ເມືອງເງິນ ຈັດກອງປະຊຸມປ້ອງກັນຄວບຄຸມພະຍາດໄຂ້ເລືອດອອກ

ກອງປະຊຸມປ້ອງກັນຄວບຄຸມພະຍາດໄຂ້ເລືອດອອກ ແລະ ແກ້ໄຂບັນຫາວຽກງານສັກຢາ ໄດ້ຈັດຂື້ນໃນ ວັນທີ 11 ກໍລະກົດ 2018 ນີ້ ຢູ່ທີ່ສະໂມສອນ ເມືອງເງິນ ແຂວງ ໄຊຍະບູລີ ພາຍໃຕ້ການເປັນປະທານຂອງທ່ານ ດຣ ບຸນເລືອນບົວໄລ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງເງິນ, ເຂົ້າຮ່ວມເປັນກຽດມີ ທ່ານ ບຸນສົດ ອິນທະປັນຍາ ຮອງເລຂາພັກເມືອງ ຮອງເຈົ້າເມືອງ, ມີຄະນະປະກຳມະການປ້ອງກັນຄວບຄຸ້ມພະຍາດໄຂ້ເລືອດອອກຂັ້ນເມືອງ,ມີ ຫົວໜ້າຫ້ອງການ, ກົມກອງ, ຫົວໜ້າສຸກສາລາ, ເລຂາໜ່ວຍພັກນາຍບ້ານ, ນັກທຸລະກິດຜູ້ປະກອບການເຂົ້າຮ່ວມ.

ທ່ານ ຄຳມີ ສີວົງສາ ຜູ້ຮັບຜິດຊອບວຽກງານປ້ອງກັນ ແລະ ຄວບຄຸມພະຍາດໄຂ້ເລືອດອອກ ໄດ້ຂື້ນຜ່ານບົດສະຫຼຸບ ການຈັດຕັ້ງປະຕິບັດວຽກງານດັ່ງກ່າວໃນໄລຍະ 6 ເດືອນຜ່ານມາ ໄດ້ເອົາໃຈໃສ່ເຄື່ອນໄຫວໂຄສະນາສຸຂະສຶກສາ ໃຫ້ປະຊາຊົນບັນດາເຜົ່າພາຍໃນເມືອງ ເພື່ອລຸດຜ່ອນຄວາມສຽງຕໍ່ການລະບາດໄຂ້ເລືອດອອກ ແລະ ຮັບປະກັນອັດຕາການປົກຄຸມສັກຢາກັນພະຍາດໄດ້ບັນລຸເປົ້າໜາຍ ກອງປະຊຸມໄດ້ພອ້ມກັນຂື້ນປະກອບຄຳຄິດເຫັນໂດຍສະເພາະແມ່ນວິທີຕ້ານ ແລະ ຕອບໂຕ້ພະຍາດໄຂ້ຍຸງລາຍ 6 ເດືອນທ້າຍປີ

ສຶບຕໍ່ໂຄສະນາສຸຂະສຶກສາໃຫ້ແຕ່ລະບ້ານສຳນັກງານອົງການອອ້ມຂ້າງເມືອງ,ເພີ່ມທະວີຄວາມເປັນເຈົ້າການໃນການຈັດກິດຈະກຳທຳລາຍແຫຼ່ງເພາະພັນໜອນນ້ຳຍຸງລາຍ,ພ້ອມກັນປຸກລະດົມໃຫ້ປະຊາຊົນນຳເອົາລູກຫຼານມາສັກຢາກັນພະຍາດ ຕອນທ້າຍຂອງກອງຫະຊຸມ ເລຂາໜ່ວຍພັກ ນາຍບ້ານເທດສະບານເມືອງກໍ່ໄດ້ຂື້ນເຊັນບົດບັນທຶກຂໍ້ແຂງຂັນ ການສະກັດກັ້ນ ແລະ ຄວບຄຸມພະຍາດໄຂ້ເລືອດອອກ ໃຫ້ປະຕິບັດຕາມ 5 ປໍ ຂອງກະຊວງສາທາລະນະສຸກວາງອອກ ໃຫ້ເຂັ້ມງວດ.

ໂດຍ: ສຸລິຍາ ແສງເດືອນ