ລາວຈະສົ່ງນາຍຊ່າງ 13 ຄົນໃນ 7 ສາຂາ ເຂົ້າຮ່ວມແຂ່ງຂັນສີມືແຮງງານອາຊຽນ ຄັ້ງທີ 12 ທີ່ປະເທດໄທ

0
123

ລາວ ຈະສົ່ງນາຍຊ່າງ 13 ຄົນ ແລະ ຄູເຝິກ 13 ຄົນເຂົ້າຮ່ວມແຂ່ງຂັນສີມືແຮງງານອາຊຽນ ຄັ້ງທີ 12 ທີ່ປະເທດໄທໄດ້ຮັບກຽດເປັນເຈົ້າພາບ ຈັດຂຶ້ນໃນວັນທີ 26 ສິງຫາ ຫາ ວັນທີ 5 ກັນຍາປີນີ້, ລວມມີ 7 ສາຂາ ຄື: ຊ່າງກໍ່, ປຸງແຕ່ງອາຫານ, ຕິດຕັ້ງໄຟຟ້າໃນອາຄານ, ຈອດໂລຫະ, ຕັດ ຫຍິບເຄື່ອງນຸ່ງ, ອອກແບບກຣາຟິກ ແລະ ຊ່າງໄມ້ເຄື່ອງເຮືອນ. ຖືເປັນຄັ້ງທີ 10 ທີ່ລາວສົ່ງນາຍຊ່າງເຂົ້າຮ່ວມແຂ່ງຂັນສີມືແຮງງານອາຊຽນ.

ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ມີຄຳເຫັນໃນໂອກາດເປັນປະທານຖະແຫລງຂ່າວກ່ຽວກັບການສົ່ງນາຍຊ່າງລາວເຂົ້າຮ່ວມແຂ່ງຂັນສີມືແຮງງານອາຊຽນ ຄັ້ງທີ 12 ຈັດຂຶ້ນຢູ່ໂຮງແຮມລ້ານຊ້າງ, ນະຄອນຫລວງວຽງຈັນໃນວັນທີ 18 ກໍລະກົດ 2018 ວ່າ: ນາຍຊ່າງລາວທີ່ຈະສົ່ງເຂົ້າຮ່ວມແຂ່ງຂັນສີມືແຮງງານອາຊຽນຄັ້ງນີ້ໄດ້ຜ່ານການຄັດເລືອກມາຈາກທົ່ວປະເທດ ໂດຍໄດ້ເຝິກຊ້ອມຢ່າງຕໍ່ເນື່ອງທັງພາຍໃນ ແລະ ຕ່າງປະເທດ ເພື່ອໃຫ້ສາມາດແຂ່ງຂັນກັບນາຍຊ່າງປະເທດອື່ນທີ່ເຂົ້າຮ່ວມແຂ່ງຂັນໄດ້ຢ່າງໃກ້ຄຽງ , ພ້ອມນີ້ ທ່ານໄດ້ຮຽກຮ້ອງມາຍັງບັນດາບໍລິສັດ ແລະ ຫ້າງຮ້ານຕ່າງຯ ຈົ່ງຊ່ວຍສະໜັບສະໜູນດ້ານທຶນຮອນໃຫ້ແກ່ນາຍຊ່າງລາວທີ່ຈະເຂົ້າຮ່ວມແຂ່ງຂັນສີມືແຮງງານອາຊຽນຄັ້ງນີ້.


ການແຂ່ງຂັນສີມືແຮງງານອາຊຽນຈັດຂຶ້ນທຸກ 2 ປີ ໂດຍເລີ່ມຈັດແຂ່ງຂັນນັບແຕ່ປີ 1995 ເປັນຕົ້ນມາ. ສະເພາະລາວໄດ້ສົ່ງນາຍຊ່າງເຂົ້າຮ່ວມແຂ່ງຂັນທັງຫມົດ 10 ຄັ້ງ ໂດຍເລີ່ມແຕ່ປີ 2001 ທີ່ປະເທດໄທ. ສ່ວນຜົນງານຂອງນາຍຊ່າງລາວເຮັດໄດ້ດີທີ່ສຸດຄືໄດ້ຫລຽນເງິນໃນການແຂ່ງຂັນສີມືແຮງງານອາຊຽນ ຄັ້ງທີ 10 ທີ່ປະເທດຫວຽດນາມ ປີ 2014 ໂດຍໄດ້ຈາກຊ່າງໄຟຟ້າ.
ໂອກາດຖະແຫລງຂ່າວຄັ້ງນີ້ ມີຫລາຍບໍລິສັດມອບເງິນອຸປະຖຳການສົ່ງນາຍຊ່າງລາວເຂົ້າຮ່ວມ ແຂ່ງຂັນສີມືແຮງງານອາ ຊຽນ ຄັ້ງທີ 12 ທີ່ປະເທດໄທ ລວມເປັນເງິນຫລາຍກ່ວາ 200 ລ້ານກີບ.

ຂ່າວ-ພາບ: ບຸນຕຽງ ຈັນທະວົງ