ກອງທຶນຫຼຸດຜ່ອນຄວາມທຸກຍາກ ໃຊ້ທຶນ 385 ລ້ານກ່ວາກີບ ສ້າງຫໍພັກນັກຮຽນໃຫ້ແກ່ ມັດທະຍົມສົມບູນ ປາກແຊງ

0
68

ພິທີມອບ-ຮັບຫໍພັກນັກຮຽນໃຫ້ແກ່ໂຮງຮຽນ ມັດທະຍົມສົມບູນ ປາກແຊງ ໄດ້ຈັດຂື້ນຕອນເຊົ້າຂອງວັນທີ່ 10 ກໍລະກົດ 2018 ຢູ່ທີ່ໂຮງຮຽນ ມັດທະຍົມສົມບູນ ປາກແຊງ,ກຸ່ມພັດທະນາບວມຜາແສງ,ໂດຍການເປັນປະທານຂອງທ່ານ ດວງເພັດ ຢວນໄຊສົມແພງ,ຄະນະປະຈຳພັກເມືອງ, ຫົວໜ້າຫ້ອງວ່າການປົກຄອງເມືອງ,ທ່ານ ຄຳເພີຍ ລໍພະຈັນ ຫົວໜ້າຫ້ອງການສຶກທິການ ແລະ ກິລາເມືອງ,ມີຫົວໜ້າກຸ່ມພັດທະນາບວມພະແສງ,ຄະນະກຳມະການຂະແໜງການທີ່ກ່ຽວຂ້ອງ,ບໍລິດສັດຮັບເໝົາກໍ່ສ້າງ,ຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມ.

ທ່ານ ພອນຈະເລີນ ຫົວໜ້າຫ້ອງການກອງທືນຫຼຸດຜ່ອນຄວາມທຸກຍາກປະຈຳເມືອງ ໄດ້ລາຍງານຜົນສໍາເລັດຂອງການກໍ່ສ້າງ,ເຊິ່ງໂຄງການດັ່ງກ່າວໄດ້ເລີ່ມຈັດຕັ້ງປະຕິບັດມາແຕ່ວັນທີ່ 12 ມີນາ 2018 ແລະ ສໍາເລັດ 100% ໃນວັນທີ່ 5 ກໍລະກົດ 2018 ໂດຍໄດ້ຮັບທືນຊ່ວຍເຫຼືອຈາກໂຄງການກອງທືນຫຼຸດຜ່ອນຄວາມທຸກຍາກໄລຍະ 3 ຮອບວຽນ 15 ສົກປີ 2018,ໃຊ້ທືນກໍ່ສ້າງທັງໝົດໝົດ 385.600.000 ກ່ວາກີບ,ໃນນັ້ນມີທືນປະກອບສ່ວນຂອງປະຊາຊົນ 20.000.000ກີບ,

ເປັນອາຄານຊັ້ນດຽວ,ຍາວ 24 ແມັດ,ກ້ວາງ 9 ແມັດ,ປະກອບມີ 3 ຫ້ອງນອນ ແລະ 2 ຫ້ອງນ້ຳ,ເຄື່ອງເຟີນິເຈີຄົບຊຸດເຊັ່ນ: ຕູ້ໃສ່ເຄື່ອງ 3 ໜ່ວຍ, ຕຽງ 2 ຊັ້ນ 25 ໜ່ວຍ ແລະ ເຄື່ອງໃສ່ຫ້ອງນ້ຳຈຳນວນໜຶ່ງ,ໂດຍແມ່ນບໍລິສັດ ສີວິໄລ ກໍ່ສ້າງເຄຫາສະຖານປະຈຳເມືອງປາກແຊງ ຮັບເໝົາກໍ່ສ້າງ,ການກໍ່ສ້າງອາຄານດັ່ງກ່າວນີ້ກໍ່ເພຶ່ອຮອງຮັບທີ່ພັກພາອາໄສຂອງນ້ອງນັກຮຽນທີ່ຢູ່ຫ່າງໄກສອກຫຼີກມາສຶກສາຮ່ຳຮຽນໃຫ້ສະດວກສະບາຍຂື້ນ.

ຂ່າວ: ແກ່ນຄຳ ສົມໃຈປອງ (ນັກຂ່າວເມືອງ)