ພະນັກງານ-ລັດຖະກອນ ພະແນກ (ຮສສ.ນວ) ຮ່ວມກັບ ຄອບຄົວ ອະດີດເຈົ້າຄອງ ນວບໍລິຈາກເຄື່ອງອຸປະໂພກບໍ­ລິໂພກ

ເພື່ອເປັນການແບ່ງປັນຄວາມສຸກ ແລະ ນໍ້າໃຈຊ່ວຍເຫຼືອຜູ້ດ້ອຍໂອກາດ ທັງເປັນການສ້າງຂະບວນການຄຳນັບຮັບຕ້ອນວັນສ້າງຕັ້ງສະຫະພັນແມ່ຍິງລາວ ຄົບຮອບ 63 ປີ (20 ກໍລະກົດ 1945-20 ກໍລະກົດ 2018) ທີ່ຈະມາເຖິງໃຫ້ມີບັນຍາກາດຟົດຟື້ນ.

ໃນວັນທີ 6 ກໍລະກົດ 2018ຜ່ານມານີ້, ທີ່ສູນສັງຄົມສົງເຄາະ ບ້ານສົມສະຫງ່າ ເມືອງໄຊເຊດຖາ , ນະຄອນຫຼວງວຽງຈັນ. ໄດ້ບໍລິຈາກເຄື່ອງອຸປະໂພກບໍ­ລິໂພກ (ອາຫານ ນ້ຳດື່ມ ເຂົ້າໜົມ ໝີ່ ແລະ ເຄື່ອງນຸ່ງຫົ່ມ) ລວມມູນຄ່າເປັນເງິນຈຳນວນ 5 ລ້ານກວ່າກີບ ເພື່ອນຳໄປມອບໃຫ້ຄົນບ້າໄບ້-ເສຍຈິດທີ່ຕິດພັນກັບການຂໍທານ ຢູ່ສູນສັງຄົມສົງເຄາະ ບ້ານສົມສະຫງ່າ ເມືອງໄຊເຊດຖາ ນວ, ຕາງໜ້າພະນັກງານ-ລັດຖະກອນ ພະແນກ ຮສສ . ນວ ໂດຍ ທ່ານ ນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ (ຮສສ.ນວ) ແລະ ທ່ານນາງ ພາສີ ພິລາວົງ ພັນລະຍາ ທ່ານ ຄຳປານ ພິລາວົງ ອະດີດເຈົ້າຄອງ ນວ.

ໃນພິທີ ທ່ານ ນ. ລໍາພອຍ ສີອັກຄະຈັນ ກ່າວວ່າ: ສູນສັງຄົມສົງເຄາະ ແມ່ນສູນໜຶ່ງທີ່ຂຶ້ນກັບພະແນກ ຮສສ.ນວ ເຊິ່ງໄດ້ເຕົ້າໂຮມເອົາຄົນບ້າໄບ້-ເສຍຈິດທີ່ຕິດພັນກັບການຂໍທານ ມາດຳລົງຊີວິດຢູ່ສູນແຫ່ງນີ້ ເພື່ອແນ່ໃສ່ຫຼຸດຜ່ອນພາລະຂອງຄອບຄົວ ກໍ່ຄື ສັງຄົມ ປັດຈຸບັນສູນສັງຄົມສົງເຄາະມີຂໍ­ທານ ບ້າໄບ້-ເສຍຈິດ 200 ກວ່າຄົນ ໂດຍມີພະນັກງານຂອງພະແນກ ຮສສ.ນວ ປະຈໍາ, ທ່ານໝໍຈາກພະແນກສາທາລະນະສຸກ , ພະນັກງານຈາກກອງບັນຊາການ ປກສ ນວ ແລະ ອ້າຍລ້ຽງຈຳນວນໜຶ່ງເປັນຜູ້ດູແລເບິ່ງແຍງ ຮັກສາສຸຂະພາບ ແລະ ຮັກສາຄວາມປອດໄພ, ເຊິ່ງໃນໄລຍະຜ່ານມາພວກເຮົາກໍ່ພົບຄວາມຫຍຸ້ງຍາກ ໂດຍສະເພາະ ງົບປະມານໃນການລ້ຽງດູແມ່ນມີຈຳກັດ, ທາງພະແນກ ຮສສ. ນວ ພວກເຮົາກໍ່ໄດ້ເອົາໃຈໃສ່ປຸກລະດົມທົ່ວສັງຄົມ ໂດຍສະເພາະ ນັກທຸລະກິດ ພະນັກງານ ອາວຸໂສ-ບຳນານ ຫຼື ບັນດາທ່ານຜູ້ທີ່ໃຈບຸນ ຕ້ອງການປະກອບສ່ວນຊ່ວຍເຫຼືອບໍລິຈາກ ເພື່ອມາລ້ຽງດູ ເປັນຕົ້ນແມ່ນ ອາຫານແຫ້ງ ວັດຖຸປັດໄຈ ເຄື່ອງນຸ່ງຫົ່ມ ເພື່ອນຳມາຊ່ວຍເຫຼືອເຂົາເຈົ້າ ດ້ວຍ./

( ເພັດສະໄໝ )