ເມືອງຫົງສາຈັດງານບັນພະຊາສາມະເນນລວມໝູ່ຄັ້ງທີ່ 1

ພິທີຈັດງານບັນພະຊາສາມະເນນລວມໝູ່ຄັ້ງທຳອິດ ຂອງເມືອງຫົງສາ, ໄດ້ຈັດຂຶ້ນໃນຕອນບ່າຍຂອງວັນທີ່ 1 ກໍລະກົດ 2018 ນີ້ ຢູ່ທີ່ວັດບ້ານສີມຸງຄຸນ ເມືອງຫົງສາ, ເປັນກຽດເຂົ້າຮ່ວມງານໃນຄັ້ງນີ້ມີທ່ານ ຄຳເພັດ ພົມມະລາດ ເຈົ້າເມືອງຫົງສາ, ມີພະອາຈານ ມະຫາບຸນທຽນ ພຸດທະວະໂຣ ກຳມະການສູນກາງ ອພສ, ປະທານ ອພສ ແຂວງໄຊຍະບູລີ, ມີປະທານ ອພສ ເມືອງ, ມີຄະນະນຳຂອງເມືອງ, ຄະນະສົງຂອງແຂວງ-ຂອງເມືອງ, ພ້ອມດ້ວຍພາກສ່ວນຕ່າງໆເຂົ້າຮ່ວມຢ່າງພ້ອມພຽງ.

ພິທີດັ່ງກ່າວນີ້ແມ່ນເລີ້ມຕົ້ນດ້ວຍການແຫ່ພະລູກແກ້ວ ຈາກຫ້ອງການບ້ານສີມຸງຄຸນ ເຂົ້າສູ່ວັດ ເພື່ອເປີດພິທີຢ່າງເປັນທາງການ,ໃນໂອກາດນີ້ ທ່ານ ສົມສະນິດ ປ້ອງຄຳ ປະທານແນວລາວສ້າງຊາດເມືອງກໍ່ໄດ້ລາຍງານແຜນການຈັດງານໃນຄັ້ງນີ້ຕໍ່ພິທີ ເຊິ່ງທ່ານໄດ້ກ່າວວ່າ: ຈຸດປະສົງຂອງການຈັດງານໃນຄັ້ງນີ້ກໍ່ແມ່ນເພື່ອເປັນການປະຕິບັດຕາມແຜນການ 5 ປີ ຂອງ ອົງການພຸດທະສາສະໜາສຳພັນລາວ ແຂວງໄຊຍະບູລີ ແລະ ແຜນການປະຈຳປີ 2018 ຂອງ ອົງການພຸດທະສາສະໜາສຳພັນລາວ ເມືອງຫົງສາວາງອອກ,

ພ້ອມທັງເປັນການປົກປັກຮັກສາ ແລະ ສົ່ງເສີມພະພຸດທະສາສະໜາ, ສິລະທັມ ຮີດຄອງປະເພນີອັນດີງາມຂອງລາວໃຫ້ຄົງຢູ່ຕະຫຼອດໄປ ເປັນການເປີດໂອກາດໃຫ້ເຍົາວະຊົນ-ນັກຮຽນ, ໄວໜຸ່ມ ຊາວພຸດທຸກຖ້ວນໜ້າ ໄດ້ມີໂອກາດມາຝຶກຝົນປະພຶດ, ປະຕິບັດຕາມພະທຳຄຳສອນ , ເພື່ອນຳເອົາຫຼັກທຳຄຳສອນດັ່ງກ່າວໄປໝູນໃຊ້ໃຫ້ເກີດປະໂຫຍດໃນຊີວິດປະຈຳວັນ, ທັງເປັນການສ້າງໃຫ້ເຍົາວະຊົນ-ນັກຮຽນເຂົ້າໃຈກ່ຽວກັບພຸດທະສາສະໜາຫຼາຍຂຶ້ນ ເປັນການແກ້ໄຂປະກົດການຫຍໍ້ທໍ້ຕ່າງໆທີ່ຢູ່ໃນສັງຄົມໃຫ້ລົດນ້ອຍຖອຍລົງ ແລະ ເປັນການເຕົ້າໂຮມຄວາມສາມັກຄີຂອງຊາວພຸດທຸກຖ້ວນໜ້າ.

ສາມະເນນທີ່ບວດໃນຄັ້ງນີ້ແມ່ນມາຈາກບ້ານຕ່າງໆຢູ່ພາຍໃນເມືອງຫົງສາ ແລະ ຕ່າງເມືອງມີທັງໝົດ 94 ອົງ, ເປັນບຸກຄົນທີ່ມີຈິດໃຈເຫຼື້ອມໃສສັດທາ, ເຊິ່ງຈະໄດ້ປະຕິບັດກິດຈະກຳຢູ່ວັດສີມຸງຄຸນເປັນເວລາ 7 ວັນ ຫຼັງຈາກນັ້ນຈຶ່ງຈະໄດ້ແບ່ງອອກໄປປະຈຳຢູ່ວັດແຫ່ງຕ່າງໆພາຍໃນເທດສະບານເມືອງເພື່ອສຶກສາຮ່ຳຮຽນຕໍ່ໄປ, ພ້ອມນັ້ນທ່ານ ຄຳເພັດ ພົມມະລາດກໍ່ໃຫ້ກຽດກ່າວເປີດງານຢ່າງເປັນທາງການ ແລະ ລັ່ນຄ້ອງ 9 ບາດເພື່ອເປັນສິລິມຸງຄຸນໃນງານຄັ້ງນີ້ຕື່ມອີກ.

ຂ່າວ: ໄກເພັດ ຄຳມູງແກ້ວ