ປະກາດດ່ວນ! ຕ້ອງການອາສາ ຊ່ວຍແຍກເຄື່ອງບໍລິຈາກ ໄປຊ່ວຍຜູ່ປະສົບໄພນໍ້າຖ້ວມ ທົ່ວປະເທດ

0
220

ຍັງຕ້ອງການແຮງງານເພີ່ມ ເພື່ອມາຊ່ວຍແຍກເຄື່ອງທີ່ໄດ້ຮັບການບໍລິຈາກ

ຂປລ. ໃນປະຈຸບັນ ກະຊວງແຮງງານ ແລະ ສະຫວັດດີການສັງຄົມ (ຮສສ) ຍັງຕ້ອງການແຮງງານ ຫລື ຈິດອາສາ ເພີ່ມຕື່ມ ເພື່ອມາຊ່ວຍໄຈ້ແຍກເຄື່ອງບໍລິຈາກ ຫລັງຈາກທີ່ໄດ້ຮັບເຄື່ອງຈາກຜູ້ບໍລິຈາກທັງພາຍໃນ ແລະ ຕ່າງປະເທດ ເປັນຈຳນວນຫລວງຫລາຍ ໃນໄລຍະແຕ່ວັນທີ 24 ກໍລະ ກົດ 2018 ເປັນຕົ້ນມາ.

ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ

ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງ ຮສສ ໄດ້ໃຫ້ສຳພາດຕໍ່ນັກຂ່າວ ໃນວັນທີ 4 ສິງຫາ 2018 ໃນໂອກາດ ທີ່ທ່ານໄດ້ລົງກວດກາເບິ່ງເຄື່ອງທີ່ໄດ້ຮັບ ຈາກການບໍລິຈາກ ທີ່ສາງເກັບມ້ຽນເຄື່ອງຫລັກ 17 ຂອງກະຊວງແຮງງານ ແລະ ສະຫວັດດີການສັງຄົມ ຢູ່ບ້ານດ່ານຊ້າງ ເມືອງໄຊທານີ ນະຄອນຫລວງວຽງຈັນ ນີ້ວ່າ: ປັດຈຸບັນ ເຄື່ອງບໍລິຈາກທີ່ຢູ່ໃນສາງດັ່ງກ່າວ, ແມ່ນມີຈຳນວນຫລວງຫລາຍ ທີ່ໄດ້ຮັບການຊ່ວຍເຫລືອຈາກຫລາຍພາກສ່ວນທັງພາຍໃນ ແລະ ຕ່າງປະເທດ ເປັນຕົ້ນ ເຄື່ອງນຸ່ງຫົ່ມ, ເຄື່ອງອຸປະໂພກບໍລິໂພກ ໂດຍສະເພາະນ້ຳດື່ມ, ເຮືອ, ເຕັ້ນ ແລະ ວັດຖຸອຸປະກອນ ອື່ນໆ ມື້ໜຶ່ງມີເຄື່ອງເຂົ້າມາບໍ່ຫລຸດ 4-6 ຄັນລົດຕູ້ຄອນເທັນເນີ້. ສະນັ້ນ ເຮັດໃຫ້ກຳລັງແຮງງານ ທີ່ມາຊ່ວຍໄຈ້ແຍກເຄື່ອງ ແມ່ນບໍ່ພຽງພໍ ສຳລັບກຳລັງແຮງງານໃນວັນລັດຖະການ ມີພຽງແຕ່ 50-60 ຄົນ, ວັນເສົາ-ອາທິດ ມີປະມານ 100 ຄົນ ເພາະວ່າມີແຕ່ພະນັກງານພາຍໃນກະຊວງ ຮສສ ເທົ່ານັ້ນ.

ອາສາ ກຳລັງຊ່ວຍກັນ ແຍກເຄື່ອງຂອງທີ່ໄດ້ຮັບມາຈາກ ຜູ່ໃຈບຸນ

ປັດຈຸບັນ, ເຄື່ອງບໍລິຈາກຕ່າງໆ ທີ່ຢູ່ໃນສາງມ້ຽນເຄື່ອງນະຄອນຫລວງວຽງຈັນ, ຈຳປາສັກ, ອັດຕະປື, ເມືອງສະໜາມໄຊ ແລະ ຢູ່ບັນດາແຂວງຕ່າງໆ ມີຈຳນວນຫລວງຫລາຍ ທີ່ຍັງບໍ່ທັນໄດ້ໄຈ້ແຍກ ແລະ ຕ້ອງການແຮງງານປະມານ 200-300 ຄົນ ເພື່ອມາຊ່ວຍແຍກເຄື່ອງດັ່ງກ່າວ. ສະນັ້ນຈຶ່ງຂໍຄວາມຮ່ວມມື ແລະ ຂໍເຊີນຊວນມາຍັງພະນັກງານ, ທະຫານ, ຕຳຫລວດ, ບັນດາກະຊວງຕ່າງໆ ຫລື ຜູ້ທີ່ມີຈິດອາສາທີ່ມີເວລາຫວ່າງ ຢາກເຂົ້າມາຊ່ວຍແຍກເຄື່ອງດັ່ງກ່າວ ໃຫ້ແຈ້ງມາຍັງກະຊວງ ຮສສ ຂອງພວກເຮົາໄດ້ ທີ່ສາຍດ່ວນໂທ: 1511; 1522.

ທ່ານລັດຖະມົນຕີ ກໍ່ລົງມືຊ່ວຍ ແຍກເຄື່ອງ

ໃນໂອກາດດຽວກັນ, ທ່ານ ຄຳແພງ ໄຊສົມແພງ ຍັງໄດ້ຮຽກຮ້ອງໃຫ້ຜູ້ບໍລິຈາກທຸກພາສ່ວນ ຄວນໄຈ້ແຍກເຄື່ອງໃຫ້ເປັນລະບຽບກ່ອນມາບໍລິຈາກ ເພື່ອໃຫ້ມັນສະດວກ ແລະ ບໍ່ເປັນການເສຍເວລາມາໄຈ້ແຍກເຄື່ອງຄືນ ໃນການສົ່ງຕໍ່ໄປ ຫລື ນຳໄປມອບໃຫ້ແກ່ປະຊາຊົນທີ່ປະສົບໄພ ຫລື ຜູ້ທີ່ມີຄວາມຕ້ອງການຢູ່ໃນທົ່ວປະເທດ ໂດຍສະເພາະ ແຂວງ ອັດຕະປື.

ຂ່າວ: ມະນີທອນ

ອາສາ ພ້ອມໃຈກັນແຍກເຄື່ອງຂອງ