ສື່ມວນຊົນຈາກ 6 ປະເທດ MLC ປະກອບສ່ວນໂຄສະນາກ່ຽວກັບການທ່ອງທ່ຽວລາວ

ສື່ມວນຊົນ ແລະ ພະນັກງານຈາກຂະແໜງການກ່ຽວຂ້ອງຫລາຍກ່ວາ 40 ຄົນ ຈາກ 6 ປະເທດໃນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຫລື MLC ຄື: ກຳປູເຈຍ, ຈີນ, ລາວ, ຫວຽດນາມ, ໄທ ແລະ ມຽນມາ ສືບຕໍ່ ຢ້ຽມຊົມນະຄອນ-ຫຼວງພະບາງ, ແຂວງ ຫລວງພະບາງ ເປັນມື້ທີ່ 2 ໃນວັນທີ 5 ກໍລະກົດ 2018 ນີ້ ໂດຍໄດ້ໄປຢ້ຽມຊົມ 4 ສະຖານທີ່ທ່ອງທ່ຽວສໍາຄັນ ແລະ ມີຊື່ສຽງຂອງລາວ ຄື: ພະທາດພູສີ ຊຶ່ງເປັນສະຖານທີ່ຊົມວິວທິວທັດໄດ້ເຖິງ 360 ອົງສາ ເຫັນໄດ້ຄວາມສວຍງາມທຸກມູມຂອງຕົວເມືອງນະຄອນ-ຫຼວງພະບາງ. ນອກນັ້ນ, ຍັງສາມາດເຫັນທິວທັດທຳມະຊາດຈຸດໄຫຼພົບຂອງສາຍນໍ້າຂອງ ແລະ ສາຍນໍ້າຄານ, ທັງເປັນສະຖານທີ່ຊົມຕາເວັນຕົກດິນທີ່ສວຍງາມ, ກຸ້ມຄ່າກັບການທີ່ຕ້ອງຍ່າງຂື້ນໄປຕາມຂັ້ນໄດສູງຊັນຫລາຍກ່ວາ 300 ຂັ້ນ. ຈາກນັ້ນໄດ້ໄປຢ້ຽມຊົມຫໍພິພິທະພັນແຫ່ງຊາດຫລວງພະບາງ ຕັ້ງຢູ່ເຂດບ້ານຈູມຄ້ອງ ໃຈກາງນະຄອນ-ຫຼວງພະບາງ, ແຕ່ກ່ອນເປັນພະຣາຊຊະວັງເກົ່າຂອງອະດີດເຈົ້າຊີວິດອານາຈັກລາວລ້ານຊ້າງ, ປຸກສ້າງຂຶ້ນຕາມຮູບແບບສະ ຖາປັດຕະຍະກຳຂອງຊາວຝຣັ່ງໃນປີ ຄສ 1904 ຕໍ່ມາໄດ້ຮັບການຕໍ່ເຕີມຍອດຂອງຜາສາດໃຫ້ເປັນຮູບແບບລາວໃນປີ ຄສ1930. ປັດຈຸບັນ ອົງການປົກຄອງແຂວງໄດ້ປັບປຸງບູລະນະໃຊ້ວັງດັ່ງກ່າວເປັນຫໍພິພິທະພັນຂອງແຂວງ ໂດຍໃຊ້ເປັນສະຖານທີ່ສະແດງສິລະປະ ແລະ ພະພຸດທະສາດສະໜາ, ທັງເປັນບ່ອນປະດິດສະຖານຂອງພະບາງທີ່ສິກສິດ ແລະ ເປັນມິ່ງເມືອງຂອງຊາວຫຼວງພະບາງ ກໍຄື ຊາວລາວທົ່ວປະເທດເຊິ່ງປະດິດສະຖານຢູ່ອາຄານໃໝ່ດ້ານຫນ້າ. ຕໍ່ມາໄດ້ໄປຢ້ຽມຊົມວັດຊຽງທອງ ເປັນວັດທີ່ສ້າງຕັ້ງຂຶ້ນໃນ ປີ ຄສ 1560 ໂດຍ ພະເຈົ້າໄຊຍະເສດຖາທິລາດ. ຕັ້ງຢູ່ໃກ້ແຄມແມ່ນ້ຳຂອງ, ເປັນສະຖານທີ່ປັດຕະຍະກຳລັານຊ້າງທີ່ມີຄວາມສວຍງາມແຫ່ງໜຶ່ງໃນຫລວງພະບາງ ແລະ ໄດ້ຮັບລາງວັນຊະນະເລີດການອະນຸລັກມໍລະດົກດີເດັ່ນຂອງໂລກ ທີ່ປະກາດໂດຍອົງການ UNESCO ປະຈຳປີ 2015 ຊຶ່ງຖືເປັນຄັ້ງທຳອິດທີ່ລາວໄດ້ຮັບລາງວັນນີ້. ຈາກນັ້ນ ໄດ້ໄປຢ້ຽມຊົມອຸທິຍານນ້ຳຕົກຕາດກວາງຊີ ເປັນນ້ຳຕົກຕາດໜຶ່ງທີ່ສວຍງາມທີ່ສຸດໃນແຂວງ ຫລວງພະບາງ, ເປັນນ້ຳຕົກຫີນປູນຂະໜາດໃຫຍ່ສູງປະມານ 70 ແມັດ, ມີສາຍນໍ້າໄຫລອາບມາຕາມໜ້າຜາຫີນນ້ອຍໃຫຍ່ ຮູບຊົງແປກຕາລົງສູ່ແອ່ງນ້ຳເບື້ອງລຸ່ມ ແລະ ມີນ້ຳໄຫລຕະຫລອດປີ, ມີປ່າທີ່ມີຄວາມອຸດົມສົມບູນ, ດ້ານລຸ່ມມີຂົວ ແລະ ເສັ້ນທາງຍ່າງຊົມອ້ອມຮອບນ້ຳຕົກ, ທັງສາມາດລົງອາບນ້ຳເຢັນສະບາຍ, ສະເລ່ຍແຕ່ລະມື້ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປທ່ຽວຊົມບໍ່ຕໍ່າກ່ວາ 500 ເທື່ອຄົນ. ການເຄື່ອນໄຫວຢ້ຽມຊົມສະຖານທີ່ທ່ອງທ່ຽວຢູ່ນະຄອນ-ຫລວງພະບາງຂອງຄະນະສື່ມວນຊົນຈາກ 6 ປະເທດ MLC ໃນຄັ້ງນີ້ ນອກຈາກໄດ້ເຫັນສະພາບຕົວຈິງກ່ຽວກັບສະຖານທີ່ທ່ອງທ່ຽວຂອງລາວ ກໍຄື ຢູ່ນະຄອນ-ຫລວງພະບາງ ຍັງເປັນການປະກອບສ່ວນໂຄສະນາສະຖານທີ່ທ່ອງທ່ຽວຂອງລາວໃນໂອກາດປີທ່ອງທ່ຽວລາວ 2018 ເພາະບັນດາສື່ມວນຊົນທີ່ເຂົ້າຮ່ວມກິດຈະກຳຄັ້ງນີ້ ໄດ້ເກັບກຳຂໍ້ມູນເພື່ອຂຽນຂ່າວ ແລະ ບົດປະເພດຕ່າງຯ ເພື່ອເຜີຍແຜ່ຜ່ານສື່ທີ່ຕົນເອງສັງກັດເພື່ອໃຫ້ປະຊາຊົນ ກໍຄື ນັກທ່ອງທ່ຽວພາຍໃນປະເທດຂອງຕົນໄດ້ຮັບຮູ້ຫລາຍຂຶ້ນ ແລະ ຫັນມາທ່ອງທ່ຽວພາຍໃນປະເທດລາວນັບມື້ເພີ່ມຂຶ້ນໃນຕໍ່ໜ້າ.ຂ່າວ: ບຸນຕຽງ ຈັນທະວົງ ຂ່າວສານຫລວງພະບາງ