ປະຊາຊົນບ້ານຂຸ່ມສ້ຽວ ບໍລິເວນບ້ານໜອງ ເມືອງແກ່ນທ້າວ ສ້າງຂະບວນການອະນາໄມລວມຕອບຕ້ານພະຍາດໄຂ້ຍຸງລາຍ

ໄຊຍະບູລີ: ຈາກກໍລະນີການກວດພົບພະຍາດໄຂ້ຍຸງລາຍຄັ້ງໃໝ່ໃນວັນທີ 2 ສິງຫານີ້ຢູ່ບ້ານຂຸ່ມສ້ຽວ ບໍລິເວນບ້ານໜອງ ເມືອງແກ່ນທ້າວ 1 ກໍລະນີນັ້ນ ໃນວັນທີ 4 ສິງຫານີ້,ປະຊາຊົນພາຍໃນບ້ານໄດ້ມີຄວາມຕື່ນຕົວສູງ ພ້ອມກັນສ້າງຂະບວນການອອກແຮງງານລວມ ດ້ວຍການເຮັດອະນາໄມເຮືອນຊານບ້ານຊ່ອງຂອງຕົນເອງ ພ້ອມທັງລົງກວດກາໜອນນໍ້າທຸກໆຫຼັງຄາເຮືອນຮອບໃໝ່ ແລະ ສ້ອມແປງທາງພາຍໃນບ້ານ ດ້ວຍການຖົມບວກຂຸມແລະແປງຮ່ອງລະບາຍນໍ້າ ເພື່ອຮັບປະກັນເວລາຝົນຕົກບໍ່ໃຫ້ມີນໍ້າຂັງ ເຊິ່ງຈະກາຍເປັນແຫຼ່ງເພາະພັນຂອງຍຸງລາຍ.

ທ່ານ ບຸນລື່ນ ໄຊຍະພອນ ໜຶ່ງໃນຜູ້ຊີ້ນຳບ້ານຂຸ່ມສ້ຽວ ໄດ້ລົງເຮັດຕົວຈິງຮ່ວມກັບຊາວບ້ານ ພ້ອມທັງຢໍ້າວ່າ ພວກເຮົາຕ້ອງຄວບຄຸມໃຫ້ໄດ້ ເພື່ອຮັກສາຊີວິດທຸກຄົນພາຍໃນບ້ານ ແລະ ບໍ່ໃຫ້ແຜ່ລະບາດໄປບ້ານອື່ນ.ຕ້ອງຖືສຳຄັນ ການອະນາໄມເຮືອນຊານບ່ອນຢູ່ອາໄສໃຫ້ສະອາດຢູ່ສະເໝີ.ກໍລະນີກວດພົບເຫັນໜອນນໍ້າຢູ່ພາຊະນະໃດພາຍໃນເຮືອນຕ້ອງໄດ້ຖອກເທນໍ້າຖິ້ມ ເພື່ອທຳລາຍແຫຼ່ງເພາະພັນຂອງຍຸງລາຍນັ້ນເອງ.

ບ້ານຂຸ່ມສ້ຽວ ນອນຢູ່ໃນ 14 ບ້ານເຂດແດງ,ໝາຍວ່າເປັນບ້ານທີ່ມີຄົນເຈັບໄຂ້ຍຸງລາຍ 1 ກໍລະນີຂື້ນໄປ ເຊິ່ງກ່ອນໜ້ານີ້ໄຂ້ຍຸງລາຍໄດ້ລະບາດໜັກຢູ່ບ້ານປົ່ງແດງ ແຕ່ມາຮອດປັດຈຸບັນສາມາດຄວບຄຸມໄດ້ແລ້ວ. ມາມື້ກ່ອນໄດ້ປະກົດມີ 1 ກໍລະນີຢູ່ບ້ານຂຸ່ມສ້ຽວ ຈຶ່ງໄດ້ພ້ອມກັນຕອບຕ້ານກັບພະຍາດດັ່ງກ່າວ ແລະ ຈະສ້າງຂະບວນການອະນາໄມລວມບ້ານທຸກໆອາທິດ.

ສະເພາະການອອກແຮງງານລວມຄັ້ງນີ້,ມີຈຳນວນພົນທັງໝົດ 140 ກ່ວາຄົນ,ຍິງ 90 ກ່ວາຄົນແລະນຳໃຊ້ລົດຊິ້ງຂົນດິນຈຳນວນ 16 ຄັນ.ທັງນີ້,ເພື່ອປະຕິບັດແຈ້ງການຂອງປະທານຄະນະກຳມະການຕ້ານ-ສະກັດກັ້ນ ແລະ ຄວບຄຸມພະຍາດຕິດຕໍ່ຂັ້ນເມືອງ ສືບຕໍ່ຊີ້ນຳ-ນຳພາພໍ່ແມ່ປະຊາຊົນໃນທົ່ວເມືອງ ສ້າງຂະບວນການ ອະນາໄມລວມບ້ານ,ອະນາໄມຢູ່ແຕ່ລະຄອບຄົວ ແລະ ທຳລາຍແຫຼ່ງເພາະພັນຂອງຍຸງລາຍ ແນ່ໃສ່ເພື່ອຕອບຕ້ານພະຍາດໄຂຍຸງລາຍໃຫ້ໝົດໄປຢ່າງສິ້ນເຊີງ.