ປະຊາຊົນ 5 ບ້ານ ເມືອງຫີນບູນ ຍັງພົບກັບສະພາບນໍ້າຖ້ວມທີ່ຢູ່ອາໃສ ມາຫຼາຍມື້ແລ້ວ

ຄໍາມ່ວນ: ທ່ານ ຄຳຜຸຍ ທອນພັກດີ ເຈົ້າເມືອງໆຫີນບູນ ລາຍງານກ່ຽວກັບສະພາບນ້ຳຖ້ວມໃນທົ່ວເມືອງໃຫ້ຮູ້ວ່າ: ສຳລັບເມືອງຫີນບູນ ແມ່ນໄດ້ພົບກັບສະພາບນ້ຳຖ້ວມເນື້ອທີ່ນາຂອງປະຊາຊົນເລີ່ມແຕ່ວັນທີ 10 ກໍລະກົດ ແລະ ຮອດວັນທີ 16 ກໍລະກົດ ແມ່ນໄດ້ເລີ່ມຖ້ວມເຮືອນຊານບ້ານຊ່ອງ ຈາກນັ້ນສະພາບນ້ຳກໍ່ໄດ້ເພີ່ມ ລະດັບສູງຂຶ້ນເລື້ອຍໆ ເຮັດໃຫ້ຫຼາຍໆບ້ານກໍ່ເລີ່ມໄດ້ຮັບຜົນກະທົບຕາມໆກັນ ຈາກອິດທິພົນຂອງພາຍຸເຂດ ຮ້ອນ ເຊິນຕິນທີ່ພັດຜ່ານປະເທດເຮົາ.

ເຊິ່ງມາຮອດວັນທີ 03 ສິງຫາ ໃນທົ່ວເມືອງແມ່ນມີຈຳນວນ ບ້ານທີ່ຖືກ ຜົນກະທົບທັງໝົດ 81 ບ້ານ, ມີ 6.800 ກວ່າຄອບຄົວ, ປະຊາຊົນ ຫຼາຍກວ່າ 43 ພັນຄົນໄດ້ຮັບຜົນກະທົບ ແລະ ເນື້ອທີ່ນາ 3.560 ເຮັກຕາ ກວມເອົາ 42,58% ຂອງຈຳນວນເນື້ອທີ່ນາໃນທົ່ວເມືອງ. ໃນນີ້ມີບ້ານທີ່ໄດ້ ຮັບຜົນກະທົບໜັກທັງໝົດ 07 ບ້ານ ແລະ ຮອດວັນທີ 03 ສິງຫາ ຈຳນວນບ້ານທີ່ຖືກກະທົບໜັກຍັງເຫຼືອ 05 ບ້ານຄື: ບ້ານນາໂພ, ໜອງບົວ, ຫີນຄັນ, ປາກປະກັນ ແລະ ບ້ານວັງຫົວປາ ທີ່ສະພາບນ້ຳຍັງຖ້ວມເຮືອນຊານຢູ່. ນອກນີ້ຍັງມີວັດວາອາຣາມ, ໂຮງຮຽນ, ເສັ້ນທາງເປ່ເພຫຼາຍຈຸດ ແລະ ສັດລ້ຽງສູນຫາຍອີກຈຳນວນໜຶ່ງ.

ບ້ານນາໂພ ໜຶ່ງໃນ 05 ບ້ານທີ່ໄດ້ຮັບຜົນກະທົບໜັກ. ເຊິ່ງທ່ານ ບຸນກົມ ໄຊຍະວົງສີ ປະທານແນວລາວ ສ້າງຊາດບ້ານນາໂພກ່າວວ່າ: ບ້ານນາໂພ ມີ 229 ຫຼັງຄາເຮືອນ, ມີ 308 ຄອບຄົວ, ມີພົນລະເມືອງ 1.581 ຄົນ. ເນື້ອທີ່ນາ 313 ເຮັກຕາ. ໃນນີ້ໄດ້ຮັບຜົນກະທົບທາງດ້ານຫຼັງຄາເຮືອນ, ຄອບຄົວ ແລະ ເນື້ອທີ່ນາຖືກຖ້ວມ 100%. ນອກນັ້ນຍັງມີສັດລ້ຽງປະເພດຄວາຍຕາຍ 01 ໂຕ, ງົວ 09 ໂຕ ແລະ ສັດປີກ 266 ໂຕ.

ທ່ານເຈົ້າເມືອງຫີນບູນກ່າວຕື່ມວ່າ: ສຳລັບສິ່ງທີ່ຈຳເປັນໃນການຂໍຄວາມຊ່ວຍເຫຼືອຂອງສັງຄົມແມ່ນເຮືອ ເພື່ອໃຊ້ເຂົ້າໃນການຍົກຍ້າຍເຄື່ອງຂອງ ແລະ ສັນຈອນໄປ-ມາ ລວມເຖິງນຳສົ່ງຄົນເຈັບໄປປິ່ນປົວຢູ່ໂຮງໝໍ ໃນເວລາທີ່ ເຈັບເປັນ.

ນອກນັ້ນກໍ່ແມ່ນປະເພດນ້ຳດື່ມ, ເຂົ້າສານ ແລະ ເຄື່ອງອຸປະໂພກ-ບໍລິໂພກຕ່າງໆ ເຊິ່ງທາງການຈັດຕັ້ງທຸກ ພາກສ່ວນກໍ່ໄດ້ໃຫ້ຄວາມຊ່ວຍເຫຼືອຢ່າງໃກ້ຊິດດ້ວຍຄວາມເປັນຫ່ວງເປັນໃຍຕໍ່ຊີວິດ ແລະ ສັບສິນຂອງພໍ່ແມ່ປະຊາຊົນ.

ພາບ-ຂ່າວ: ກອງຄຳ