ຫົວໜ້າສາທາລະນະສຸກ ຣາຊະອານາຈັກໄທ ນໍາເຄື່ອງຊ່ວຍເຫຼືອ ຜູ້ຖືກອຸທົກກະໄພ ເມືອງສະໜາມໄຊ ແຂວງອັດຕະປື ແລະ ເມືອງກະລຶມ ແຂວງເຊກອງ

0
300

ຫົວໜ້າສາທາລະນະສຸກ ຣາຊະອານາຈັກໄທ ນໍາເຄື່ອງຊ່ວຍເຫຼືອ ພ້ອມເງິນສົດ 8.115 ບາດ ມາມອບ ໃຫ້ຜູ້ຖືກອຸທົກກະໄພ ເມືອງສະໜາມໄຊ ແຂວງອັດຕະປື ແລະ ເມືອງກະລຶມ ແຂວງເຊກອງ

ໃນ ວັນທີ 3 ສິງຫາ 2018 ທ່ານ ນາງ ນິທິນັນ ພິລະໄຊສັກ ຫົວໜ້າຝ່າຍສາທາລະ ນະສຸກ ຈັ່ງຫວັດສີສະເກດ ຣາຊະອະນາຈັກໄທ ໄດ້ນໍາເອົາເຄື່ອງຊ່ວຍເຫຼືອ ບັນເທົາທຸກ ມາມອບທີ່ຫ້ອງວ່າການປົກຄອງເມືອງ ທ່າແຕງ ແຂວງ ເຊກອງ ເພື່ອນໍາສົ່ງໄປຊ່ວຍເຫຼືອຜູ້ຖືກອຸທົກກະໄພ ນໍ້າຖ້ວມ ທີ່ເມືອງສະໜາມໄຊ ແຂວງອັດຕະປື ແລະ ເມືອງກະລຶມ ແຂວງເຊກອງ ໃນທ້າຍເດືອນກໍລະກົດແລ້ວນີ້.

ໂດຍເປັນກຽດຮັບ ຂອງທ່ານ ຄໍໄພ ສິມມາວັດ ຮອງເລຂາາພັກເມືອງ ຮອງເຈົ້າເມືອງໆທ່າແຕງ , ມີພະນັກງານກ່ຽວຂ້ອງ ທັງສອງຝ່າຍເຂົ້າຮ່ວມເປັນສັກຂີພະຍານ.

ເຄື່ອງທີ່ນໍາມາມອບ ປະກອບມີ ນໍ້າດື່ມ, ອາຫານແຫ້ງ ແລະ ເຄື່ອງນຸ່ງຫົ່ມ ພ້ອມເງິນສົດ 8.115 ບາດ ລວມມູນຄ່າ ທັງໝົດ 3 ໝື່ນກວ່າບາດ ເທົ່າກັບ 7 ລ້ານ 8 ແສນ ກ່ວາກີບ. ເພື່ອນໍາສົ່ງໄປຊ່ວຍເຫຼືອ ຜູ້ຖືກອຸທົກກະໄພ ປະສົບໄພນໍ້າຖ້ວມ ຂອງຊາຊົນ ເມືອງກະລຶມ ແຂວງເຊກອງ ແລະ ປະຊາຊົນເມືອງ ສະໜາມໄຊ ແຂວງ ອັດຕະປື ທີ່ຖືກຜົນກະທົບ ເສຍຫາຍຈໍານວນບໍ່ໜ້ອຍ,ສະນັ້ນ ເພື່ອແບ່ງເບົາບັນເທົາທຸກໃຫ້ກັບປະຊາຊົນ ທີ່ຖືກເຄາະຮ້າຍ ໃນສອງເມືອງຂອງສອງແຂວງຄື: ອັດຕະປື ແລະ ເຊກອງ, ເພື່ອຟື້ນຟູຊີວິດຈິດໃຈຂອງປະຊາຊົນ ໃຫ້ຄືນສູ່ສະພາບປົກກະຕິໂດຍໄວ.

ທັງໝົດນີ້ ກໍແມ່ນສະແດງເຖິງນໍ້າໃຈ ສາມັກຄີ ຊ່ວຍເຫຼືອເຊິ່ງກັນ ແລະ ກັນ ຂອງພີ່ນ້ອງບ້ານໃກ້ເຮືອນຄຽງ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ກັບ ຣາຊະອານາຈັກໄທ ທີ່ເຄີຍໃຫ້ການຊ່ວຍເຫຼືອເຊິ່ງກັນ ແລະ ກັນຕະຫຼອດມາ ໃນດ້ານຕ່າງໆ.

ຂ່າວ ສະຫຍາມ ຈັນທະສອນ

ພາບ ພອນ ບຸນນອຸທິດ