8 ໜ່ວຍພັກ ໄດ້ຮັບໃບຢັ້ງຢືນໜ່ວຍພັກເຂັ້ມແຂງ-ຮູ້ນໍາພາຮອບດ້ານ

ຈໍາປາສັກ: 8 ໜ່ວຍພັກ ປະກອບມີ ໜ່ວຍພັກຮາກຖານວິທະຍາໄລການເງິນພາກໃຕ້ ແລະ 7ໜ່ວຍພັກທີ່ຂຶ້ນກັບຄະນະພັກຮາກຖານພະແນກພະລັງງານ ແລະ ບໍ່ແຮ່ ແຂວງຈໍາປາສັກ ຄື: ໜ່ວຍພັກພະແນກພະລັງງານ ແລະ ບໍ່ແຮ່, ໜ່ວຍພັກຄຸ້ມຄອງບໍລິການ, ໜ່ວຍພັກບໍລິຫານທຸລະກິດ, ໜ່ວຍພັກເຕັກນິກ, ໜ່ວຍພັກເຂື່ອນໄຟຟ້າແຊລະບໍາ, ໜ່ວຍພັກຫ້ອງການຄຸ້ມຄອງລະບົບສາຍສົ່ງ ແລະ ໜ່ວຍພັກກອງກໍ່ສ້າງ – ຕິດຕັ້ງໄຟຟ້າ ພາກໃຕ້(ກຕພ)ໄດ້ຮັບໃບຢັ້ງຢືນເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານປະຈໍາປີ 2017.

ພິທີມອບໃບຢັ້ງຢືນໃຫ້ 8 ໜ່ວຍພັກດັ່ງກ່າວຈັດຂຶ້ນທ້າຍເດືອນມິຖຸນາ 2018 ທີ່ຜ່ານມາ, ໜ່ວຍພັກຮາກຖານວິທະຍາໄລການເງິນ ຈັດຂຶ້ນຢູ່ສະໂມສອນວິທະຍາໄລດັ່ງກ່າວໂດຍການເຂົ້າຮ່ວມຂອງ ສະຫາຍ ນິພອນ ວຽງປະເສີດຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ສະຫາຍ ນາງ ບຸນເພັງ ພົມມາພັກດີ ຮັກສາການເລຂາໜ່ວຍພັກ ຮັກສາການຜູ້ອໍານວຍການວິທະຍາໄລການເງິນພາກໃຕ້.

ພິທີມອບໃບຢັ້ງຢືນໃຫ້ 7 ໜ່ວຍພັກທີ່ຂຶ້ນກັບຄະນະພັກຮາກຖານພະແນກພະລັງງານ ແລະ ບໍ່ແຮ່ແຂວງ ຈັດຂຶ້ນຢູ່ຫ້ອງການ ກຕພ ໂດຍການເຂົ້າຮ່ວມຂອງ ສະຫາຍ ພອນໄຊ ເກດມາລາ ຮອງຫົວໜ້າຄະນະຈັດຕັ້ງແຂວງ, ສະຫາຍ ແກ້ວ ສີລິສະຫວັດ ເລຂາຄະນະພັກຮາກຖານ ຫົວໜ້າພະແນກພະລັງງານ ແລະ ບໍ່ແຮ່ແຂວງ. ມີຄະນະກໍາມະການປະເມີນໜ່ວຍພັກເຂັ້ມແຂງ-ຮູ້ນໍາພາຮອບດ້ານຂັ້ນແຂວງ, ຄະນະພັກ-ຄະນະພະແນກ, ຄະນະອໍານວຍການ, ເລຂາ-ຮອງເລຂາໜ່ວຍພັກ ພ້ອມດ້ວຍສະມາຊິກພັກສົມບູນໃນແຕ່ລະໜ່ວຍພັກເຂົ້າຮ່ວມ.

ໃນພິທີ ແຕ່ລະພາກສ່ວນ ໄດ້ຂຶ້ນຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດແຜນການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ຂອງແຕ່ລະໜ່ວຍພັກໃນປີ 2017 ທີ່ຜ່ານມາ ໂດຍຍົກໃຫ້ເຫັນຜົນສໍາເລັດໃນຈັດຕັ້ງປະຕິບັດວຽກງານແຕ່ລະດ້ານ.ສໍາລັບດ້ານການຈັດຕັ້ງ, ໜ່ວຍພັກຮາກຖານວິທະຍາໄລການເງິນພາກໃຕ້ ມີສະມາຊິກພັກທັງໝົດ 36 ສະຫາຍ, ຍິງ 18 ສະຫາຍ, ສະມາຊິກພັກສໍາຮອງ 4 ສະຫາຍ, ຍິງ 3 ສະຫາຍ. ສ່ວນ 7 ໜ່ວຍພັກທີ່ຂຶ້ນກັບຄະນະພັກຮາກຖນພະແນກພະລັງງານ ແລະ ບໍ່ແຮ່ແຂວງມີສະມາຊິກພັກທັງໝົດ133 ສະຫາຍ, ຍິງ 23 ສະຫາຍ, ສະມາຊິກພັກສໍາຮອງ 9 ສະຫາຍ, ຍິງ 2 ສະຫາຍ. ພ້ອມນີ້ແຕ່ລະພາກສ່ວນຍັງໄດ້ຜ່ານທິດທາງແຜນການປີ 2018 ຕື່ມອີກ.

ຈາກນັ້ນ ສະຫາຍ ນິພອນ ວຽງປະເສີດຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ກໍ່ໄດ້ໃຫ້ກຽດມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນໍາພາຮອບດ້ານ ໃຫ້ແກ່ໜ່ວຍພັກຮາກຖານວິທະຍາໄລການເງິນພາກໃຕ້. ສ່ວນ 7ໜ່ວຍພັກທີ່ຂຶ້ນກັບຄະນະພັກຮາກຖານພະແນກພະລັງງານ ແລະ ບໍ່ແຮ່ແຂວງ,ໃຫ້ກຽດມອບໃບຢັ້ງຢືນ ໂດຍ ສະຫາຍ ພອນໄຊ ເກດມາລາ ຮອງຫົວໜ້າຄະນະຈັດຕັ້ງແຂວງ. ຕອນທ້າຍພິທີ ສະຫາຍຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ແລະ ສະຫາຍ ຮອງຫົວໜ້າຄະນະຈັດຕັ້ງແຂວງ ກໍ່ໄດ້ໃຫ້ກຽດໂອ້ລົມຊີ້ທິດເຍືອງທາງຕື່ມອີກ.

*** ຂ່າວ: ທູນທອງໃຈ, ພາບ : ມີນາ ***

Champamai Newspaper