ລາວພຣີເມຍລີກ 2018 ມີແຕ່ 8 ທີມ ຊິງກັນປີນີ້

0
80

ລາວ ພຣີເມຍລີກ 2018 ແມ່ນຈະເລີ້ມເປີດສາກການແຂ່ງຂັນໃນວັນທີ 24 ກຸມພາ 2018

ໃນຕອນບ່າຍ ວັນອັງຄານ 31 ມັງກອນ 2018 ຢູ່ທີ່ຫ້ອງປະຊຸມ ຊັ້ນ 3 ສະຫະພັນບານເຕະແຫ່ງຊາດລາວ ໄດ້ຈັດກອງປະຊຸມເພື່ອປຶກສາຫາລືກະກຽມ ການແຂ່ງຂັນ ລາວ ພຣີເມຍລີກ 2018 ໂດຍພາຍໃຕ້ການເປັນປະທານ ຂອງ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ພ້ອມດ້ວຍ ທ່ານ ສົມສະນຸກ ລຽນສະຫວັນ ຮອງເລຂາທິການ, ທ່ານ ໂພທອນ ຖານະວະດີ ຫົວຫນ້າພະແນກຈັດການແຂ່ງຂັນ, ທ່ານ ຄຳໃສ ແສງມະນີພອນ ຫົວຫນ້າພະແນກບໍລິຫານ ແລະ ບັນດາປະທານ ສະໂມສອນ, ຕາງຫນ້າ ສະໂມສອນ ທີ່ເຂົ້າຮ່່ວມການແຂ່ງຂັນ ລາວພຣີເມຍລີກ 2018 .

ສຳລັບ ການແຂ່ງຂັນ ລາວ ພຣີເມຍລີກ 2018 ມີ ທີມເຂົ້າຮ່ວມທັງຫມົດ 8 ທີມ ປະກອບມີ :

1. ສະໂມສອນ ລາວໂຕໂຢຕ້າ ເອຟຊີ ( LAO TOYOTA FC ) 2. ສະໂມສອນ ປກສ ເອຟຊີ ( LAO POLICE FC ) 3. ສະໂມສອນ ດີເຄ ເອຟຊີ ( DK FC )

4. ສະໂມສອນ ສະຫວັນ ຢູໄນເຕັດ ( SAVAN UNITED

5. ສະໂມສອນ ຊ້າງນ້ອຍ ເອຟຊີ ( YOUNG ELEPHANT FC )

6. ສະໂມສອນ ກອງທັບ ເອຟຊີ ( LAO ARMY FC )

7. ສະໂມສອນ ມາສເຕີ້ ເຊເວັນ ເອຟຊີ ( MASTER 7 FC )

8. ສະໂມສອນ ຫລວງພຣະບາງ ຢູໄນເຕັດ ( LUANGPRABANG UNITED )

ການແຂ່ງຂັນ ລາວ ພຣີເມຍລີກ ແມ່ນ ໃຊ້ຮູບແບບການແຂ່ງຂັນ ໄປ ແລະ ກັບ

ເຊິ່ງໃຊ້ສະໜາມແຂ່ງຂັນທັງໝົດ 4 ສະໜາມຄື: ສະໜາມກິລາແຫ່ງຊາດຫລັກ 16, , ສະຫນາມກິລາມຊ, ສະຫນາມກິລາແຂວງ ສະຫວັນນະເຂດ ແລະ ສະຫນາມກິລາແຂວງ ຫລວງພຣະບາງ.

ເງິນລາງວັນອັນດັບ 1 ແມ່ນຈະໄດ້ຮັບເງິນລາງວັນ 300.000.000 ລ້ານກີບ ພ້ອມຂັນຊະນະເລີດ 1 ຫນ່ວຍ, ອັນດັບ 2 ຈະໄດ້ຮັບເງິນລາງວັນ 200.000.000 ລ້ານກີບ, ອັນດັບ 3 ຈະໄດ້ຮັບເງິນລາງວັນ 100.000.000 ລ້ານກີບ, ແລະ ລາງວັນອື່ນໆອີກເຊັ່ນ : ກຳມະການດີເດັ່ນ, ນັກກິລາທີ່ຍິງປະຕູສູງສຸດ ແລະ ຄູຝຶກດີເດັ່ນ ສ່ວນ ທີມທີ່ ເຂົ້າຮ່ວມ ລາວພຣີເມຍລີກ ຈະໄດ້ຮັບຫມາກບານ 20 ຫນ່ວຍ

ສະໂມສອນ ທີ່ໄດ້ເປັນແຊ້ມ ຫລື ຮອງແຊ້ມ ລາວ ພຣີເມຍລີກ ຈະໄດ້ເປັນຕົວແທນ ສະໂມສອນ ຈາກ ສປປ ລາວ ເຂົ້າຮ່ວມການແຂ່ງຂັນລະດັບ AFC CUP , TOYOTA MEKONG CLUB CHAMPIONSHIP ຫລື ລາຍການອື່ນໆທີ່ຖືກຮັບເຊີນ ສ່ວນອັນດັບຮອງລົງມາຈະໄດ້ພິຈາລະນາຕາມຄວາມເຫມາະສົມ.

ລາວ ພຣີເມຍລີກ 2018 ແມ່ນຈະເລີ້ມເປີດສາກການແຂ່ງຂັນໃນວັນທີ 24 ກຸມພາ 2018 ທີ່ຈະມາເຖິງ ສ່ວນຕາຕະລາງການແຂ່ງຂັນແມ່ນຈະແຈ້ງໃຫ້ຮັບຊາບພາຍຫລັງ .

#LPL2018