ລາວ-ຈີນ ​ຈັດເວ​ທີ​ປຶກ​ສາ​ຫາ​ລື​ການຮ່ວມ​ມື ຂອບ "ໜຶ່ງ​ແລວ ໜຶ່ງ​ເສັ້ນ​ທາງ"

0
232

ລາວ-ຈີນ ຮ່ວມ​ກັນ​ຈັດ​ກອງ​ປະ​ຊຸມ​ເວ​ທີ​ປຶກ​ສາ​ຫາ​ລື ການ​ຮ່ວມ​ມື ລາວ-ຈີນ ໃນ​ຂອບ ” ​ໜຶ່ງ​ແລວ ໜຶ່ງ​ເສັ້ນ​ທາງ” ເພື່ອ​ພ້ອມກັນຜັນ​ຂະ​ຫຍາຍຍຸດທະສາດຫັນປະເທດທີ່ບໍ່ມີຊາຍ​ແດນ​ຕິ​ດ​ກັບທະເລໃຫ້ກາຍ ເປັນປະເທດເຊື່ອມຈອດ ເຊື່ອມໂຍງກັບພາກພື້ນ ແລະ ສາກົນ ຂອງ ສປປ ລາວ ແລະ ຂໍ້ລິເລີມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ກໍ່​ຄື​ເປັນ​ການ​ຊຸກ​ຍູ້ ແລະ ຜັນ​ຂະ​ຫຍາຍ​ຜົນ​ສຳ​ເລັດ​ຂອງ​ການ​ຢ້ຽມ​ຢາມ ສ​ປ​ປ ລາວ ຢ່າງເປັນ​ທາງ​ການ​ຂອງ​ເລ​ຂາ​ທິ​ການ​ໃຫຍ່ ສີ ຈິ້ນ​ຜິງ ໃນ​ທ້າຍ​ປີ 2017 ຜ່ານ​ມາ ເຊິ່ງ​ເປັນ​ການ​ຮັດ​ແໜ້ນ​ສາຍ​ພົວ​ພັນ​​ມິດ​ຕະ​ພາບອັນ​ເປັນ​ມູນ​ເຊື້ອ, ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ ໝັ້ນ​ຄົງ​ຍາວ​ນານ ໃຫ້​ກ້າວ​ສູ່​ໄລ​ຍະ​ໃໝ່ ແລະ ເປັນ​ຂີດ ​ໝາຍ​ສຳ​ຄັນຂອງ​ການ​ຮ່ວມ​ມື ລາວ-ຈີນ ໃນ​ໄລ​ຍະ​ໃໝ່.

​ການ​ສຳ​ມະ​ນາ​ດັ່ງ​ກ່າວ​ຈັດ​ຂຶ້ນໃນ​ລະ​ຫວ່າງວັນ​ທີ 2-3 ກຸມ​ພາ 2018 ທີ່​ໂຮງ​ແຮມ​ແລນ​ມາກ ນະ​ຄອນ​ຫລວງວຽງ​ຈັນ ໂດຍ​ການ​ເປັນ​ປະ​ທານ​ຮ່ວມ​ຂອງ​ ທ່ານ ກິ​ແກ້ວ ໄຂ​ຄຳ​ພິ​ທູນ ຄະ​ນະ​ເລ​ຂາ​ທິ​ການ​ສູນ​ກາງ​ພັກ, ຫົວ​ໜ້າ​ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ ປະ​ຊາ​ຊົນ ປະ​ຕິ​ວັດ​ລາວ; ທ່ານ ໄຈ ມິງ​ເຈົ້າ ກຳ​ມະ​ການ​ສູນ​ກາງ​ພັກ, ຮອງ​ຫົວ​ໜ້າ​ຄະ​ນ​ະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ​ກອມ​ມູ​ນິດ​ຈີນ, ປະ​ທານ​ສຳ​ນັກ​ຂ່າ​ວ​ສານ​ຊິນ​ຮ​ວາ ສ​ປ ຈີນ, ມີ​ການ​ນຳ​ຂັ້ນ​ສູງ, ຂະ​ແໜງ​ການ​ກ່ຽ​ວ​ຂ້ອງພາກ​ລັດ ແລະ ນັກ​ທຸ​ລະ​ກິດ ​ ລາວ-ຈີນ ​ເຂົ້າ​ຮ່ວມທັງ​ໝົດ 600 ກວ່າ​ຄົນ.

​ກາ​ລະ​ໂອ​ກາດ ແລະ ວິ​ໄສ​ທັດ ໃນ​ການ​ເຊື່ອມ​ຈອດ​ຍຸດ​ທະ​ສາດຫັນປະເທດທີ່ບໍ່ມີຊາຍ​ແດນ​ຕິ​ດ​ກັບທະເລໃຫ້ກາຍເປັນປະເທດເຊື່ອມຈອດ ເຊື່ອມໂຍງກັບພາກພື້ນ ແລະ ສາກົນ ຂອງ ສປປ ລາວ ກັບ​ຂໍ້​ລິ​ເລີ່ມ​ “ໜຶ່ງ​ແລວ ໜຶ່ງ​ເສັ້ນ​ທາງ” ຂອງ ສ​ປ ຈີນ ເປັນ​ເນື້ອ​ໃນ​ຫລັກຂອງ​ເວ​ທີ​ປຶກ​ສາ​ຫາ​ລືນີ້ ໂດຍ​ປິ່ນ​ອ້ອມ​ຫລາຍ​ຂົງ​ເຂດ​ການ​ຮ່ວມ​ມື ລາວ-ຈີນ ເຊິ່ງຜູ້​ເຂົ້າ​ຮ່ວມ​ຈະ​ມີ​ການ​ປຶກ​ສາ​ຫາ​ລື​ກ່ຽວ​ກັບ​ກາ​ລະ​ໂອ​ກາດ​ຕ່າງ​ໃນ​ການ​ຮ່ວມ​ມື​ຮອບ​ດ້ານ​ລະ​ຫວ່າງ​ສອງ​ປະ​ເທດ​ທີ່​ມີ​ໃນ​ປັດ​ຈຸ​ບັນ, ທັງ​ຈະ​ມີ​ບັນ​ດາ​ຂໍ້​ສະ​ເໜີ​ທີ່​ສ້າງ​ສັນ ແລະ ສາ​ມາດ​ປະ​ຕິ​ບັດ​ໄດ້ ໂດຍ​ແມ່ນ​ບັນ​ດາ​ເຈົ້າ​ໜ້າ​ທີ່​ໃນ​ຂົງ​ເຂດ​ຕ່າງ​ໆ​ທີ່​ກ່ຽວ​ຂ້ອງ, ບັນ​ດາ​ຊ່ຽວ​ຊານ, ຜູ້​ຮັບ​ຜິດ​ຊອບ​ສະ​ພາ​ການ​ຄ້າ, ສະ​ຖາ​ບັນ​ການ​ທະ​ນາ​ຄານ, ວິ​ສາ​ຫະ​ກິດ​ຂອງ​ຈີນ​ທີ່​ມາ​ລົງ​ທຶນ​ຢູ່​ລາວ ກໍ່​ຄື​ນັກ​ລົງ​ທຶນ​ຂອງ​ຈີນ ທີ່​ມີ​ຄວາມ​ສົນ​ໃຈ​ຢາກ​ມາ​ລົງ​ທຶນ​ຢູ່​ລາວ ຮ່ວມ​ປຶກ​ສາ​ຫາ​ລື ແລກ​ປ່ຽນ​ຄຳ​ຄິດ​ຄຳ​ເຫັນ​ນຳ​ກັນ.

ກອງ​ປະ​ຊຸມ​ເວ​ທີ​ປຶກ​ສາ​ຫາ​ລື​ຄັ້ງ​ນີ້ ​ ຈະມີການ​ປະ​ກອບ​ຄຳ​ເຫັນ​ຂອງ​ບັນ​ດາ​ແຂກ​ຖືກ​ເຊີນ​ຄົນ​ສຳ​ຄັ​ນ​ຂອງ ລາວ ແລະ ຈີນ ເຊິ່ງ​ຈະ​ມີ​ເນື້ອ​ໃນ​ປິ່ນ​ອ້ອມ​ການ​ພົວ​ພັນ​ຮ່ວມ​ມື ໃນ​ດ້ານ​ຕ່າງ​ໆ, ໂດຍ​ສະ​ເພາະ​ແມ່ນ​ດ້ານ​ພະ​ລັງ​ງານ, ບໍ່​ແຮ່, ໂທ​ລະ​ຄົມ​ມະ​ນາ​ຄົມ, ການ​ເຊື່ອມ​ຈອດ​ເສັ້ນ​ທາ​ງ​ຄົມ​ມະ​ນາ​ຄົມ, ການ​ຄ້າ-ກາ​ນ​ລົງ​ທຶນ, ​ວິ​ທະ​ຍາ​ສາດ-ເຕັກ​ໂນ​ໂລ​ຊີ, ວັດ​ທະ​ນະ​ທຳ-ສັງ​ຄົມ ແລະ ອື່ນໆ ເຊິ່ງ​ຈະ​ມີ​ການ​ສົນ​ທະ​ນາ​ເປັນ​ເວ​ທີ​ຍ່ອຍ ເຊັ່ນ : ເວ​ທີ​ສົນ​ທະ​ນາ “ການ​ຮ່ວມ​ມື ລາວ-ຈີນ ດ້ານ​ກະ​ສິ​ກຳ ແລະ ແກ້​ໄຂ​ຄວາມ​ທຸກ​ຍາກ”, “ດາວ​ທຽມ​ສ້າງ​ຂົວ​ຕໍ່​ສື່​ສານ​ສາຍ​ສຳ​ພັນ, ໂທ​ລະ​ຄົມ​ພາ​ໃຫ້​ຫຍັບ​ເຂົ້າ​ຫາ​ກັນ, ວັດ​ທະ​ນະ​ທຳ ຊຸກ​ຍູ້​ການ​ເຊື່ອມ​ໂຍງ”, “ສົ່ງ​ເສີມ​ການ​ຮ່ວມ​ມື ແລະ ພັດ​ທະ​ນາ​ຂົງ​ເຂດ​ພະ​ລັງ​ງານ ລາວ-ຈີນ ພາຍ​ໃຕ້ ໜຶ່ງ​ແລວ ໜຶ່ງ​ເສັ້ນ​ທາງ”, “ຊຸກ​ຍູ້​ການ​ຮ່ວມ​ມື​ດ້ານ​ການ​ເງິນ, ຮ່ວມ​ສ້າງ​ສາຍ​ສຳ​ພັນ​ເສດ​ຖະ​ກິດ ລາວ-ຈີນ”, “ການ​ຮ່ວມ​ມື​ດ້ານ​ວິ​ທະ​ສາດ​ເຕັກ​ໂນ​ໂລ​ຊີ ພາຍ​ໃຕ້​ແນວ​ຄວາມ​ຄິດ ໜຶ່ງ​ແລວ ໜຶ່ງ​ເສັ້ນ​ທາງ”.

ໃນ​ໂອ​ກາດ​ດັ່ງ​ກ່າວ ຍັງ​ຈະມີ​ພິ​ທີ​ເຊັນ​ບົດ​ບັນ​ທຶກ​ການ​ຮ່ວມ​ມື ສ້າງ​ຕັ້ງ​ສູນ​ຂໍ້​ມູນ​ຂ່າວ​ສານ “ໜຶ່ງ​ແລວ ໜຶ່ງ​ເສັ້ນ​ທາງ” ລະ​ຫວ່າງ ສຳ​ນັກ​ຂ່າວ​ສານ​ປະ​ເທດ​ລາວ ກັບ ບໍ​ລິ​ສັດ​ຫົວ​ເຫວີຍ ປະ​ຈຳ​ລາວ, ບໍ​ລິ​ສັດ​ດາວ​ທຽມ​ລາວ ເອ​ເຊຍ​ປາ​ຊີ​ຟິກ.

ກອງ​ປະ​ຊຸມ​ເວ​ທີ​ປຶກ​ສາ​ຫາ​ລື ການ​ຮ່ວມ​ມື ລາວ-ຈີນ ໃນ​ຂອບ ” ​ໜຶ່ງ​ແລວ ໜຶ່ງ​ເສັ້ນ​ທາງ”, ເປັນ​ເຈົ້າ​ພາບ​ໂດຍ ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ ປະ​ຊາ​ຊົນ​ ປະ​ຕິ​ວັດ​ລາວ, ກະ​ຊວງ​ຖະ​ແຫລງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ສ​ປ​ປ ລາວ, ສຳ​ນັກ​ຂ່າວ​ສານ​ຊິນ​ຮ​ວາ, ທະ​ນາ​ຄານ​ອຸດ​ສາ​ຫະ​ກຳ ແລະ ການ​ຄ້າ​ຈີນ ສາ​ຂາ​ນະ​ຄອນ​ຫລວງວຽງ​ຈັນ, ສະ​ພາ​ການ​ຄ້າ​ຊາວ​ຈີນ​ຕ່າງ​ດ້າວ ປະ​ຈຳ ສ​ປ​ປ ລາວ; ຈັດ​ໂດຍ ສຳ​ນັກ​ຂ່າວ​ສານ​ປະ​ເທດ​ລາວ (ຂ​ປ​ລ), ສຳ​ນັກ​ຂ່າວ​ສານ​ເສດ​ຖະ​ກິດ​ຈີນ​ຂອງ​ສຳ​ນັກ​ງານ​ໃຫຍ່​ ຂ່າວ​ສານ​ຊິນ​ຮ​ວາ, ທະ​ນາ​ຄານ​ອຸດ​ສາ​ຫະ​ກຳ-ການ​ຄ້າ​ຈີນ ສາ​ຂາ​ນະ​ຄອນ​ຫລວງວຽ​ງ​ຈັນ ແລະ ບໍ​ລິ​ສັດ ກ​ຣິດ​ຕະ​ພົງ ກ​ຣຸບ.

#ຂ​ປ​ລ