ນະຄອນຫລວງ ສ້າງໂຮງຮຽນຂຽວສະອາດ ແລະ ສິ່ງແວດລ້ອມດີ ໄດ້ 103 ແຫ່ງ

ກອງ​ປະ­ຊຸມ​ຜູ້​ບໍ­ລິ­ຫານ​ການ​ສຶກ​ສາ ແລະ ກີ­ລາ ຂັ້ນ​ນະ­ຄອນ­ຫຼວງ​ວຽງ​ຈັນ ປະ­ຈຳ​ສົກ­ຮຽນ 2017-2018 ຈັດ​ໃນ​ວັນ​ທີ 10-11 ກໍ­ລະ­ກົດ 2018 ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ເປັນ​ປະ­ທານ​ຂອງ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ທ່ານ ຄຳ​ຜາຍ ສີ​ສະ­ຫວັນ ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ບັນ­ດາ​ທ່ານ​ຫົວ­ໜ້າ​ພະ​ແນກ ຮອງ​ພະ​ແນກ ພ້ອມ​ດ້ວຍ​ທ່ານ​ເຈົ້າ­ເມືອງ ຮອງ​ເຈົ້າ­ເມືອງ ແຂກ​ຖືກ​ເຊີນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ເພື່ອ​ພ້ອມ​ກັນ​ສະ­ຫຼຸບ​ຕີ​ລາ­ຄາ​ຄືນ​ຜົນ​ຂອງ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ການ​ສຶກ​ສາ ປະ­ຈຳ​ສົກ­ຮຽນ 2017-2018 ແລະ ຄົ້ນ­ຄວ້າ​ປະ­ກອບ​ຄຳ​ເຫັນ​ໃສ່​ຮ່າງ​ແຜນ​ພັດ­ທະ­ນາ​ການ​ສຶກ​ສາ​ຂອງ​ສົກ­ຮຽນ 2018-2019 ພ້ອມ​ນັ້ນ ຈະ​ໄດ້​ພ້ອມ​ກັນ​ປະ­ກອບ​ຄຳ​ຄິດ​ຄຳ​ເຫັນ​ຄົ້ນ­ຄວ້າ​ເຈາະ​ຈີ້ມ​ລົງ​ເລິກ​ໃນ​ບາງ​ວຽກ​ງານ​ທີ່​ຕ້ອງ​ເອົາ­ໃຈ­ໃສ່​ໃນ​ການ​ປັບ­ປຸງ​ຄຸ­ນະ­ພາບ ແລະ ປະ­ສິດ­ທິ­ພາບ​ຂອງ​ການ​ສຶກ​ສາ ເຊັ່ນ​ຜົນ­ງານ​ການ​ສ້າງ​ນັກ­ກີ­ລາ​ພອນ​ສະ­ຫວັນ ບົດ­ຮຽນ​ຕົວ​ແບບ​ທາງ​ດ້ານ​ສິ­ລະ​ປະ ຜົນ­ສຳ­ເລັດ​ການ​ສົ່ງ­ເສີມ​ຫ້ອງ​ອ່ານ ການ​ສຶກ​ສາ​ໃນ​ການ​ຄຸ້ມ​ຄອງ​ບໍ­ລິ­ຫານ​ການ​ເງິນ​ຢູ່​ໃນ​ຂົງ­ເຂດ​ວຽກ​ງານ​ການ​ສຶກ​ສາ

ຜົນ­ສຳ­ເລັດ​ວຽກ​ງານ​ບຳ­ລຸງ​ຍົກ​ລະ­ດັບ​ການ​ສຶກ​ສາ​ຊັ້ນ​ມັດ­ທະ­ຍົມ​ຕອນ​ປາຍ ຜົນ­ງານ​ການ​ສົ່ງ­ເສີມ​ສຸ­ຂະ­ພາບ ແລະ ສິ່ງ​ແວດ ລ້ອມ​ດີ​ໃນ​ໂຮງ­ຮຽນ ແລະ ພິ­ທີ​ມອບ​ທຸງ​ຂຽວ ແລະ ໃບ​ຍ້ອງ­ຍໍ​ຂັ້ນ​ເຈົ້າ​ຄອງ ນວ ແລະ ຂັ້ນ​ພະ​ແນກ​ສຶກ​ສາ​ທິ​ການ ແລະ ກີ­ລາ ໃຫ້​ແກ່​ໂຮງ­ຮຽນ​ທີ່​ມີ​ຜົນ­ງານ​ດີ­ເດັ່ນ​ໃນ​ການ​ສ້າງ​ໂຮງ­ຮຽນ​ຂຽວ​ສະ­ອາດ ແລະ ສິ່ງ­ແວ­ດລ້ອມ​ດີ ປັດ­ຈຸ­ບັນ​ມີ​ທັງ​ໝົດ 103 ແຫ່ງ ໄດ້​ຮັບ​ການ​ຍ້ອງ­ຍໍ​ຂັ້ນ ນວ 34 ແຫ່ງ ໄດ້​ຮັບ​ລາ­ງວັນ​ອາ​ຊຽນ 4 ແຫ່ງ ພ້ອມ​ດຽວ​ກັນ ສູນ​ສຶກ​ສາ​ນອກ​ໂຮງ­ຮຽນ​ເມືອງ​ນາ​ຊາຍ​ທອງ ມີ 3 ສາ­ຂາ​ວິ­ຊາ ຄື: ຕັດ­ຫຍິບ ເສີມ​ສວຍ ແລະ ວິ­ຊາ​ປຸງ​ແຕ່ງ ເຝິກ­ອົບ­ຮົມ​ວິ­ຊາ​ຊີບ ແລະ ຄອມ​ພີວ​ເຕີ ຈຳ­ນວນ 316 ຄົນ ຍິງ 208 ຄົນ ສູນ​ສຶກ​ສາ​ຮຽນ​ຮູ້​ຊຸມ​ຊົນ 9 ແຫ່ງ ມີ​ຈຳ­ນວນ​ພົນ 563 ຄົນ ຍິງ 346 ຄົນ ສຳ­ເລັດ​ການ​ເຝິກ­ອົບ­ຮົມ ການ​ບໍ­ລິ­ຫານ ໂດຍ​ເນັ້ນ​ໃສ່​ໂຮງ­ຮຽນ​ເປັນ​ຫຼັກ ໃຫ້​ຜູ້­ອຳ­ນວຍ­ການ​ໂຮງ­ຮຽນ​ປະ­ຖົມ​ພາກ​ລັດ 375 ຄົນ ແລະ ຄະ­ນະ​ພັດ­ທະ­ນາ​ການ​ສຶກ​ສາ​ຂັ້ນ​ບ້ານ 962 ຄົນ.

ພາບ-ຂ່າວ: ນສພ ວຽງຈັນໃຫ່ມ