ເຈົ້າແຂວງຈໍາປາສັກໂອ້ລົມນາຍບ້ານທີ່ຂຶ້ນກັບນະຄອນປາກເຊ

0
120

ທ່ານ ປອ ບຸນຖອງ ດີວິໄຊ ກຳມະການສູນກາພັກ ເລຂາພັກແຂວງ ເຈົ້າແຂວງໆຈຳປາສັກ ໄດ້ໃຫ້ກຽດພົບປະໂອ້ລົມເລຂາໜ່ວຍພັກບ້ານ, ນາຍບ້ານ 42 ບ້ານທີ່ຂຶ້ນກັບນະຄອນປາກເຊ, ໃນຕອນເຊົ້າວັນທີ 5 ກໍລະກົດ 2018 ນີ້, ຢູ່ທີ່ສະໂມສອນ ນະຄອນປາກເຊ.

 

ໃນໂອກາດພົບປະໂອ້ລົມນີ້, ທ່ານເຈົ້າແຂວງຈຳປາສັກ ໄດ້ຮັບຟັງລາຍງານສະພາບການປະຕິບັດວຽກງານການເກັບລາຍຮັບ, ບັນຫາປະກົດການຫຍໍ້ທໍ້ທີ່ເກີດຂຶ້ນ, ຂໍ້ສະດວກ ແລະຫຍຸ້ງຍາກຢູ່ແຕ່ລະບ້ານ. ຈາກນີ້ກໍໄດ້ໃຫ້ກຽດໂອ້ລົມໂດຍເນັ້ນໃຫ້ນາຍບ້ານແຕ່ລະບ້ານສຸມໃສ່ການເກັບລາຍຮັບເຂົ້າງົບປະມານໃຫ້ໄດ້ຕາມແຜນການທີ່ວາງໄວ້.

ໂດຍເນັ້ນໃຫ້ສ່ວຍສາອາກອນນະຄອນຕ້ອງແບ່ງຂັ້ນຄຸ້ມຄອງເກັບພັນທະກັບບ້ານໃຫ້ລະອຽດຈະແຈ້ງກ່ວາເກົ່າຊຶ່ງຖືເອົາກົດໝາຍເປັນຫຼັກ, ອຳນາດການປົກຄອງບ້ານຕ້ອງເປັນເຈົ້າການສົມທົບແໜ້ນກັບເຈົ້າໜ້າທີ່ຕ້ານບັນຫາປະກົດການຫຍໍ້ທໍ້ທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍລົງເຊັ່ນ: ບັນຫາຢາເສບຕິດ, ຂີ້ລັກງັດແງະ, ລະເມີດລະບຽບກົດໝາຍ ແລະອື່ນໆ; ພ້ອມດຽວກັນກໍຕ້ອງເອົາໃຈໃສ່ບັນຫາຄວາມສະອາດຈົບງາມ,ຄວາມເປັນລະບຽບຮຽບຮ້ອຍໃນສັງຄົມເປັນຕົ້ນ ຫ້າມປ່ອຍສັດລ້ຽງງົວ, ຄວາຍເຂົ້າມາເທດສະບານນະຄອນຢ່າງເດັດຂາດ, ບໍ່ໃຫ້ຕໍ່ເຕີມຫ້າງຮ້ານອອກເກີນຂອບເຂດໃສ່ທາງຫຼວງ ແລະ ຈອດຊະຊາຍອັນຈະສ້າງຄວາມສັບສົນໃຫ້ແກ່ການສັນໄປມາບໍສະດວກ,

ຈາກນີ້ກໍຕ້ອງສຶກສາອົບຮົມປະຊາຊົນບັນດາເຜົ່າຊາວນະຄອນປາກເຊ ສາມັກຄີປອງດອງປະຕິບັດສິດ, ພັນທະຂອງຕົນປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ກໍຄືຮັກສາພາບພົດບົດບາດນະຄອນປາກເຊນີ້ໄວ້ໃຫ້ຍືນຍົງຕະຫຼອດໄປ.

ຂ່າວ: ເກດສະໜາ