ກະຊວງການເງິນ ກວດພົບເຫັນການລະເມີດລະບຽບ ກົດໝາຍຢູ່ຫລາຍຂະແໜງການຂອງຕົນ

0
417

ຜ່ານ​ມາ​ການລະ​ເມີດ​ລະບຽບ​ກົດໝາຍ ​ ຢູ່​ໃນ​ຂະ​ແໜງຊັບ​ສິນ, ສ່ວຍ​ສາ​ອາກອນ,  ພາສີ, ຄັງ​ເງິນ​ແຫ່ງ​ຊາດ, ກົມ​ຄຸ້ມ​ຄອງ,  ພັດທະນາ​ລັດ​ວິ​ສາ​ຫະກິດ ​ແລະ ການ​ປະກັນ​ໄພ  ​ໄດ້​ເຮັດ​ໃຫ້​ລາຍ​ຮັບ-ລາຍ​ຈ່າຍ​ງົບປະມານ​ຂອງ​ລັດ ​​ ເສຍ​ຫາຍກວ່າ 10 ຕື້​ກີບ.

ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ,  ລັດຖະມົນຕີ​ກະຊວງ​ການ​ເງິນ ​ໄດ້​ລາຍ​ງານ ​ຢູ່​ໃນ​ກອງ​ປະຊຸມ​ເປີດ​ກວ້າງ ​ ຄົບ​ຄະ​ນະ​ບໍລິຫານ​ງານ​ພັກ​ກະຊວງ​ການ​ເງິນຄັ້ງ​ທີ 6 ສະ​ໄໝ​ທີ  II ວັນ​ທີ 16 ກໍລະກົດ 2018 ນີ້ວ່າ:  ຜ່ານ​ການ​ຕິດຕາມ​ການ​ກວດກາ  ​ການ​ປະຕິບັດ​ພາລະ​ບົດບາດ,  ໜ້າ​ທີ່​ສິດ​ຂອງ​ຄະນະ​ພັກ​ແຕ່​ລະ​ຂັ້ນ;  ​ໄດ້​ປະຕິບັດ​ລະບອບ​ກວດກາ​ວຽກ​ງານ​ພັກ,  ວຽກ​ງານ​ບໍລິຫານ​ລັດ ​ແລະ ວຽກ​ງານ​ການ​ເງິນ-ງົບປະມານ​ຢູ່​ຂັ້ນ​ສູນ​ກາງ  ​ແລະ ທ້ອງ​ຖິ່ນ. ​ພົບ​ເຫັນ​ການ​ນໍາ​ເຂົ້າ​ນໍ້າມັນ​ເຊື້ອ​ໄຟ ​ ຮັບ​ໃຊ້​ໂຄງການ​ທາງ​ລົດ​ໄຟ​ລາວ-ຈີນ ຄ້າງ  IM 8 ​ແລະ ບໍ 53 (ຢູ່​ສະຫວັນ​ນະ​ເຂດ,  ບໍ່​ແກ້ວ ​ແລະ ຫລວງ​ນໍ້າ​ທາ,  ​ໂດຍ​ມີ​ຄ້າງ​ນໍ້າມັນ 8,1 ລ້ານ​ລິດ,  ພາຫະນະ 1.116 ຄັນ, ອຸປະກອນ​ຮັບ​ໃຊ້​ທາງ​ລົດ​ໄຟ ​ແລະ ອື່ນໆ 1.095 ຊຸດ)  ການ​ປອມ​ແປງ​ເອກະສານ,​  ເກັບ​ເງິນ​ແລ້ວ​ບໍ່​ມອບ,  ມອບ​ບໍ່​ຄົບ​ຖ້ວນ,  ມີ​ການ​ສົມຮູ້​ຮ່ວມຄິດ​ກັບ​ຜູ້​ປະກອບ​ການ,  ຈ່າຍ​ເງິນ​ລ່ວງ​ໜ້າ​ໃນ​ລະບົບ​ຄັງ​ເງິນ​ບໍ່​ຖືກຕ້ອງ,  ຈ່າຍ​ນອກ​ແຜນ ​ແລະ ອື່ນໆ.  ທີ່​ເຮັດ​ໃຫ້ລາຍ​ຮັບ-ລາຍ​ຈ່າຍ​ງົບປະມານ ​ຕົກ​ເຮ່ຍ​ເສຍ​ຫາຍຫລາຍກວ່າ 10 ຕື້​ກີບ,  ​ເກັບ​ໄດ້​ຄືນ​ແລ້ວ 2,6 ຕື້​ກີບ,  ຍັງ​ຄ້າງ​ເປັນ​ເງິນ​ກີບ 8,4 ຕື້​ກີບ  ​ແລະ ​ເປັນ​ເງິນ​ໂດ​ລາ 135.631 ​ໂດ​ລາສະຫະລັດ. ນອກ​ນັ້ນ, ​ຍັງ​ກວດ​ພົບ​ເຫັນ​ພະນັກງານ​ຕິດ​ພັນ​ກັບ​ການ​ສໍ້​ລາດ​ບັງ​ຫລວງ​ຈໍານວນ 13 ຄົນ,  ຊຶ່ງ​ກໍາລັງ​ດໍາ​ເນີນ​ຂັ້ນ​ຕອນ​ສືບ​ສວນ-ສອບ​ສວນ.  ພ້ອມ​ນັ້ນ​ໄດ້​ຮັບ​ຄໍາ​ຮ້ອງ​ຄໍາ​ສະ​ເໜີ​ທັງ​ໝົດ ​ຈໍານວນ 15 ສະບັບ, ມີ​ການ​ແກ້​ໄຂ​ໄດ້​ຈໍານວນ 4 ສະບັບ  ​ແລະ ພວມ​ດໍາ​ເນີນ​ການ​ແກ້​ໄຂ​ຈໍານວນ 11 ສະບັບ.

ທ່ານ ສົມ​ດີ ດວງ ກ່າວ​ຕື່ມ​ວ່າ:  ຜ່ານ​ມາຄະ​ນະ​ພັກກະຊວງ​ການ​ເງິນ​  ກໍໄດ້​ຖື​ເອົາ​ວຽກ​ງານ​ກວດກາ​ພັກ-ລັດ  ​ເປັນ​ວຽກ​ງານ​ຈຸດ​ສຸມ​ຂອງ​ການ​ນໍາພາ​ຂອງ​ພັກ,  ​ໂດຍ​ສຸມ​ໃສ່​ແກ້​ໄຂ​ຈຸດ​ອ່ອນ​ຂອງ​ວຽກ​ງານ​ກວດກາ​​ໃນ​ໄລຍະ​ຜ່ານ​ມາ  ​ແລະ ​ເພື່ອ​ຍົກ​ສູງ​ຄວາມ​ຮັບຜິດຊອບ​ ຂອງ​ຄະນະ​ພັກ​ແຕ່ລະ​ຂັ້ນ ​ໃນ​ການ​ຈັດ​ຕັ້ງ​ຜັນ​ຂະຫຍາຍ​ນິຕິ​ກໍາ​ຕ່າງໆ,  ພັດທະນາ​ຂະ​ແໜ​ງການ​ເງິນ​ໃຫ້​ມີ​ຄວາມ​ເຂັ້ມ​ແຂງ,  ມີ​ວິ​ໄນ​ເຂັ້ມ​ງວດ, ມີ​ຄວາມ​ໂປ່​ງ​ໃສ ​ແລະ ຍຸຕິ​ທໍາ  ​ສາມາດ​ແກ້​ໄຂ​ບັນຫາ​ຫຍໍ້​ທໍ້​ຕ່າງໆ  ​ແຕ່​ສູນ​ກາງ​ຮອດ​ທ້ອງ​ຖິ່ນ, ​ໄດ້​ອອກ 10 ຂໍ້​ຫ້າມ​ຕໍ່​ພະນັກງານ-ລັດຖະກອນ​ຂະ​ແໜງ​ການ​ເງິນ  ​ແລະ ​ໄດ້ຕິດ​ຕັ້ງຕູ້​ຮັບ​ຄໍາ​ຮ້ອງ​ຄໍາ​ສະ​ເໜີ​ ຈໍານວນ 10 ຈຸດ  ​ແລະ ​ເປີດ​ສາຍ​ດ່ວນ 1519 ​ເພື່ອ​ຮັບ​ຟັງ​ຄວາມ​ຄິດເຫັນ.

ຂ່າວ: ຂັນ​ໄຊ, ພາບ:​ ເກດ