ລັດຕະນະ 1 ຄ້ວາແຊັມກິລາບານເຕະຟຸດຊໍໃນຮົ່ມ(ຊາຍ)ຮຸ່ນທົ່ວໄປຊີງຂັນປະຈຳປີ 2018 ຄັ້ງທີ 3

0
194

ການແຂ່ງຂັນກິລາບານເຕະຟຸດຊໍໃນຮົ່ມ(ຊາຍ)ຮຸ່ນທົ່ວໄປຊີງຂັນປະຈຳປີ 2018 ຄັ້ງທີ 3 ໄດ້ໄຂຂຶ້ນໃນລະຫວ່າງ ວັນທີ 30 ມິຖຸນາ ຫາ 31 ກໍລະກົດ 2018 ຜ່ານມາ ທີ່ເດີ່ນບານເຕະໃນຮົ່ມນາສ້າງເຫວີຍ ນະຄອນຫຼວງພະບາງ ແຂວງ ຫຼວງພະບາງ ພາຍໃຕ້ການເປັນປະທານຂອງທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການ ແລະ ກິລາແຂວງ,ມີຄະນະນຳຂອງແຂວງ, ເມືອງ, ຄະນະຮັບຜິດຊອບ,ກຳມະການ,ນັກກິລາ ແລະ ພໍ່ແມ່ປະຊາຊົນຊາວນະຄອນຫຼວງພະບາງເຂົ້າຮ່ວມຢ່າງຫຼວງຫຼາຍ.

ສຳລັບການແຂ່ງຂັນຄັ້ງນີ້ແມ່ນທາງພະແນກສຶກສາທິການ ແລະ ກິລາແຂວງໄດ້ສົມທົບກັບສະຫະພັນບານເຕະແຂວງ ແລະ ຄະນະກຳມະການຈັດການແຂ່ງຂັນສືບຕໍ່ຈັດການແຂ່ງຂັນດັ່ງກ່າວເປັນປີທີ 3 ແລະ ຜ່ານມາການແຂ່ງຂັນລາຍການນີ້ຄັ້ງທີ 1 ມີ 20 ທີມເຂົ້າຮ່ວມ,ຄັ້ງທີ2 ມີ 16 ທີມເຂົ້າຮ່ວມ ແລະ ຄັ້ງທີ 3 ນີ້ມີ 22 ທີມເຂົ້າຮ່ວມ,ຜ່ານການແຂ່ງຂັນຕະຫຼອດໄລຍະ 31 ວັນບັນຍາກາດເຕັມໄປດ້ວຍຄວາມເບີກບານມ່ວນຊື່ນ ແລະ ໄມຕີຈິດມິດຕະພາບ ລະຫວ່າງນັກກິລາດ້ວຍກັນພ້ອມກັບກອງເຊຍທີ່ເຕັມທັງສອງຂອບສະໝາມ ມາຮອດ ວັນທີ 31 ກໍລະກົດ 2018 ເປັນມື້ຊິງຊະນະເລີຍ,ຜົນການແຂ່ງຂັນຊິ່ງຊະນະເລີດຄັ້ງນີ້ປະກົດວ່າທີມ ລັດຕະນະ 1 ສາມາດຄ້ວາເອົາອັນດັບທີ1 ຂອງດີວີຊັນນີ້ໄປຄອງໄດ້ຮັບຂັນ 1 ໜ່ວຍພ້ອມດ້ວຍເງິນສົດ 3 ລ້ານກີບ ແລະ ອັນດັບທີ 2 ຕົກເປັນຂອງທິມ ລັດຕະນະ 2ໄດ້ຮັບຂັນ 1 ໜ່ວຍພ້ອມດ້ວຍເງິນສົດ 2 ລ້ານກີບ, ອັນທີ 3 ທີມ ບໍດີຟາຍໄດ້ຮັບຂັນ 1 ໜ່ວຍພ້ອມດ້ວຍເງິນສົດ 1 ລ້ານກີບ ແລະ ອັນດັບທີ 4 ເປັນຂອງທີມ ນອກກອບ-ລີເຈນໄດ້ຮັບເງິນສົດ 5 ແສນກີບ.

ໃຫ້ກຽດມອບລາງວັນ ແລະ ກ່າວປິດການແຂ່ງ ຂັນຢ່າງເປັນທາງການ ໂດຍແມ່ນທ່ານ ວົງສະຫວັນ ເທບພະຈັນ ຮອງເຈົ້າແຂວງໆຫຼວງພະບາງ ໂອກາດນີ້ ທ່ານຍັງໄດ້ສະແດງຄວາມຂອບໃຈຕໍ່ຄະນະຮັບຜິດຊອບ,ທີມນັກກິລາພ້ອມດ້ວຍຄູເຝິກ ທີ່ໄດ້ສະລະເວລາເຂົ້າຮ່ວມແຂ່ງ ຂັນເພື່ອສ້າງບັນຍາກາດໃຫ້ມີຄວາມຄຶກຄື້ນມ່ວນຊື່ນທັງເປັນການອອກກໍາລັງກາຍໃຫ້ແກ່ສຸຂະພາບ,ນັກກິລາໄດ້ຫ່າງໄກສິ່ງເສບຕິດ ແລະ ທັງເປັນການສ້າງມິດໝາຍລະຫວ່າງມິດຕະ ພາບຂອງທີມນັກກິລາດ້ວຍກັນ ພ້ອມນີ້ ທ່ານຍັງໄດ້ສະແດງຄວາມຂອບໃຈມາຍັງທຸກພາກສ່ວນທີ່ໄດ້ໃຫ້ການສະໜັບສະໜູນການແຂ່ງຂັນກິລາບານເຕະຟຸດຊໍໃນຮົ່ມ(ຊາຍ) ປະຈຳປີ 2018 ຄັ້ງທີ 3 ນີ້ທີ່ ນະຄອນ ຫຼວງພະບາງ ໄດ້ບັນລຸຜົນສຳເລັດໄປດ້ວຍດີ. ໂດຍ: ແຈັກກີ ສກຂ ຫຼວງພະບາງ.