ຜົ້ງສາລີເມືອງໜາວແດນເໜືອ, ດຶ່ມຊາ 400 ປີ ຄັກແທ້ໆ

0
382

ແຂວງເໜືອສຸດ ປະເທດລາວ ກໍ່ຕ້ອງແມ່ນ ຜົ້ງສາລີ, ມື້ນີ້ ທີມງານໂທລະໂຄ່ງ ຈະພາໄປຮູ້ຈັກ ຜົ້ງສາລີໃຫ້ຫຼາຍຂຶ້ນ ແລະ ຫາກທ່ານມາຮອດ ຜົ້ງສາລີແລ້ວ ຄວນຈະໄປທ່ຽວໃສດີ.

ແຂວງຜົ້ງສາລີ ເປັນແຂວງໜຶ່ງທີ່ຢູ່ທາງພາກເໜືອສຸດຂອງປະເທດລາວເຮົາ ທີ່ອຸດົມສົມບູນໄປດ້ວຍຊັບພະຍາກອນທຳມະຊາດ ແລະ ວັດທະນະທໍາ. ເປັນດິນແດນທີ່ຫຸ້ມລ້ອມດ້ວຍພູຜາອາກາດໜາວເຢັນ ມີຊາຍແດນຕິດຈອດກັບສອງປະເທດ ຄື: ສປ ຈີນ, ແລະ ສສ ຫວຽດນາມ ກາຍເປັນເງື່ອນໄຂ ແລະ ຂໍ້ສະດວກໃນການພົວພັນ ພ້ອມທັງການເຂົ້າເຖິງຂອງນັກທ່ອງທ່ຽວຈາກຕ່າງປະເທດ.

Photo by: Hope Vision Photography

ປັດຈຸບັນ ແຂວງຜົ້ງສາລີ ມີແຫຼງທ່ອງທ່ຽວຫຼາຍແຫ່ງທີ່ໄດ້ເປີດບໍລິການ, ຄຽງຄູ່ກັບສິ່ງຮອງຮັບນັບມື້ນັບເພີ່ມຂຶ້ນ.
ປັດຈຸບັນທົ່ວແຂວງຜົ້ງສາລີ ມີແຫຼ່ງທ່ອງທ່ຽວທັງໝົດ 105 ແຫຼ່ງ. ມີແຫຼ່ງທ່ອງທ່ຽວທາງວັດທະນະທຳ 74 ແຫ່ງ, ແຫຼ່ງທ່ອງທ່ຽວທໍາມະຊາດ 27 ແຫ່ງ ແລະ ແຫຼ່ງທ່ອງທ່ຽວປະຫວັດສາດ 4 ແຫ່ງ. ເມື່ອເວົ້າເຖິງແຫຼ່ງທ່ອງທ່ຽວຂອງແຂວງແລ້ວ ພາຍໃນແຂວງ ຍັງມີແຫຼ່ງທ່ອງທ່ຽວທາງທໍາມະຊາດ ທີ່ໜ້າສົນໃຈ ເປັນຕົ້ນແມ່ນ:

ຖໍ້ານໍ້າແອງ,ຖໍ້າກະເດືອງ, ໜອງກິນນາລີ, ນໍ້າຕົກຕາດມັດທິງ, ປ່າສະຫງວນພູແດນດິນ, ປ່າສະຫງວນພູຕາສານ, ປ່າສະຫງວນພູສະແຫຼງ, ບໍ່ນໍ້າອຸ່ນນາແຕນ, ຜາເຜິ້ງ, ຖໍ້າອົມຕຼຶມ, ຖໍ້າລອນ ແລະ ອື່ນໆ. ສ່ວນທາງດ້ານປະຫວັດສາດ ແລະ ວັດທະນະທຳແມ່ນ: ຄ້າຍເກົ່າຝຣັ່ງ, ທາດກິ່ວອໍ, ສວນຊາ 400 ປີ, ທາດກິວແອກ, ວັດຫົວເມືອງ, ວັດອົງໄຫຼ, ທາດວັດຫຼວງອູໃຕ້, ວັດຫຼວງອູເໜືອ, ບ້ານຊົນເຜົ່າລາວກໍ່, ບ້ານເຜົ່າພູຊາງ, ວັດວຽງບຸນ, ບ້ານຊົນເຜົ່າລື້.

ນອກນີ້ ແຂວງຜົ້ງສາລີ ຍັງງານບຸນປະເພນີທີ່ສໍາຄັນສາ ມາດດຶງດູດນັກທ່ອງທ່ຽວເປັນຕົ້ນແມ່ນບຸນສະຫຼອງການປູກເຂົ້າ ແລະ ບຸນກູ້ເຜືອກ-ມັນເປັນຕົ້ນ. ສຳລັບເຂດພາກເໜືອແມ່ນເປັນເຂດພູມສັນຖານພູດອຍທີ່ມີລັກສະຊະນະສູງຊັນ, ມີພູຜາປ່າໄມ້, ອາກາດໜາວເຢັນ, ມີແມ່ນໍ້າລຳທານຫຼາຍສາຍ ແລະ ປະກອບມີຫຼາຍຊົນເຜົ່າທີ່ມີຮີດຄອງເປັນເອກະລັກທ້ອງຖິ່ນ ດ້ວຍເຫດນີ້ຈຶ່ງມີແຫຼ່ງທ່ອງທ່ຽວຫຼາກຫຼາຍ.

ຊົມຄລິບຕົວເມືອງຜົ້ງສາລີກ່ອນເນາະ ຈັ່ງໄປເລາະເບິ່ງບ່ອນອື່ນໆ.

ສະບາຍດີ ຜົ້ງສາລີPhongsaly – Land of the MistVideo by : Alan Liu—————————–Hope Vision Photography

Posted by Hope Vision Photography on Thursday, June 28, 2018

ຕ້ອງຂອບໃຈຄລິບງາມໆ ຈາກ Hope Vision Photography

 

ເຂື່ອນໄຟຟ້ານ້ຳງາຍ ເປັນເຂື່ອນໄຟຟ້າ ແຫ່ງທຳອິດ ຂອງແຂວງ ຜົ້ງສາລີ ເຊິ່ງເລີ່ມມີການກໍ່ສ້າງຂຶ້ນ ໃນປີ 2000 ແລະ ສຳເລັດສົມບູນໃນປີ 2003, ເຊິ່ງສາມາດສ້າງກະແສໄຟຟ້າແຮງກາງ ສົ່ງມາໃຫ້ເທດສະບານແຂວງໃຊ້ຢ່າງທົ່ວເຖິງ ແລະ ອ້ອມຮອບເຂື່ອນປະກອບມີປ່າໄມ້ນາໆພັນ ເຊິ່ງເໝາະເປັນບ່ອນອາໄສຂອງສັດປ່ານາໆຊະນິດ ແລະ ໃຕ້ນ້ຳເທິງເຂື່ອນ ມີປານາໆຊະນິດອາໄສຢູ່ ເຊິ່ງສາມາດຕອບສະໜອງ ໃນການທຳມາຫາກິນ ຂອງຄົນໃນທ້ອງຖິ່ນ ໄດ້ພໍປະມານ, ມີໄລຍະທາງຫ່າງຈາກເທດສະບານ ຂຶ້ນໄປທາງເໜືອ 36 ກິໂລແມັດ.

ເຂື່ອນໄຟຟ້ານໍ້າງາຍ

ສະຖານທີ່ແຫ່ງນີ້ກໍ່ຖືເປັນອີກບ່ອນ ທີ່ຊາວຜົ້ງສາລີ ມັກຖືໂອກາດ ມາທ່ຽວ ພັກຜ່ອນ ໃນວັນພັກຕ່າງໆ ສາມາດມາຫຼິ້ນ ກັບໝູ່ເພື່ອ ຄອບຄົວ. ຕາມເສັ້ນທາງ ກ່ອນຈະຮອດ ເຂື່ອນແຫ່ງນີ້ ກໍ່ມີທຳມະຊາດສວຍງາມ ທີ່ທ່ານສາມາດຊື່ນຊົມ.

ເຂື່ອນໄຟຟ້ານໍ້າງາຍ

 

ໜອງກິນນາລີ ເປັນໜອງທີ່ມີ ປະຫວັດຄວາມເປັນມາ ຍາວນານ ແລະ ເປັນໜອງ ທີ່ສັກສິດໃນເມື່ອກ່ອນ ແລະ ກໍ່ຍັງມີການຄົບລົບນັບຖື ຂອງຊາວບ້ານໃກ້ຄຽງ ຈົນມາເຖິງທຸກວັນນີ້, ທີ່ຕັ້ງຂອງໜອງ ບໍ່ໄກຈາກເທດສະບານແຂວງພໍເທົ່າໃດ, ເຊິ່ງມີໄລຍະທາງຫ່າງຈາກເທດສະບານແຂວງ ຂຶ້ນໄປທາງເໜືອ 5 ກິໂລແມັດ. ທ່ານໃດມີໂອກາດໄດ້ມາ ກໍ່ບໍ່ຄວນພາດ ມາຢ້ຽມຢາມໜອງແຫ່ງນີ້.

ໜອງກິນນາລີ, ຜົ້ງສາລີ

ຖ້ຳກະເດືອງ ຕັ້ງຢູ່ເມືອງໃໝ່ ບໍ່ໄກພໍເທົ່າໃດຈາກເທດສະບານເມືອງ, ເປັນຖ້ຳທີ່ມີຄວາມສວຍງາມ ປະດັບໄປດ້ວຍຮູບຊົງຂອງຫີນອ່ອນ ທີ່ມີຫຼາຍ ຮູບແບບຕາມທຳມະຊາດ, ເໝາະແກ່ການເປີດເປັນແຫຼ່ງທ່ອງທ່ຽວ ໃຫ້ນັກທ່ອງທ່ຽວໄດ້ສຳພັດ ກັບຄວາມງົດງາມນີ້. ມີໄລຍະທາງຈາກເທດສະບານແຂວງ 283 ກິໂລແມັດ. ສຳລັບຄົນທີ່ມັກການເດີນທາງ ພະຈົນໄພ ແລະ ຮຽນຮູ້ທຳມະຊາດ ກໍ່ແນະນຳມາທ່ຽວຖໍ້າແຫ່ງນີ້.

ຖໍ້າກະເດືອງ

ປ່າສະຫງວນແຫ່ງຊາດ ພູແດນດິນ ຕັ້ງຢູ່ທາງທິດຕາເວັນອອກ ຂອງເມືອງຜົ້ງສາລີ ເຊິ່ງມີຊາຍແດນທິດຕາເວັນອອກຕິດກັບ ສສ ຫວຽດນາມ, ທິດໃຕ້ຕິດກັບເມືອງສຳພັນ, ທິດເໜືອຕິດກັບເມືອງຍອດອູ ແລະ ທິດຕາເວັນຕົກຕິດກັບເມືອງຜົ້ງສາລີ, ເຊິ່ງເປັນເຂດທີ່ມີສັດນ້ຳ-ສັດປ່າ ແລະ ຄວາມຫຼາກຫຼາຍທາງດ້ານຊີວະນາໆພັນ ທີ່ຍັງຄົງຮັກສາຄວາມອຸດົມ ສົມບຸນດ້ວຍລະບົບນີເວດວິທະຍາ ແລະ ຊີວະວິທະຍາ.

Photo: Hope Vision Photography

ດັ່ງນັ້ນຈຶ່ງຈັດ ເປັນເຂດທ່ອງທ່ຽວ ແນໃສ່ປົກປັກຮັກສາສັດນ້ຳ, ສັດປ່າໃຫ້ດຳລົງຄົງຕົວ ແລະ ຂະຫຍາຍຕົວຕາມທຳມະຊາດ ເພື່ອສ້າງເປັນຈຸດການສຶກສາຄົ້ນຄວ້າ ທາງດ້ານວິທະຍາສາດ ແລະ ສີ່ງແວດລ້ອມ, ມີໄລຍະທາງ ຫ່າງຈາກເທດສະບານແຂວງ 76.2 ກິໂລແມັດ.

ປ່າສະຫງວນແຫ່ງຊາດ ພູແດນດິນ

 

ດ່ານຊາຍແດນສົບຮຸນ-ໄຕຈາງ ໄລຍະທາງ 26 ກິໂລແມັດ ຈາກເມືອງໃໝ່ ດ່ານຊາຍແດນຕັ້ງຢູ່ເທິງຍອດພູທາງຝັ່ງລາວຄື “ດ່ານສົບຮຸນ” ເບິ່ງໄປແຕ່ໄກຈະເຫັນ “ດ່ານໄຕຈາງ” ຂອງຫວຽດນາມ ຊຶ່ງຕັ້ງຢູ່ເທິງພູອີກລູກໜຶ່ງ ໄລຍະທາງປະມານ 3 ກິໂລແມັດ ຫ່າງຈາກຕົວເມືອງດຽນບຽນຟູປະມານ 35 ກິໂລແມັດ ຫາກຕ້ອງການຕໍ່ລົດເພື່ອໄປຍັງຊາປາ ລົດໂດຍສານທ້ອງຖິ່ນຈະອອກໃນເວລາ 6:00 ຂອງທຸກມື້ ຫາກຕ້ອງການນຳລົດສ່ວນຕົວຂ້າມໄປຍັງຫວຽດນາມຈະຕ້ອງຕິດຕໍ່ບໍລິສັດນຳທ່ຽວທ້ອງຖິ່ນ ມາຮັບເພື່ອຂັບລົດນຳທາງ (ກົດຫມາຍວຽດນາມລະບຸ ລົດທີ່ຂັບພວງມາໄລ ຈະຕ້ອງມີບໍລິສັດນຳທ່ຽວທ້ອງຖິ່ນນຳຂະບວນ).

Photo : Hope Vision Photography

ເຂດເມືອງເກົ່າ ເມື່ອສັງເກດເບິ່ງແຜນທີ່ ປະເທດລາວ ແຂວງ ຜົ້ງສາລີ ມີລັກສະນະ ຍື່ນອອກໄປກັ້ນກາງ ລະຫວ່າງ 2 ປະເທດ ໃນແນວໄລຍະທີ່ ເກືອບຈະເທົ່າກັນ ຊຶ່ງດິນແດນແຫ່ງນີ້ ເຄີຍເປັນສ່ວນໜຶ່ງ ຂອງ ແຂວງ ດຽນບຽນຟູ ແລະ ແຂວງ ຍູນນານ ມາກ່ອນ. ແຕ່ດ້ວຍເປັນຈຸດຍຸດທະສາດ ສຳຄັນ ທີ່ ຝຣັ່ງ ຕ້ອງການຈະໃຊ້ ໃນການຄານອຳນາດ ຈີນ ແລະ ຫວຽດນາມເໜືອ ໄດ້ຢ່າງເດັດຂາດ ຈຶ່ງບີບບັງຄັບ ໃຫ້ຈີນ ສົ່ງມອບພື້ນທີ່ສ່ວນນີ້ ໃນສົນທິສັນຍາ ປີ ຄ.ສ 1895 ຈຶ່ງສົ່ງຜົນເຮັດໃຫ້ ໃນເຂດຕົວເມືອງ ມີລັກສະນະ ປະສົມປະສານ ຂອງຊົນເຜົ່າທີ່ຫຼາກຫຼາຍ ເຊັ່ນ: ມົ້ງ, ຈີນ, ຫໍ້, ທິເບດ, ແລະ ຫວຽດນາມ. ເຖິງຈະມີກິ່ນອາຍ ຂອງ ຝຣັ່ງ ຢູ່ນຳ ແຕ່ກໍບໍ່ຊັດເຈນເທົ່າໃດ ໃນເຂດເມືອງເກົ່ານີ້ ເບິ່ງຄ້າຍກັບ “ເມືອງມໍລະດົກໂລກ ລີ່ຈຽງ” ຂອງຈີນ ແລະ “ເມືອງຮອຍອັນ” ຂອງ ວຽດນາມ ລວມກັນ ແຕ່ມີຂະໜາດນ້ອຍກວ່າ ແລະ ຍັງບໍ່ມີການອະນຸລັກ ບ້ານເຮືອນ ໄວ້ຄືກັບທັງ 2 ແຫ່ງ.

Photo : Hope Vision Photography

ດັ່ງນັ້ນ ການທ່ຽວຊົມເຂດເມືອງເກົ່າ ທີ່ດີທີ່ສຸດ ຄືການຍ່າງ ຊຶ່ງເໝືອນໄດ້ຍ້ອນກັບໄປ ສູ່ຍຸກອະດີດ ອີກເທື່ອໜຶ່ງ ເພາະຖະໜົນທີ່ເຊື່ອມກັບ ຮ່ອມນ້ອຍໆ ທີ່ປູດ້ວຍຫີນ ຢ່າງເມືອງເກົ່າລີ່ຈຽງ ບ້ານເຮືອນ ກໍ່ສ້າງດ້ວຍໄມ້ທັງຫຼັງ ຫຼື ກໍ່ດ້ວຍດິນໜຽວ ໂດຍມີໄມ້ເປັນໂຄງສ້າງ ເພື່ອປ້ອງກັນ ຄວາມໜາວເຢັນ ມີລວດລາຍ ຕົກແຕ່ງຕາມອາຄານ ປະຕູປ່ອງຢ້ຽມ ຍັງມີອັກສອນພາສາຈີນ ຫຼື ຫວຽດນາມ ປະດັບຢູ່.

ພິພິທະພັນຊົນເຜົ່າ ເປັນອາຄານຊັ້ນດຽວຕັ້ງຢູ່ເທິງເນີນພູ ໃກ້ກັບທະນາຄານພັດທະນາລາວ ພາຍໃນຈັດສະແດງເຄື່ອງມືເຄື່ອງໃຊ້, ເຄື່ອງແຕ່ງກາຍ ແລະ ພາບຖ່າຍຊົນເຜົ່າຕ່າງໆ ທີ່ອາໄສໃນເມືອງ ເຊັ່ນ: ໂລໂລ, ໂລມາ, ໂອມາ, ພວນ, ຂະມຸ…

ສວນຊາ 400 ປີ ຕັ້ງຢູ່ທີ່ບ້ານກໍແມນ ໄລຍະທາງປະມານ 15 ກິໂລແມັດ ຈາກເມືອງຜົ້ງສາລີໄປທາງທິດຕະເວັນຕົກ ເປັນຫມູ່ບ້ານນ້ອຍໆ ຂອງຊາວຈີນ ທີ່ອົບຍົບມາປັກຫລັກສ້າງບ້ານເຮືອນເມື່ອຫລາຍຮ້ອຍປີກ່ອນ ແລະ ປູກຊາຂາຍມາຕັ້ງແຕ່ນັ້ນ ຈົນເຖິງປະຈຸບັນສາມາດຜະລິດໄດ້ເຖິງ 60-70 ໂຕນ/ປີ ມີໂຮງງານຜະລິດ ແລະ ຫ້ອງເກັບຮັກສາຊາໄວ້ເຖິງ 10 ປີ ໃກ້ກັນຈະພົບຕົ້ນຊາທີ່ອາຍຸເກົ່າແກ່ເຖິງ 400 ປີ.

ສວນຊາ 400 ປີ
ສວນຊາ 400​ ປີ
ສວນຊາ 400​ ປີ

ຫາດສາ ເປັນບ້ານນ້ອຍໆ ທີ່ຢູ່ຕິດແມ່ນ້ຳອູ ທີ່ໄຫລຈາກຕອນເໜືອສຸດຂອງປະເທດລາວ ທາງຕອນໃຕ້ຂອງຈີນ ໄຫລຜ່ານຫາດສາ ແລະ ຜ່ານໄປຍັງເມືອງຂວາ, ເມືອງງອຍ, ໜອງຂຽວ ແລະ ໄຫລໄປລົງແມ່ນ້ຳຂອງ ທີ່ບໍລິເວນຖ້ຳປາກອູ ທີ່ຫລວງພະບາງ ຫາດສາເປັນຫມູ່ບ້ານສຳຄັນ ໃນອະດີດ ເພາະການເດີນທາງ ໃນສະໄໝກ່ອນຕ້ອງອາໄສທາງນ້ຳເປັນຫລັກ ແລະ ຂຶ້ນຕໍ່ໄປເຖິງ ແຂວງຜົ້ງສາລີ ອາໄສທາງນ້ຳເປັນຫລັກ. ຫາດສາຢູ່ຫ່າງຈາກເມືອງຜົ້ງສາລີ 20 ກິໂລແມັດ ຊຶ່ງຈາກເມືອງຂວາ ຈະຂີ່ລົດຕໍ່ໄປຫລວງພະບາງ ອຸດົມໄຊ ກໍໄດ້ ຫລື ຈະຂີ່ເຮືອຕໍ່ໄປເມືອງງອຍ ໄປຫລວງພະບາງກໍໄດ້

ບ້ານເຜົ່າມົ້ງ ຕາມບັນທຶກກ່າວໄວ້ວ່າໃນອະດີດຜົ້ງສາລີ ມີຖານະເປັນໜຶ່ງໃນເມືອງຂອງພວກໄທລື້ ໃນແຄວ້ນສິບສອງປັນນາ ຂອງຈີນ ແຕ່ຝຣັ່ງ ໄດ້ແຍ່ງມາຈາກຈີນ ໃນສົນທິສັນຍາທີ່ເຮັດຂຶ້ນເມື່ອ ຄ.ສ 1895 ຕໍ່ມາເມື່ອຕົກມາເປັນຂອງລາວ ຈຶ່ງກາຍເປັນແຂວງທີ່ມີຄວາມຫລາກຫລາຍທາງເຊື້ອຊາດ ທີ່ສຸດແຂວງໜຶ່ງ ມີທັງ: ມົ້ງ, ອາຂ່າ, ຢ້າວ, ຜູ້ໄທ ແລະ ເຜົ່າຕ່າງໆ. ລວມເຖິງຊາວຕ່າງດ້າວ ຫວຽດນາມ ແລະ ຈີນ. ເນື່ອງຈາກລັດຖະບານລາວມີນະໂຍບາຍທີ່ຈະສ້າງ ເອກະພາບໃນຄວາມຫລາກຫລາຍ ຈຶ່ງໄດ້ລວມຊົນກຸ່ມນ້ອຍເຖິງ 23 ເຜົ່າ ເຂົ້າດ້ວຍກັນ.

ພູຟ້າ ແມ່ນມິ່ງຂັວນຂອງຊາວເມືອງ ເທດສະບານແຂວງຜົ້ງສາລີ ເປັນພູທີ່ສວຍສົດງົດງາມ, ຕັ້ງຢູ່ຕາເວັນອອກສຽງເໜືອ ຂອງຕົວເມືອງຜົ້ງສາລີ; ພູຟ້າມີຄວາມສູງ 1,625 ແມັດ ທຽບຈາກໜ້ານ້ຳທະເລ, ມີຂັ້ນໄດຂຶ້ນ 863 ຂັ້ນ ແລະ ມີເນື້ອທີ່ທັງໜົດ 200 ເຮັກຕາ. ເປັນພູທີ່ອຸດົມສົມບູນ ເຕັມໄປດ້ວຍປ່າໄມ້ອັນດົກໜາ ແລະ ພືດພັນຫຼາຍສິ່ງຫຼາຍຢ່າງ. ພືດດັ່ງກ່າວ ສາມາດນຳໃຊ້ເປັນຢາສະໜູນໄພ, ຊາວເມືອງເທດສະບານແຂວງ ເຄີຍໄປເອົາ ພືດພັນຮາກໄມ້ຕ່າງໆ ມາປຸງເປັນຢາພື້ນເມືອງ ເພື່ອປິ່ນປົວພະຍາດຍາມເຈັບໄຂ້ໄດ້ປ່ວຍ. ນອກຈາກນີ້ ຍັງເປັນບ່ອນເພິ່ງພາອາໄສ ຂອງສັດປ່າຕ່າງໆນາໆ. ເມື່ອກ່ອນມີຮອດຊ້າງ, ເສືອ, ແຮດ ປະຈຸບັນເຫັນພຽງແຕ່ຟານ, ລີງ, ນົກ ແລະ ໜູປ່າ ເທົ່ານັ້ັນ.

ເວົ້າມານີ້ຍັງບໍ່ໝົດ ມີໂອກາດ ເຂົ້າໄປເວັບທີ http://phongsaly.gov.la

ຮຽບຮຽງໂດຍ: ໂທລະໂຄ່ງ