ທ່ານນາຍົກລັດຖະມົນຕີ ຕ້ອນຮັບຄະນະຜູ້ແທນອົງການການເງິນສາກົນ

ໃນຕອນເຊົ້າຂອງວັນທີ 26 ກໍລະກົດ 2018 ຢູ່ທີ່ສໍານັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງ ທ່ານ ຟີລິບ ເລີ ອົວຣູ ຜູ້ບໍລິຫານອົງການການເງິນສາກົນ (IFC) ພ້ອມດ້ວຍຄະນະ, ເນື່ອງໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ແຕ່ວັນທີ 24-29 ກໍລະກົດ 2018.

ອົງການການເງິນສາກົນ ຫຼື (IFC) ເປັນອົງການໜຶ່ງທີ່ມີບົດບາດສໍາຄັນ ໃນການສົ່ງເສີມການຮ່ວມມືດ້ານການເງິນ, ການລົງທຶນຂອງສາກົນ ແລະ ເປັນອົງການໃນເຄືອຂອງທະນາຄານໂລກ (WB). ສຳລັບຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ເພື່ອປຶກສາຫາລື, ແລກປ່ຽນຄໍາຄິດຄໍາເຫັນ ກ່ຽວກັບສະພາບການພັດທະນາເສດຖະກິດ-ສັງຄົມ ແລະ ທິດທາງແຜນການພັດທະນາທຸລະກິດພາກເອກະຊົນຂອງລາວ.

ກ່ອນອື່ນ, ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາເຄື່ອນໄຫວຢ້ຽມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້, ເປັນການປະກອບສ່ວນສໍາຄັນ ເຂົ້າໃນການພັດທະນາເສດຖະກິດຂອງລາວ ໃຫ້ມີການຂະຫຍາຍຕົວຢ່າງຕໍ່ເນື່ອງ. ພ້ອມດຽວກັນນີ້, ທ່ານນາຍົກລັດຖະມົນຕີ ໄດ້ສະເໜີໃຫ້ອົງການການເງິນສາກົນ ສືບຕໍ່ຊຸກຍູ້, ຊ່ວຍເຫຼືອ ສປປ ລາວ ຕໍ່ໄປ ເປັນຕົ້ນແມ່ນ ການຊ່ວຍເຫຼືອທາງດ້ານວິຊາການ ເພື່ອສ້າງຄວາມເຂັ້ມແຂງ ໃຫ້ແກ່ພາກທຸລະກິດເອກະຊົນຂອງລາວ; ການສົ່ງເສີມວິສາຫະກິດ ​ຂະໜາດນ້ອຍ-ຂະໜາດກາງ; ສ້າງຕົວແບບການພັດທະນາຂອງພາກທຸລະກິດ; ການມີສ່ວນຮ່ວມເພື່ອການພັດທະນາ ລະຫວ່າງ ພາກລັດ ແລະ ພາກເອກະຊົນ.

ໂອກາດດຽວກັນນີ້, ທ່ານ ຟີລິບ ເລີ ອົວຣູ ໄດ້ສະແດງຄວາມຂອບໃຈ ຕໍ່ທ່ານນາຍົກລັດຖະມົນຕີ ຂອງ ສປປ ລາວ ທີ່ໄດ້ເສຍສະຫຼະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ຢືນຢັນວ່າຈະສືບຕໍ່ໃຫ້ການຮ່ວມມື ແລະ ຊ່ວຍເຫຼືອ ສປປ ລາວ ຕໍ່ໄປ ທັງນີ້ກໍ່ເພື່ອປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມຂອງລາວ.

ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ