ເລຂາທິການໃຫຍ່ອາຊຽນ ເຂົ້າຢ້ຽມຂໍ່ານັບ ລັດຖະມົນຕີການຕ່າງປະເທດ

ຂປລ. ໃນຕອນຄໍ່າວັນທີ 27 ກໍລະກົດ 2018 ທີ່ນະຄອນຫລວງວຽງຈັນ, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Lim Jock Hoi, ເລຂາທິການໃຫຍ່ອາຊຽນ ພ້ອມດ້ວຍຄະນະ ໃນໂອກາດເດີນທາງມາມອບເຄື່ອງຊ່ວຍເຫລືອໃຫ້ແກ່ຜູ້ປະສົບໄພທີ່ໄດ້ຮັບຜົນກະທົບຈາກເຫດການອຸບັດຕິເຫດໂຄງການເຂື່ອນໄຟຟ້າ ເຊປຽນ-ເຊນໍ້ານ້ອຍ ທີ່ ແຂວງອັດຕະປື.

ທ່ານ ເລຂາທິການໃຫຍ່ອາຊຽນ ແລະ ໃນນາມຜູ້ປະສານງານຫລັກຂອງອາຊຽນເພື່ອຊ່ວຍເຫລືອດ້ານມະນຸດສະທຳ ແລະ ບັນເທົາທຸກສຸກເສີນ ໄດ້ຕາງໜ້າອາຊຽນມອບເຄື່ອງຊ່ວຍເຫລືອໃຫ້ ສປປ ລາວ ເຊຶ່ງລວມມີ: ເຮືອອາລູມິນຽມ, ຈັກເຮືອອາລູມິນຽມ, ເຕັນທີ່ຢູ່ອາໄສສຳລັບຄອບຄົວ, ເຄື່ອງປະຖົມພາຍາບານ, ເຄື່ອງໃຊ້ປະຈຳວັນ, ມຸ້ງ ແລະ ເຄື່ອງໃຊ້ຈຳເປັນອື່ນໆ ລວມທັງໝົດ 12,807 ອັນ, ເຊິ່ງລວມມູນຄ່າ 180,693 ໂດລາສະຫະລັດ.

ນອກຈາກນີ້, ທ່ານ ເລຂາທິການໃຫຍ່ອາຊຽນ ພ້ອມດ້ວຍຄະນະ ກໍຈະໄດ້ສືບຕໍ່ລົງໄປຕິດຕາມເບິ່ງປະຊາຊົນຢູ່ເຂດທີ່ໄດ້ຮັບຜົນກະທົບຕົວຈິງ ຢູ່ ເມືອງສະໜາມໄຊ, ແຂວງອັດຕະປື ໃນວັນທີ 28 ກໍລະກົດ 2018.

ໃນໂອກາດດັ່ງກ່າວ, ທ່ານ ລັດຖະມົນຕີ ສະເຫລີມໄຊ ໄດ້ສະແດງຄວາມຂອບໃຈຕໍ່ຄວາມເປັນຫ່ວງໄຍຂອງທ່ານເລຂາທິການໃຫຍ່ ແລະ ການຊ່ວຍເຫລືອຂອງຄອບຄົວອາຊຽນ ໂດຍຜ່ານສູນປະສານງານອາຊຽນ ເພື່ອຊ່ວຍເຫລືອດ້ານມະນຸດສະທຳ (AHA Centre).

ຂ່າວ: ສິງຄຳ