ການເງິນຫົງສາສະຫຼຸບວຽກງານ 2017 ແລະ ແຜນ 2018

0
102

ຫ້ອງການການເງິນ ເມືອງຫົງສາ ແຂວງໄຊຍຍະບູລີ ສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2017 ແລະ ແຜນງົບປະມານແຫ່ງລັດ ປີ 2018

ກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2017 ແລະ ແຜນງົບປະມານແຫ່ງລັດ ປີ 2018 ຢູ່ເມືອງຫົງສາ ໄດ້ຈັດຂຶ້ນໃນຕອນເຊົ້າຂອງວັນທີ 24 ມັງກອນ 2018 ຢູ່ທີ່ຫ້ອງປະຊຸມໃຫຍ່ຂອງເມືອງ ໂດຍການເປັນປະທານຂອງທ່ານ ພອນສະຫວັນ ໄຊສົມພັນ ຮອງເຈົ້າເມືອງໆຫົງສາ, ມີຫົວໜ້າຫ້ອງການ, ນາຍບ້ານ, ຜູ້ປະກອບການ ພ້ອມດ້ວຍພະນັກງານຄຸ້ມຄອງການເງິນຂອງແຕ່ລະຫ້ອງການ, ບ້ານ ພາຍໃນເມືອງເຂົ້າຮ່ວມຢ່າງພ້ອມພຽງ.

ກອງປະຊຸມທ່ານ ແຫຼ້ທອງ ພົມມະຈິດ ຫົວໜ້າຫ້ອງການການເງິນເມືອງ ກໍ່ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2017 ແລະ ແຜນງົບປະມານແຫ່ງລັດ ປີ 2018, ເຊິ່ງໃນສົກງົບປະມານປີ 2017 ເມືອງຫົງສາໄດ້ຮັບຕົວເລກແຜນລາຍຮັບເບື້ອງຕົ້ນທັງໝົດ 18,20 ຕື້ກີບ ທຽບໃສ່ປີຜ່ານມາເພີ້ມຂຶ້ນ 11,65%, ໃນນັ້ນແຜນລາຍຮັບຈາກສ່ວຍສາອາກອນ 18 ຕື້ກີບ, ແຜນລາຍຮັບຈາກຊັບສິນຂອງລັດ 200 ລ້ານກີບ, ຜ່ານການຈັດຕັ້ງປະຕິບັດຕົວຈິງ ສາມາດຈັດເກັບລາຍຮັບບເຂົ້າງົບປະມານໄດ້ທັງໝົດ 16,66 ຕື້ກີບ, ເທົ່າກັບ 91,56% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເທົ່າກັບ 97,09%,

ໃນນັ້ນຮັບຈາກສ່ວຍສາອາກອນປະຕິບັດໄດ້ 16,52 ຕື້ກີບ, ເທົ່າກັບ 91,82% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເທົ່າກັບ 97,44%, ຮັບຈາກການຄຸ້ມຄອງຊັບສິນຂອງລັດປະຕິບັດໄດ້ 136,78 ລ້ານກີບ ເທົ່າກັບ 68,39% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເທົ່າກັບ 67,53%, ສ່ວນແຜນລາຍຈ່າຍປີ 2017 ມີທັງໝົດ 13,64 ຕື້ກີບ, ປະຕິບັດຈ່າຍຕົວຈິງໄດ້ທັງໝົດ 12,96 ຕື້ກີບ ເທົ່າກັບ 95,02% ຂອງແຜນການປີ, ໃນນັ້ນຈ່າຍເງິນເດືອນ 6,49 ຕື້ກີບ, ຈ່າຍອຸດໜູນຕ່າງໆ 1,84 ຕື້ກີບ, ຈ່າຍເງິນບໍລິຫານ 2,69 ຕື້ກີບ, ຈ່າຍດັດສົມສົ່ງເສີມ 453,34 ລ້ານກີບ, ຈ່າຍຊື້ໃໝ່ 31,10 ລ້ານກີບ ແລະ ຈ່າຍການລົງທຶນ 1,45 ຕື້ກີບ,

ເຊິ່ງໃນປີ 2017 ຜ່ານມາ ເມືອງຫົງສາເປັນເມືອງເກັບລາຍຮັບໄດ້ເກີນດູນ ເຊິ່ງໄດ້ປະຕິບັດດຸ່ນດຽງໃຫ້ແຂວງໄດ້ຕົວຈິງທັງໝົດ 3,69 ຕື້ກີບ, ເທົ່າກັບ 80,92% ຂອງແຜນການ, ພ້ອມດຽວກັນນີ້ ຜູ້ເຂົ້າຮ່ວມກໍ່ໄດ້ຮັບຟັງການຜ່ານຄຳແນະນຳເພີ່ມເຕີມຂອງທ່ານເຈົ້າແຂວງໄຊຍະບູລີ ສະບັບເລກທີ 002/ຈຂຊຍ, ລົງວັນທີ 10 ມັງກອນ 2018 ວ່າດ້ວຍການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2018 ແລະ ຮັບຟັງການປະກອບຄຳຄິດຄຳເຫັນຈາກພາກສ່ວນຕ່າງໆທີ່ເຂົ້າຮ່ວມຢ່າງກົງໄປກົງມາ, ໃນໂອກາດດຽວກັນນີ້ກອງປະຊຸມກໍ່ໄດ້ມອບໃບຍ້ອງຍໍໃຫ້ 8 ຫ້ອງການ ແລະ 2 ບ້ານທີ່ຈັດເກັບລາຍຮັບມອບເຂົ້າງົບປະມານໄດ້ເກີນແຜນ, ພ້ອມທັງຮັບການໂອ້ລົມຈາກປະທານກອງປະຊຸມຕື່ມອີກ.

ຂ່າວ: ບຸນປອນ ສຸກສົມບັດ