ທີມງານພະແນກກະສິກຳ ແລະ ປ່າໄມ້ແຂວງໄຊຍະບູລີ ລົງເຄື່ອນໄຫວຊຸກຍູ້ວຽກງານ ຢູ່ ກະສິກຳ ແລະ ປ່າໄມ້ ເມືອງເງິນ

0
104

ວັນທີ 5 ກໍລະກົດ 2018 ຜ່ານມານີ້ ຢູ່ທີ່ຫ້ອງການກະສິກຳ ແລະ ປ່າໄມ້ເມືອເງິນ ແຂວງໄຊຍະບູລີ. ທາງຄະນະທີມງານພະແນກກະສິກຳ ແລະ ປ່າໄມ້ແຂວງ ໄດ້ລົງເຄື່ອນໄຫວຊຸກຍູ້ວຽກງານກະສິກຳ ແລະ ປ່າໄມ້ຢູເມືອງເງິນ, ເຊີ່ງມີຫົວໜ້າຫ້ອງການ – ຫົວໜ້າໜ່ວຍງານ- ພະນັກງານວິຊາການຫ້ອງການກະສິກຳ ແລະ ປ່າໄມ້ເມືອງເງິນ ເຂົ້າຮ່ວມ.

ທ່ານ ທອງສຸກ ຈັນປະເສີດ ກຳມະການພັກເມືອງ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄດ້ລາຍງານສະພາບການຈັດຕັ້ງປະຕິບັດວຽກງານກະສິກຳ ແລະ ປ່າໄມ້ ໃນ 6 ເດືອນຕົ້ນປີ ໄລຍະຜ່ານມາແມ່ນໄດ້ເອົາໃຈໃສ່ເຄື່ອນໄຫວເຮັດໜ້າທີວິຊາສະເພາະດ້ວຍຄວາມຮັບຜິດຊອບສູງ, ໄດ້ລົງໃກ້ສິດຕິດແທດກັບພໍ່ແມ່ປະຊາຊົນ ໃນການຊຸກຍູ້ສົ່ງເສີມການປູກ-ການລ້ຽງ ສະແດງອອກ ການຊຸກຍູ້ການປູກເຂົ້ານາປີ ມາຮອດປະຈຸບັນແມ່ນປັກດຳສຳເລັດ 100% ຂອງເນື້ອທີ 705,48 ຮຕ,

ການປູກພືດລະດູຝົນ ສຳເລັດ 90,68% ຂອງເນື້ອທີ 5.939,15 ຮຕ,ໄດ້ເອົາໃຈໃສ່ເຝົ້າລະວັງ, ປ້ອງກັນການລະບາດຂອງພະຍາດທີ່ຈະເກີດຂື້ນກັບສັດລ້ຽງ ມາຮອດປະຈຸບັນສາມາດສັກຢາວັກຊິນປ້ອງກັນພະຍາດສັດລ້ຽງໄດ້ທັງໝົດ 2.467 ໂຕ ທຽບໃສ່ແຜນການປີ ປະຕິບັດໄດ້ 46%,

ໂອກາດດັ່ງກ່າວ ທ່ານ ຄຳພຸດ ອິນທະວົງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນຳຂອງຫ້ອງການກະສິກຳ ແລະ ປ່າໄມ້ເມືອງ ທີ່ໄດ້ເອົາໃຈໃສ່ຊຸກຍູ້, ຕິດຕາມວຽກງານຂອງຕົນຮັບຜິດຊອບມີຄວາມສຳເລັດ ຈາກນັ້ນ ທີມງານພະແນກກະສິກຳ ແລະ ປ່າໄມ້ແຂວງ ແລະ ທີມງານ ຫ້ອງການກະສິກຳ ແລະ ປ່າໄມ້ເມືອງ ກໍ່ໄດ້ສົນທະນາແລກປ່ຽນບົດຮຽນເຊີ່ງກັນ ແລະ ກັນ, ທັງເປັນການຊຸກຍູ້, ຕິດຕາມກວດກາວຽກງານ ເປັນຕົ້ນແມ່ນວຽກງານປ່າໄມ້, ຊົນລະປະທານ, ລ້ຽງສັດ ແລະ ການປະມົງ, ປູກຝັງ, ແລະ ໜ່ວຍງານ ແຜນການ.

ຂ່າວຍັງໃຫ້ຮູ້ອີກວ່າ ໃນວັນດຽວກັນນີ້ ທາງທີມງານຂອງພະແນກ ກະສິກຳ ແລະ ປ່າໄມ້ແຂວງ ແລະ ທີມງານຫ້ອງການກະສິກຳ ແລະ ປ່າໄມ້ ເມືອງ ກໍ່ໄດ້ລົງຊຸກຍູ້ ຕິດຕາມ ການລ້ຽງໜູ່ພັນຊີ້ນຂອງຟາມ ທ່ານ ຄຳ ສາລີພົມບ້ານ ແກ້ວດອນຄູນ, ຢ້ຽມຢາມການປູກສີໄຄເຄື່ອງ ແລະ ການຜະລິດນ້ຳມັນສີໄຄເຄື່ອງຢູທີ່ບ້ານຫ້ວຍເຜີ້ງ ແລະ ລົງຊຸກຍູ້ຕິດຕາມ, ກວດກາ ການກະກຽມປູກກາເຟ ຢູ່ທີສວນສະຕໍເບີຣີ ເມືອງເງິນ ອີກດ້ວຍ.

ໂດຍ: ອິນແປງ ແຫວນຄຳ