ນາຍົກເນັ້ນ ພາກລັດ ບໍ່ຄວນລໍຖ້າພຽງ ເກັບເງິນພາສີອາກອນຈາກພາກທຸລະກິດ ແຕ່ຕ້ອງອໍານວຍຄວາມສະດວກໃຫ້

0
392

ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ມີຄໍາເຫັນຕໍ່ກອງປະຊຸມທຸລະກິດລາວຄັ້ງທີ11 ປີ2018 ໃນນັ້ນ ໄດ້ເນັ້ນ 3 ບັນຫາຄື: ຖືເອົາກອງປະຊຸມທຸລະກິດລາວເປັນກົນໄກໃນການປັບປຸງການດໍາເນີນທຸລະກິດ, ປັບປຸງສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ແລະ ສະພາການຄ້າ ແລະ ອຸດສາຫະກຳຂອງບັນດາແຂວງ ເປັນຂົວຕໍ່ໃນການຮ່ວມມືກັນຢ່າງໜັກແໜ້ນ ແລະ ກໍານົດເປົ້າໝາຍຊັດເຈນໃນການເຄື່ອນໄຫວຂອງ ສຄອຊ ຢູ່ຕ່າງປະເທດ ເພື່ອດຶງດູດການລົງທຶນ.ບໍ່ຄວນລໍຖ້າພຽງ ເກັບເງິນພາສີອາກອນຈາກພາກທຸລະກິດ ແຕ່ຕ້ອງອໍານວຍຄວາມສະດວກໃຫ້.

ກອງປະຊຸມທຸລະກິດລາວຄັ້ງທີ 11 ປີ 2018 ຈັດຂຶ້ນວັນທີ 5 ກໍລະກົດ 2018 ທີ່ໂຮງແຮມດອນຈັນພາເລດ ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປລາວ ມີ ລັດຖະມົນຕີ, ຮອງລັດຖະມົນຕີ, ສະມາຊິກສະພາແຫ່ງຊາດ, ເອກອັກຄະລາດຊະທູດ, ພາກທຸລະກິດທັງພາຍໃນ ແລະ ຕ່າງປະເທດ ເຂົ້າຮ່ວມ.

ທ່ານ ນາງເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າໄດ້ກ່າວວ່າ: ກອງປະຊຸມທຸລະກິດລາວຄັ້ງທີ 11 ທີ່ປະຊຸມໄດ້ລາຍງານ ແລະ ປຶກສາຫາລື 3 ກຸ່ມບັນຫາໃຫຍ່ຄື: ໜຶ່ງ: ບັນຫາອາກອນສໍາລັບທຸລະກິດ, ສອງ ບັນຫາອໍານວຍຄວາສະດວກດ້ານການຄ້າ ແລະ ການຂົນສົ່ງໃນສປປລາວ ແລະ ສາມ ບັນຫາ ອຸປະສັກຕໍ່ການພັດທະນາຂະແໜງການທ່ອງທ່ຽວ. ນອກຈາກນັ້ນ, ກອງປະຊຸມຍັງໄດ້ຮັບຟັງການລາຍງານຄວາມຄືບໜ້າ ການຈັດຕັ້ງປະຕິບັດຄວາມຄືບໜ້າ ຄໍາສັ່ງນາຍົກເລກທີ 02/ນຍ ເຊິ່ງເຫັນວ່າມີຄວາມຄືບໜ້າໃນການຈັດຕັ້ງປະຕິບັດຫຼາຍສົມຄວນ, ມີຄວາມເອົາໃຈໃສ່ ຈາກກະຊວງ ແລະ ຂະແໜງການກ່ຽວຂ້ອງເຊິ່ງຈະນໍາໄປສູ່ການແກ້ໄຂຫຼາຍໆບັນຫາ ທີ່ພາກທຸລະກິດລາວໄດ້ຍົກຂຶ້ນໃນກອງປະຊຸມຄັ້ງນີ້. ພ້ອມກັນນີ້ຍັງໄດ້ຮັບຟັງ ມູມມອງຈາກພາກທຸລະກິດຕ່າງໆ ກ່ຽວກັບຂໍ້ສະເໜີ ວ່າຈະເຮັດແນວໃດ ເພື່ອອໍານວຍຄວາມສະດວກໃຫ້ທຸລະກິດຂອງລາວມີການຂະຫຍາຍຕົວ ແລະ ປັບສະຖານະ ລົງເຫຼືອ2ຕົວເລກ.

ພາຍຫຼັງຮັບຟັງການສັງລວມຜົນກອງປະຊຸມ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງສປປລາວ ກໍ່ໄດ້ມີຄວາມເປັນເອກະພາບໃນການ ນໍາສະເໜີ ແລະ ແກ້ໄຂບັນຫາ ພ້ອມນັ້ນທ່ານ ໄດ້ສະເໜີ ເພີ່ມຕື່ມບາງທິດທາງໃຫ້ພາກທຸລະກິດເອົາໃຈໃສ່ ເພື່ອຢາກເຮັດໃຫ້ແຜນພັດທະນາເສດຖະກິດຂອງລັດຖະບານ ແລະ ວຽກງານໄປລວງດຽວກັນ ດັ່ງນີ້:

1: ສືບຕໍ່ກົນໄກປືກສາຫາລືລະຫວ່າງພາກລັດ – ທຸລະກິດ ໂດຍຜ່ານກົນໄກກອງປະຊຸມທຸລະກິດລາວ ກົນໄກການ ພົບປະລະຫວ່າງລັດຖະບານ – ຂະແໜງການ ພົບປະລະຫວ່າງພາກທຸລະກິດ ເພື່ອເປີດໂອກາດໃຫ້ທຸກພາກສ່ວນສະເໜີບັນຫາ. ໃນນັ້ນ, ບາງບັນຫາບັນດາຂະແໜງການ ຕ້ອງໄດ້ສະເໜີໄປເປັນລາຍລັກອັກສອນ ເພື່ອນໍາເຂົ້າກອງປະຊຸມ ຄະນະລັດຖະບານ ແກ້ໄຂບັນຫາ.

2: ປັບປຸງ ສຄອຊ ຕື່ມອີກ ລວມທັງ ສຄອ ຂັ້ນທ້ອງຖິ່ນໃຫ້ເຂັ້ມແຂງຂຶ້ນ ສາມາດເຮັດບົດບາດເປັນຂົວຕໍ່ທີ່ໜັກແໜ້ນ ແລະ ມີປະສິດທິຜົນໃນການຮ່ວມມືກັນຂອງພາກລັດ – ທຸລະກິດຢ່າງແທ້ຈິງ.

3: ໃຫ້ບັນດາຂະແໜງການຂອງລັດຖະບານ ສຄອຊ ຮ່ວມມືກັນເພື່ອຍົກລະດັບການພັດທະນາ ການເຄື່ອນໄຫວຂອງ ສຄອຊ ທີ່ອອກເຄື່ອນໄຫວຢູ່ຕ່າງປະເທດໃຫ້ຫຼາຍຂຶ້ນ ແລະ ມີເປົ້າໝາຍ ເພື່ອເປັນການດຶງດູດເອົາການລົງທຶນຈາກຕ່າງປະເທດ ເຂົ້າມາລົງທຶນໃນປະເທດເຮົາ ພ້ອມທັງເປັນການນໍາເອົາບົດຮຽນ ແລະ ຄວາມຮູ້ໃໝ່ໆ.

;ພ້ອມນັ້ນໃຫ້ຜູ້ປະກອບການທຸລະກິດ ຕ້ອງໄດ້ເຂົ້າໃຈສະພາບເສດຖະກິດຂອງປະເທດ ມີຂໍ້ຫຍຸ້ງຍາກຍັງບໍ່ທັນສະດວກການຕອບສະໜອງແຫຼ່ງທຶນ ແລະ ຍັງບໍ່ທັນພຽງພໍໃນການຕອບສະໜອງທຶນຮອນ ໃຫ້ນັກທຸລະກິດກູ້ຢືມ, ເຂົ້າເຖິງແຫຼ່ງທຶນຕ່າງໆ ຍັງບໍ່ທັນພຽບພ້ອມ, ສະເໜີໃຫ້ພາກທຸລະກິດ ຕ້ອງໄດ້ກຸ້ມຕົ້ນເອງຕື່ມ ເຮັດແນວໃດໃຫ້ຜູ້ປະກອກການ ມີຄວາມສະດວກຍິ່ງຂຶ້ນ.

ນອກນັ້ນທ່ານນາຍົກຍັງເນັ້ນ ໃຫ້ພາກທຸລະກິດລາວຕ້ອງໄດ້ຫັນປ່ຽນວິໄສທັດ, ມີການວາງແຜນເປັນຍຸດທະສາດ ຫັນຮູບແບບການດໍາເນີນທຸລະກິດຂອງຕົ້ນ ດໍາເນີນທຸລະກິດ ໃຫ້ມີຄວາມກົມກຽວກັບແຜນພັດທະນາເສດຖະກິດ ແລະ ຄວາມເປັນຈິງໃນສັງຄົມ ເປັນຕົ້ນແມ່ນ ການຜະລິດສິນຄ້າເພື່ອສົ່ງຂາຍໄປຕ່າງປະເທດ, ໂຄງການເປີດກວ້າງການລົງທຶນຈາກຕ່າງປະເທດຂະໜາດໃຫຍ່, ໂຄງການພັດທະນາແຫຼ່ງທ່ອງທ່ຽວ, ການປຸງແຕ່ງຊັບພະຍາຍກອນທໍາມະຊາດໃຫ້ເປັນສໍາເລັດຮູບແລ້ວຈຶ່ງສົ່ງອອກເຫຼົ່ານີ້ເປັນຕົ້ນ.

ພ້ອມນັ້ນຂະແໜງການກ່ຽວຂ້ອງຂອງພາກລັດ ບໍ່ຄວນລໍຖ້າເກັບເງິນພາສີອາກອນຈາກພາກທຸລະກິດ ຕ້ອງໄດ້ອໍານວຍຄວາມສະດວກໃນການດຳເນີນທຸລະກິດໃຫ້ໄປຕາມກົດເກນ ຂອງເສດຖະກິດ ມີຫຼັກວິທະຍາສາດ ເຊິ່ງປັດຈຸບັນ ພວກເຮົາ ກໍາລັງຢູ່ໃນສະຖານະການຮຽນຮູ້ເຊິ່ງກັນ ແລະ ກັນ ຊ່ວຍເຫຼືອເຊິ່ງກັນ ແລະ ກັນ ອໍານວຍຄວາມສະດວກໃຫ້ກັນ ແລະ ກັນ ມີຄວາມຮັບຜິດຊອບຮ່ວມກັນ ໃນການແກ້ໄຂບັນຫາໃຫ້ພາກທຸລະກິດ.

ຂ່າວ ພຸດຕີ້: ພາບ ສອນໄຊ

ເສດຖະກິດ -ການຄ້າ