ສະຫລອງວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 91 ປີ

    0
    213

    ​ໃນ​ວັນ​ທີ 6 ສິງຫາ 2018, ສະຖານ​ເອກ​ອັກຄະ​ລັດຖະທູດ​ຈີນ ປະຈຳ​ນະຄອນຫລວງ​ວຽງ​ຈັນ ​ໄດ້​ຈັດ​ງານ​ລ້ຽງສະເຫລີມສະຫລອງວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 91 ປີ (1 ສິງຫາ 1927-1 ສິງຫາ 2018) ​ໂດຍ​ການ​ເຂົ້າ​ຮ່ວມ​ຂອງ ພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ​ແລະ ທ່ານ ຫວາງ ເວີນ ທ່ຽນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳລາວ.

     

    ໂອກາດນີ້, ພັນເອກພິເສດ ເສີນ ຢົງຈິງ ທີ່ປຶກສາການທະຫານສະຖານທູດ ສປ ຈີນ ປະຈຳ ສປປ ລາວ ໂດຍຕາງໜ້າກອງທັບປົດປ່ອຍປະຊາຊົນຈີນ ແລະ ສະຖານທູດຈີນ ກ່າວສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຂອບໃຈດ້ວຍຄວາມຈິງໃຈ ມາຍັງບັນດາແຂກຜູ້ມີກຽດເຂົ້າຮ່ວມທັງຫລາຍ.

    ການລຸກຮື້ຂຶ້ນໃນວັນທີ 1 ສິງຫາ 1927 ໄດ້ເປັນຂີດໝາຍກຳເນີດຂອງກອງທັບປະຊາຊົນແບບໃໝ່ ທີ່ສ້າງຕັ້ງ ແລະ ນຳພາໂດຍ ພັກກອມມູນິດຈີນ. ຕະຫລອດ 91 ປີທີ່ຜ່ານມາ, ກອງທັບປົດປ່ອຍປະຊາຊົນຈີນ ບາກບັ່ນຕໍສູ້ຢ່າງເດັດດ່ຽວໜຽວແໜ້ນ ​ແລະ ໄດ້ສ້າງຜົນງານອັນຍິ່ງໃຫຍ່ໃຫ້ແກ່ໄຊຊະນະແຫ່ງການປະຕິວັດ, ການສະຖາປະນາສາທາລະນະລັດ ກໍຄືພາລະກິດສ້າງສັງຄົມນິຍົມຂອງ ສປ ຈີນ.

    ສອງຊາດ ຈີນ-ລາວ ມີສາຍພູສາຍນໍ້າຕິດຈອດກັນ, ເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ.

    ໃນເດືອນພະຈິກ 2017 ແລະ ເດືອນ ພຶດສະພາ 2018, ທ່ານ ສີ ຈີ້ນຜິງ ປະທານປະເທດຈີນ ແລະ ທ່ານ ບຸນຍັງ ວໍລະຈິດ ປະທານປະເທດລາວ ໄດ້ຜັດປ່ຽນຢ້ຽມຢາມເຊິ່ງກັນ ແລະ ກັນ, ​ເຊິ່ງສອງຝ່າຍໄດ້ບັນລຸຄວາມເອກະພາບຕໍ່ການຮ່ວມມືກັນກໍ່ສ້າງຄູ່ຮ່ວມສະຕາກຳຈີນ-ລາວ ແລະ ຕັ້ງໜ້າຊຸກຍູ້ປະຕິບັດ ເຊິ່ງແທດເໝາະກັບຜົນປະໂຫຍດຮາກຖານ ແລະ ຄວາມປາຖະໜາຂອງປະຊາຊົນສອງຊາດຈີນ-ລາວ.

    ພາຍໃຕ້ການເອົາໃຈໃສ່ ແລະ ຊຸກຍູ້ສົ່ງເສີມຂອງການນຳສອງພັກ, ສອງລັດ ແລະ ສອງກອງທັບ, ສອງກອງທັບຈີນ-ລາວ ​ໄດ້ຖະນຸຖະໜອມ ແລະ ຮັດແໜ້ນມິດຕະພາບອັນເລິກເຊິ່ງທີ່ຜູກໂດຍເລືອດເນື້ອ, ເສີມຂະຫຍາຍມູນເຊື້ອຄວາມສາມັກຄີ ແລະ ຊ່ວຍເຫລືອກັນ, ພ້ອມ​ທັງດຳເນີນການຮ່ວມມືຢ່າງກວ້າງຂວາງ ແລະ ເລິກເຊິ່ງ ເຊິ່ງໄດ້ປະກອບສ່ວນຢ່າງສຳຄັນເຂົ້າໃນການເສີມຂະຫຍາຍສາຍພົວພັນສອງຊາດລາວ-ຈີນ.

    ໃນປີນີ້, ສອງກອງທັບຈີນ-ລາວ ໄດ້ມອບ-ຮັບໂຄງການສະໜາມແຂ່ງຂັນຍິງປືນອາຊຽນ ​ແລະ ຕຶກປິ່ນປົວທົ່ວໄປ 9 ຊັ້ນຂອງໂຮງໝໍ 103 ທີ່ສອງຝ່າຍຮ່ວມມືກັນກໍ່ສ້າ​ງ. ໃນ​ເງື່ອນ​ໄຂ​ຍຸກ​ສະ​ໄໝ​ໃໝ່, ກອງທັບປົດປ່ອຍປະຊາຊົນຈີນ ຍິນ​ດີ​ຈະ​ຮ່ວມ​ກັບກອງທັບປະຊາຊົນລາວ ຖານ​ສະຫາຍ​ອ້າຍ​ນ້ອງ ​ເພື່ອ​ເພີ່​ມທະວີ​ການ​ແລກປ່ຽນ ​​ແລະ ການ​ຮ່ວມ​ມື​ທາງ​ດ້ານ​ການ​ທະຫານ ​ເພື່ອ​ປະກອບ​ສ່ວນ​ຢ່າ​ງຕັ້ງໜ້າ​ເຂົ້າ​​ໃນ​ການ​​ເສີມ​ສ້າງ​ຄູ່​ຮ່ວມ​ສະ​ຕາ​ກຳ ຈີນ-ລາວ ທີ່​ມີ​ຄວາມ​ໝາຍ​ຍຸດ​ທະ​ສາດ, ລວມທັງ​ສົ່ງ​ເສີມ​ການ​​ແລກປ່ຽນ​ຮ່ວມ​ມື​ດ້ານ​ປ້ອງ​ກັນຊາ​ດ.

    ຂ່າວ: ສິງ​ຄຳ, ພາບ: ​ເກດ​ສະໜາ (ຂປລ)