ ພົມມະໄລລຸນ ຮອງເຈົ້າແຂວງ ເຊກອງ ໃຫ້ກຽດໂອ້ລົມກ່ອນອື່ນທ່ານໄດ້ສະແດງຍ້ອງຍໍຊົມເຊີຍ ພ້ອມຮຽກຮ້ອງໃຫ້ທຸກພາກສ່ວນເພີ່ມທະວີການເຝົ້າລະວັງ ແລະ ຕອບໂຕ້ກັບພະຍາດດັ່ງກ່າວຢ່າງແຂງແຮງ,ຖ້າຫາກມີລັກຊະນະເກີດຂື້ນແບບເປັນກຸ່ມ ພ້ອມກັນເປັນຈຳນວນຫຼາຍຄົນ,ໃຫ້ອຳນາດການປົກຄອງທ້ອງຖິ່ນລາຍງານໃຫ້ພາກສ່ວນກ່ຽວຂ້ອງ ຂອງສາທາລະນະສຸກຊາບໂດຍດ່ວນ ເພື່ອສາມາດຕ້ອບໂຕ້ໄດ້ທັນເວລາ, ພ້ອມກັນນັ້ນກໍ່ໃຫ້ປະຊາຊົນເອົາໃຈໃສ່ທຳລາຍແຫຼ່ງເພາະພັນຂອງຍຸງລາຍໃຫ້ມີປະສິດທິຜົນດ້ວຍການປະຕິບັດຕາມຫຼັກການ 5 ປໍ ທີ່ກະຊວງສາທາລະນະສຸກວາງອອກຢ່າງເຂັ້ມງວດຄື: 1 ປິດຝາພາຊະນະທີ່ມີນໍ້າພາຍໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂໃສ່,2 ປ່ຽນນໍ້າ ແລະ ຜັດຖູພາຊະນະເຊັ່ນ:ເຕົ້າດອກໄມ້,ນໍ້າຮອງຕີນຕູ້ເຢັນ,ຖ່ານຮອງຈອກນໍ້າ,3 ປ່ອຍປາຫາງນົກຍຸງເພື່ອກິນໜອນນໍ້າ,4 ປັບປຸງບໍ່ໃຫ້ມີນໍ້າຄ້າງ,ນໍ້າຂັງໃນກະໂປະກະປ໋ອງ,ຮາງລິນ ແລະ ຢ່າງຕີນລົດເກົ່າ,5 ປະຕິບັດເປັນປະຈຳທຸກໆອາທິດ ແລະ ຖ້າຫາກເປັນໄຂ້ໃຫ້ໄປປິ່ນປົ່ວຢູ່ໂຮງໝໍ ຫຼື ສຸກສາລາໃກ້ບ້ານທ່ານ,ພ້ອມທັງເຮັດທຸກວິທີ່ເພື່ອປ້ອງກັນຕົນເອງ ແລະ ຄົນທີ່ທ່ານຮັກຢ່າງມີປະສິດທິຜົນ.

ຂ່າວ: ພອນ ບຸນອຸທິດ (ຂ່າວເຊກອງ)