ນະຄອນຫລວງ ເກັບລາຍຮັບເຂົ້າງົບປະມານ ບາງຂະແໜງການໄດ້ລື່ນແຜນການ

ຕາມ​ການ​ລາຍ​ງານ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໃນ​ກອງ​ປະ­ຊຸມ​ສະໄໝ​ສາ­ມັນ​ເທື່ອ​ທີ 5 ຂອງ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ ຊຸດ​ທີ I ທີ່​ຈັດ​ຂຶ້ນ​ລະ­ຫວ່າງ​ວັນ​ທີ 16-18 ກໍ­ລະ­ກົດ​ນີ້​ວ່າ ການ­ຈັດ­ຕັ້ງ​ງົບ­ປະ­ມານ 6 ເດືອນ​ຕົ້ນ​ປີ ມີ​ຫຼາຍ​ອັນ​ທີ່​ຕັ້ງ­ໜ້າ ໂດຍ​ສະ­ເພາະ ການ​ເກັບ​ລາຍ​ຮັບ​ອາ­ກອນ​ທີ່​ມີ​ຊຳ​ເຮື້ອ​ມາ​ຫຼາຍ​ປີ ມາ​ຮອດ​ຕົ້ນ​ປີ 2018 ສາ­ມາດ​ບັນ­ລຸ​ເກີນ​ຄາດ­ໝາຍ​ເລັກ​ໜ້ອຍ ຄາດ​ວ່າ​ໝົດ​ປີ​ຈະ​ສາ­ມາດ​ບັນ­ລຸ​ໄດ້​ຕາມ​ແຜນ ຄຽງ​ຄູ່​ກັນ​ນັ້ນ​ຍັງ​ມີ​ສິ່ງ​ທ້າ​ທາຍ​ໃນ​ການ​ຈັດ​ເກັບ ເປັນ­ຕົ້ນ ແມ່ນ​ຢູ່​ຂັ້ນ​ເມືອງ ບ້ານ ເຊິ່ງ​ຈະ​ຕ້ອງ​ໄດ້​ເອົາ­ໃຈ­ໃສ່​ໃນ 6 ເດືອນ​ທ້າຍ​ປີ.

ດ້ານ​ລາຍ​ຮັບ​ໃນ 6 ເດືອນ​ຜ່ານ​ມາ ເຖິງ​ວ່າ​ຈະ​ມີ​ສິ່ງ​ທ້າ​ທາຍ​ຫຼາຍ​ດ້ານ​ແຕ່​ອົງ­ການ​ປົກ­ຄອງ ນວ ກໍ່​ໄດ້​ພະ­ຍາ­ຍາມ​ໃນ​ການ​ຈັດ​ເກັບ​ລາຍ​ຮັບ ໂດຍ​ອອກ​ມາດ​ຕະ­ການ​ເກັບ​ລາຍ​ຮັບ ແລະ ປັບ­ປຸງ​ບຸ​ຄະ­ລາ​ກອນ ປັດ­ຈຸ­ບັນ​ສາ­ມາດ​ເກັບ​ລາຍ​ຮັບ​ໄດ້​ທັງ​ໝົດ 612,06 ຕື້​ກີບ ເທົ່າ​ກັບ 50,49% ຂອງ​ແຜນ­ການ​ປີ (1.212,25 ຕື້​ກີບ) ໃນ​ນີ້​ຂັ້ນ ນວ ເກັບ​ໄດ້ 446,12 ຕື້​ກີບ ເທົ່າ​ກັບ 51% ຂອງ​ແຜນ­ການ ຂັ້ນ​ເມືອງ ແລະ ບ້ານ​ເກັບ​ໄດ້ 165,92 ຕື້​ກີບ ເທົ່າ​ກັບ 48% ຂອງ​ແຜນ­ການ​ປີ ໃນ​ນີ້​ຂະ­ແໜງ​ສ່ວຍ​ສາ​ອາ­ກອນ ປະ­ຕິ­ບັດ​ໄດ້ 577,18 ຕື້​ກີບ ເທົ່າ​ກັບ 50,34% ຂອງ​ແຜນ­ການ​ປີ (1.146,61 ຕື້​ກີບ) ຂະ­ແໜງ​ຊັບ​ສິນ​ຂອງ​ລັດ ປະ­ຕິ­ບັດ​ໄດ້ 34,24 ຕື້​ກີບ ເທົ່າ​ກັບ 52,68% ຂອງ​ແຜນ­ການ​ປີ (65 ຕື້​ກີບ) ຂະ­ແໜງ­ການ​ເງິນ​ຂອງ​ລັດ​ວິ​ສາ​ຫະ​ກິດ​ປະ­ຕິ­ບັດ​ໄດ້ 627,49 ລ້ານ​ກີບ ເທົ່າ​ກັບ 99,11% ຂອງ​ແຜນ­ການ​ປີ (633 ລ້ານ​ກີບ) ບ້ວງ​ທີ່​ສູນ​ກາງ​ທີ່​ເກັບ​ພາ­ສີ​ຢູ່ ນວ ປະ­ຕິ­ບັດ​ໄດ້ 1.443,40 ຕື້​ກີບ ເທົ່າ​ກັບ 43,37% ຂອງ​ແຜນ­ການ​ປີ (3.327,96 ຕື້​ກີບ) ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ­ຜ່ານ­ມາ​ຫຼຸດ​ລົງ 1,29% ເປັນ​ເງິນ 18,93 ຕື້​ກີບ ດ້ານ​ລາຍ​ຈ່າຍ​ປະ­ຕິ­ບັດ​ໄດ້ 307,51 ຕື້​ກີບ​ເທົ່າ​ກັບ 48,20% ຂອງ​ແຜນ­ການ​ປີ (637,98 ຕື້​ກີບ) ການ​ດູນ​ດ່ຽງ​ໃຫ້​ສູນ​ກາງ ປະ­ຕິ­ບັດ​ໄດ້ 231,27 ຕື້​ກີບ ເທົ່າ​ກັບ 40,27% ຂອງ​ແຜນ­ການ​ປີ (574,27 ຕື້​ກີບ) ສຳ­ລັບ​ລາຍ​ຈ່າຍ​ໃນ​ຮ່ວງ​ຕ່າງໆ ເປັນ­ຕົ້ນ ແມ່ນ​ເງິນ­ເດືອນ ສາ­ມາດ​ດຳ­ເນີນ​ໄດ້​ປົກ­ກະ­ຕິ​ທ່ວງ​ທັນ​ກັບ​ເວ­ລາ​ທີ່​ກຳ­ນົດ.

ຄາດ­ໝາຍ​ສູ້​ຊົນ​ການ​ຈັດ​ເກັບ​ລາຍ​ຮັບ​ໃນ 6 ເດືອນ​ທ້າຍ​ປີ​ໃຫ້​ໄດ້ 600,19 ຕື້​ກີບ ເທົ່າ​ກັບ 49,51% ຂອງ​ແຜນ­ການ​ປີ​ທີ່​ຍັງ​ເຫຼືອ ໃນ​ນີ້​ສ່ວຍ​ສາ​ອາ­ກອນ 569,43 ຕື້​ກີບ ເທົ່າ​ກັບ 49,66% ວຽກ​ງານ​ຊັບ​ສິນ 30,76 ຕື້​ກີບ ເທົ່າ​ກັບ 47,32% ຄຸ້ມ​ຄອງ​ລັດ​ວິ​ສາ​ຫະ​ກິດ 5,61 ລ້ານ​ກີບ ເທົ່າ​ກັບ 0,89% ສ່ວນ​ພາ­ສີ​ທີ່​ສູນ​ກາງ​ຈັດ​ເກັບ​ຢູ່ ນວ ຕ້ອງ​ສູ້​ຊົນ​ໃຫ້​ໄດ້ 1.884,56 ຕື້​ກີບ ເທົ່າ​ກັບ 56,63% ຂອງ​ແຜນ­ການ​ປີ​ທີ່​ຍັງ​ເຫຼືອ.

ພາບ-ຂ່າວ: ນສພ ວຽງຈັນໃຫ່ມ