ເມືອງລະມາມ ເປີດຂະບວນການຕ້ານພະຍາດໄຂ້ຍຸງລາຍ

0
234

• ຂ່າວ-ພາບ : ສັນຍາວັນທີ 6 ກໍລະກົດ 2018 ເມືອງລະມາມແຂວງເຊກອງ ໄດ້ຈັດພິທີເປີດຂະບວນການປຸກລະດົມເພື່ອຕ້ານໄຂ້ຍຸງລາຍ (ໄຂ້ເລືອດອອກ) ຂຶ້ນ ໂດຍການເປັນກຽດເຂົ້າຮ່ວມຂອງທ່ານ ນາງ ຄຳເສັງ ທຸມມະວົງສາ ຮອງເຈົ້າເມືອງໆລະມາມ, ທ່ານ ດຣ. ນາງ ລຳພັນ ໄຊຄຳມີ ຮອງຫົວໜ້າພະແນກສາທາລະນະສຸກແຂວງ, ຄະນະກຳມະການສະເພາະກິດຕ້ານ ແລະຄວບຄຸມພະຍາດໄຂ້ຍຸງລາຍຂັ້ນແຂວງ-ເມືອງ, ອຳນາດການປົກຄອງບ້ານ ແລະປະຊາຊົນ 6 ບ້ານເທສະບານເຂົ້າຮ່ວມຢ່າງຫຼວງຫຼາຍ. ໃນພິທີທ່ານ ດຣ. ກົງສິນ ວົງເສດຖາ ຫົວໜ້າຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກແຂວງເຊກອງ ໄດ້ຍົກໃຫ້ເຫັນສະພາບການລະບາດຂອງພະຍາດໄຂ້ຍຸງລາຍໃນຂອບເຂດທົ່ວປະເທດ ແລະຢູ່ແຂວງເຊກອງ ລວມທັງຂະບວນການເກີດມີຍຸງລາຍ, ການປິ່ນປົວໃນເວລາເປັນໄຂ້ ແລະການຕ້ານ-ຄວບຄຸມ ເພື່ອບໍ່ໃຫ້ມີການແຜ່ລະບາດຂອງພະຍາດດັ່ງກ່າວ. ໂອກາດເຂົ້າຮ່ວມພິທີດັ່ງກ່າວ ທ່ານ ນາງ ຄຳເສັງ ທຸມມະວົງສາ ກໍໄດ້ມີຄຳເຫັນໂດຍຮຽກຮ້ອງໃຫ້ອົງການຈັດຕັ້ງທຸກພາກສ່ວນ, ອຳນາດການປົກຄອງທຸກຂັ້ນຕະຫຼອດຮອດປະຊາຊົນບັນດາເຜົ່າໃນທົ່ວເມືອງລະມາມຂໍຄວາມຮ່ວມໄມ້ຮ່ວມມືໃນການເອົາໃຈໃສ່ການຈັດຕັ້ງປະຕິບັດມາດຕະການຕໍ່ການປ້ອງກັນ ແລະຄວບຄຸມພະຍາດໄຂ້ຍຸງລາຍ ໂດຍໃຫ້ພ້ອມກັນທຳລາຍໜອນນ້ຳຍຸງລາຍດ້ວຍການຜັດຖູ ແລະລ້າງທຸກໆພາຊະນະທີ່ເກັບນ້ຳໃຊ້ພາຍໃນເຮືອນ ແລະສຳນັກງານຂອງທ່ານ, ໝັ່ນປ່ຽນນ້ຳໃນຖ້ວຍຮອງຕີນຕູ້, ເຕົ້າດອກໄມ້ ແລະອື່ນໆທີ່ເປັນບ່ອນຂັງນ້ຳໄດ້ເຖິງ 1 ອາທິດ ໂດຍໃຫ້ປະຕິບັດເປັນປະຈຳໃນທຸກໆ 7 ວັນ. ຈາກນັ້ນ ກໍເຮັດອະນາໄມເດີ່ນບ້ານ ແລະສຳນັກງານອົງການ, ທຳລາຍທຸກພາຊະນະທີ່ບໍ່ເປັນປະໂຫຍດເຊັ່ນ: ກະໂປະ, ກະປ໋ອງ, ຢາງຕີນລົດທີ່ບໍ່ໄດ້ໃຊ້ ແລະສິ່ງເສດເຫຼືອອື່ນໆ, ພ້ອມນີ້ໃນເມື່ອຮູ້ຕົນເອງ ຫຼື ລູກຫຼານ-ຍາດພີ່ນ້ອງເປັນໄຂ້ ແມ່ນໃຫ້ຮີບຟ້າວໄປກວດ ແລະຮັບການປິ່ນປົວນຳທ່ານໝໍຢູ່ຕາມໂຮງໝໍທີ່ໃກ້ກັບບ້ານທ່ານໂດຍໄວ ແລະຫຼີກລ້ຽງຢ່າງເດັດຂາດໃນການຊື້ຢາມາປິ່ນປົວດ້ວຍຕົນເອງຖ້າບໍ່ດັ່ງນັ້ນຈະເປັນສາເຫດຂອງການເສຍຊີວິດໄດ້.