ສໍາເລັດກອງປະຊຸມຄົບຄະນະບໍລິຫານງານພັກເມືອງແກ່ນທ້າວ ຄັ້ງທີ 12 ສະໄໝທີ VI

ກອງປະຊຸມຄົບຄະນະບໍລິຫານງານພັກເມືອງແກ່ນທ້າວ ຄັ້ງທີ 12 ສະໄໝທີ VI ໄດ້ປິດລົງດ້ວຍຜົນສຳເລັດຢ່າງຈົບງາມໃນວັນທີ 5 ກໍລະກົດ 2018 ນີ້, ພາຍຫຼັງທີ່ໄດ້ດໍາເນີນມາເປັນເວລາ 2 ວັນ ຢູ່ທີ່ສະໂມສອນຂອງເມືອງແກ່ນທ້າວ ແຂວງໄຊຍະບູລີ. ໂດຍການເປັນກຽດເຂົ້າຮ່ວມຂອງ ສະຫາຍ ສໍາລານ ສຸວັນນະໂຊດ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆແກ່ນທ້າວ, ມີຄະນະປະຈຳພັກເມືອງ, ກຳມະການພັກເມືອງ, ເລຂາໜ່ວຍພັກສຳນັກງານ, ອົງການ, ກົມກອງ ແລະ ຫົວໜ້າຫ້ອງການເຂົ້າຮ່ວມ 27 ສະຫາຍ.

ໃນກອງປະຊຸມໄດ້ຮັບຟັງການລາຍງານບົດສັງເກດຕີລາຜົນຂອງການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 11 ສະໄໝທີ VI, ບົດສະຫຼຸບຕີລາຄາການຈັດຕັ້ງປະຕິບັດວຽກງານຮອບດ້ານປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ແລະ ຮັບຟັງການຜ່ານມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 10 ສະໄໝທີ VI.

ຈາກນັ້ນ ໄດ້ຮັບຟັງລາຍງານການເກັບກູ້ພືດລະດູແລ້ງ ແລະ ການຜະລິດລະດູຝົນ, ການເກັບລາຍຮັບເຂົ້າງົບປະມານ ໃນໄລຍະ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 20178, ການສະຫຼຸບການສອບເສັງຈົບຊັ້ນປະຖົມ ແລະ ມັດທະຍົມໃນທົ່ວເມືອງ ສົກຮຽນ 2017-2018, ການລະບາດຂອງພະຍາດໄຂ້ຍຸງລາຍ, ການແກ້ໄຂປະກົດການຫຍໍ້ທໍ້ໃນສັງຄົມ, ການນໍາພາສ້າງບ້ານປ້ອງກັນຄວາມສະຫງົບດີ, ບ້ານປອດຢາເສບຕິດ ແລະ ອື່ນໆ. ບັນດາສະຫາຍຜູ້ແທນກອງປະຊຸມ ໄດ້ພ້ອມກັນຄົ້ນຄວ້າປຶກສາຫາລືປະກອບຄໍາຄິດຄໍາເຫັນ ເພື່ອເປັນການແລກປ່ຽນຖອດຖອນບົດຮຽນ, ຍົກໃຫ້ເຫັນບັນຫາທີ່ພົ້ນເດັ່ນ ໃນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ຊອກວິທີແກ້ໄຂຈຸດອ່ອນຂໍ້ຂົງຄ້າງຮ່ວມກັນ.

ໃນກອງປະຊຸມຍັງໄດ້ຮຽກຮ້ອງໃຫ້ຄະນະພັກ, ອົງການປົກຄອງທຸກຂັ້ນ, ສະມາຊິກພັກ, ພະນັກງານ-ລັດຖະກອນ, ກໍາລັງປະກອບອາວຸດ ແລະ ປະຊາຊົນໃນທົ່ວເມືອງ ຈົ່ງເຊີດຊູຄວາມຮັບຜິດຊອບໃຫ້ສູງຂຶ້ນ ແລະ ເພີ່ມທະວີເປັນປຶກແຜ່ນ ພາຍໃຕ້ການຊີ້ນໍາ-ນໍາພາຂອງອົງຄະນະພັກເມືອງ ແລະ ຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານເມືອງ ຄັ້ງທີ 12 ສະໄໝທີ VI ໃຫ້ເປັນຂະບວນຟົດຟື້ນ, ພ້ອມກັນສຸມສະຕິປັນຍາ, ທຶນຮອນປະກອບສ່ວນເຂົ້າໃນການພັດທະນາເມືອງແກ່ນທ້າວ ໃຫ້ມີຄວາມຈະເລີນສີວິໄລຂຶ້ນຢ່າງບໍ່ຢຸດຢັ້ງ.

Credited: Lao National Radio