ລັດຖະບານກຳລັງພິຈາລະນາ ຊື້ໂຄງການທາງເລກທີ 16 ຄືນ! ປະຊາຊົນດີໃຈແທ້ໆ (ອ່ານແຈ້ງການ)

0
482

ຈຳປາສັກ: ແຫຼ່ງຂ່າວ ຈາກແຂວງຈຳປາສັກ ລາຍງານໃຫ້ຮູ້ວ່າ, ປະຊາຊົນ ທີ່ຊົມໃຊ້ ເສັ້ນທາງ ເລກທີ 16 ແຕ່ຂົວປາກເຊ ຫາ ດ່ານວັງເຕົ່າ, ຕ່າງມີຄວາມຫວັງ ແລະ ດີໃຈ ເມື່ອລັດຖະບານ ກຳລັງເລັ່ງແກ້ໄຂ ແລະ ອາດຈະມີການ ຊື້ໂຄງການທາງດັ່ງກ່າວ ຄືນຈາກ ເອກະຊົນ ກໍ່ຄື ບໍລິສັດ ດວງດີ ກໍ່ສ້າງ-ຂົວທາງ ຈຳກັດ.

ເສັ້ນທາງເລກທີ 16, ດ່ານເກັບເງິນ

ເຊິ່ງອີງຕາມແຈ້ງການເລກທີ 965/ຫສນຍ.ກລຂ ລົງວັນທີ 27 ມິຖຸນາ 2018, ລັດຖະມົນຕີ ປະຈຳສຳນັກງານນາຍົກລັດຖະມົນຕີ ໄດ້ສົ່ງເຖິງ ກະຊວງການເງິນ, ກະຊວງໂຍທາທິການ ແລະ ຂົນສົ່ງ, ກະຊວງແຜນການແລະການລົງທຶນ, ທະນາຄານກາງ ແລະ ເຈົ້າແຂວງຈຳປາສັກ.

ຄ່າທາງຂອງລົດແຕ່ລະປະເພດ

ໂດຍແຈ້ງການມືເນື້ອໃນໃຫ້ມີການກວດກາ ໂຄງການ 2 ໂຄງການຫຼັກ ຄືທາງເລກທີ 16 (ຂົວປາກເຊ ຫາ ຊາຍແດນວັງເຕົ່າ ) ແລະ ທາງເລກທີ 16 (ແຕ່ແຍກສາລາຂຽວ ຫຼັກ 9 ຫາທາງແຍກ ເລກທີ 16  A ເມືອງປາກຊ່ອງ).

ໃນແຈ້ງການດັ່ງກ່າວ ມີເນື້ອໃນສຳຄັນ 2​ ປະເດັນຄື

  1. ໃຫ້ພາກສ່ວນກ່ຽວຂອງ ລົງກວດການ ໂຄງການຕົວຈິງ ແລະ ງົບປະມານທີ່ໃຊ້ຕົວຈິງ ຂອງການສ້າງທາງເລກທີ 16 (ທາງແຕ່ຂົວປາກເຊ ຫາ ດ່ານວັງເຕົ່າ) ໂດຍຈະພິຈະລະນະ ໃຫ້ລັດຖະບານ ຊື້ຄືນໂຄງການ.
  2. ເສັ້ນທາງ ເລກທີ 16 (ແຕ່ແຍກສາລາຂຽວ ຫຼັກ 9 ຫາທາງແຍກ ເລກທີ 16  A ເມືອງປາກຊ່ອງ) ແມ່ນໃຫ້ກວດຄືນ ການກໍ່ສ້າງໂຄງການ ແລະ ມູນຄ່າ ແລະ ສົ່ງລາຍງານໃຫ້ ລັດຖະບານ ພິຈາລະນາ.

 

ຈາກການແຈ້ງຂ່າວດັ່ງກ່າວ ເຮັດໃຫ້ປະຊາຊົນ ໂດຍສະເພາະ ຜູ່ທຽວທາງ ແຕ່ເລກ ທີ 16 ໄປຫາດ່ານວັງເຕົ່າ ຕ່າງມີຄວາມຫວັງ ແລະ ດີໃຈ ທີ່ລັດຖະບານເຫັນໄດ້ ຄວາມລໍາບາກ ແລະ ພາລະ ທີ່ປະຊາຊົນ ແລະ ບັນດາຜູ່ປະກອບການ ທີ່ຕ້ອງແບກຫາບພາລະໃນການເສຍຄ່າທາງ ດັ່ງກ່າວ. ເພາະທາງດັ່ງກ່າວບໍ່ແມ່ນການສ້າງທາງໃໝ່ ເປັນພຽງການສ້ອມແປງ ທີ່ເກົ່າ ທາງເດີມ ທີ່ມີມາຢູ່ແລ້ວ, ເຊິ່ງການເກັບຄ່າທາງດັ່ງກ່າວ ໄດ້ສົ່ງຜົນກະທົບ ຕໍ່ປະຊາຊົນ ແລະ ການທ່ອງທ່ຽວ, ການຂົນສົ່ງສິນຄ້າ ໃນເຂດນີ້.

ປະຊາຊົນ ກໍ່ຝາກຄວາມຫວັງ ກັບລັດຖະບານ ທີ່ຈະແກ້ໄຂ ແລະ ໃຫ້ສາມາດ ນໍາໃຊ້ເສັ້ນທາງດັ່ງກ່າວ ຄືທາງທົ່ວໄປ ທີ່ບໍ່ຕ້ອງຈ່າຍຄ່າຜ່ານທາງ.

ຂໍ້ມູນຈາກ: ສື່ຂ່າວ ແຂວງຈຳປາສັກ ແລະ ນັກຂ່າວສັນຈອນ