ຢາກໃຫ້ທຸກທ່ານໄດ້ອ່ານແລະຕິດຕາມ! ຜົນຂອງກອງປະຊຸມລັດຖະບານສະໄໝວິສາມັນ ປະຈໍາເດືອນສິງຫາ 2018

0
712

ລັດຖະບານໄດ້ຈັດກອງປະຊຸມວິສາມັນຂຶ້ນໃນວັນທີ 6-7 ສິງຫາ 2018 ໂດຍການເປັນປະທານ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ໂດຍໃຊ້ເວລາ 2 ມື້.

ຈຸດປະສົງຕົ້ນຕໍແມ່ນເພື່ອຮັບຟັງບົດລາຍງານຂອງຄະນະສະເພາະກິດ ແກ້ໄຂໄພພິບັດລະດັບຊາດ, ແກ້ໄຂໄພພິບັດເຂື່ອນເຊປຽນ-ເຊນ້ຳນ້ອຍແຕກ, ເຊິ່ງເປັນເຫດໃຫ້ເກີດຜົນກະທົບຢ່າງຮ້າຍແຮງຕໍ່ເມືອງສະໜາມໄຊ. ຜ່ານການຮັບຟັງບົດລາຍງານຂອງທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ປະທານຄະນະກຳມະການສະເພາະກິດແກ້ໄຂໄພພິບັດລະດັບຊາດ ກ່ຽວກັບສະພາບ ແລະ ທິດທາງການແກ້ໄຂໄພພິບັດ ຢູ່ແຂວງອັດຕະປື ແລະ ສະພາບນໍ້າຖ້ວມ ໃນຂອບເຂດທົ່ວປະເທດ, ບັນດາສະມາຊິກລັດຖະບານ ໄດ້ອອກຄຳຄິດຄໍາເຫັນ ແລະ ປຶກສາຫາລືກັນ ຢ່າງມີຄວາມຮັບຜິດຊອບສູງ ຕະຫຼອດສອງວັນທີ່ຜ່ານມາ, ກອງປະຊຸມໄດ້ພິຈາລະນາຢ່າງຖີ່ຖ້ວນ ແລະ ຕົກລົງເອົາມາດຕະການຕ່າງໆ ໃນການແກ້ໄຂບັນຫາຕໍ່ໄປ ດັ່ງນີ້:

1. ຕົກລົງໃຫ້ທຸກພາກສ່ວນທີ່ກ່ຽວຂ້ອງສຸມທຸກຄວາມພະຍາຍາມ ແລະ ນຳໃຊ້ກໍາລັງແຮງພາຍໃນທີ່ພວກເຮົາມີຢູ່ ໂດຍສົມທົບກັບກຳລັງຊ່ວຍເຫຼືອ ຈາກບັນດາປະເທດເພື່ອນມິດ ເພື່ອສືບຕໍ່ຊອກຄົ້ນຫາຜູ້ສູນຫາຍ ທີ່ອາດຈະຍັງມີຊີວິດຢູ່ ແລະ ນຳເອົາມາທີ່ປອດໄພ; ພ້ອມດຽວກັນນັ້ນ ໃຫ້ສືບຕໍ່ຄົ້ນຫາຜູ້ທີ່ເສຍຊີວິດໃຫ້ພົບເຫັນ ແລະ ເກັບກູ້ສົບເອົາມາໃຫ້ໄດ້ໄວເທົ່າທີ່ຈະໄວໄດ້ ເພື່ອນຳມາສັນນະສູດ ແລະ ຈັດພິທີຕາມຮີດຄອງປະເພນີ;

2. ສືບຕໍ່ສ້າງສະຖານທີ່ພັກເຊົາໃຫ້ປະຊາຊົນທີ່ປະສົບໄພ ເຊິ່ງໄດ້ອົບພະຍົບມາເຕົ້າໂຮມກັນທີ່ສູນຕ່າງໆນັ້ນໃຫ້ໄວ ແລະ ພຽງພໍກັບຄວາມຕ້ອງການທີ່ຈຳເປັນ ໃນເບື້ອງຕົ້ນ ແລະ ເພື່ອໃຫ້ກ້າວສູ່ຄວາມສະຫງົບ ແລະ ຄວາມເປັນລະບຽບຮຽບຮ້ອຍເປັນກ້າວໆ. ສືບຕໍ່ເບິ່ງແຍ່ງປະຊາຊົນທີ່ປະສົບໄພ ໂດຍສະເພາະແມ່ນໃຫ້ມີອາຫານ-ການກິນ, ນໍ້າດື່ມ-ນ້ຳໃຊ້, ດູແລສຸຂະພາບ, ປ້ອງກັນບໍ່ໃຫ້ເກີດພະຍາດລະບາດ, ປົວແປງທາງດ້ານຈິດໃຈ ແລະ ສືບຕໍ່ຊ່ວຍສົງເຄາະ ແລະ ເຮັດວຽກງານສະຫວັດດີການອື່ນໆ ;

3. ສືບຕໍ່ຈັດແຈງ, ຈັດສົ່ງ ແລະ ແຈກຍາຍອຸປະກອນເຄື່ອງມື ແລະ ເຄື່ອງຊ່ວຍເຫຼືອບັນເທົ່າທຸກ ທີ່ມີຄວາມຕ້ອງການຈຳເປັນຮີບດ່ວນ, ສ້າງເງື່ອນໄຂໃຫ້ປະຊາຊົນໄດ້ມີຊີວິດຢູ່ຢ່າງປອດໄພ, ສ້າງສາທາລະນຸປະໂພກ ໃຫ້ປະຊາຊົນ ໃຫ້ມີຄວາມສະດວກຍິ່ງຂຶ້ນ. ພ້ອມດຽວກັນນັ້ນ ກໍ່ສືບຕໍ່ຄຸ້ມຄອງເຄື່ອງບັນເທົ່າທຸກ ແລະ ແຈກຍາຍໃຫ້ທົ່ວເຖິງ, ຄຸ້ມຄອງເງິນຊ່ວຍເຫຼືອ ແລະ ນໍາໃຊ້ຢ່າງຮັດກຸມ, ໂປ່ງໃສ ແລະ ສາມາດກວດກາ-ຄຸ້ມຄອງໄດ້ ;

4. ກອງປະຊຸມຕົກລົງແຕ່ງຕັ້ງຄະນະສືບສວນ-ສອບສວນ ຄະນະໜຶ່ງຂຶ້ນ ໂດຍມອບໃຫ້ທ່ານ ບຸນທອງ ຈິດມະນີ, ຮອງນາຍົກລັດຖະມົນຕີ, ປະທານອົງການກວດກາລັດຖະບານ ເປັນຫົວໜ້າຄະນະ. ຄະນະຮັບຜິດຊອບສືບສວນ-ສອບສວນນີ້ ສາມາດຮັບເອົາການຊ່ວຍເຫຼືອທາງດ້ານການເງິນ, ເຕັກນິກ ແລະ ຊ່ຽວຊານ ຈາກຕ່າງປະເທດ ທີ່ມີມາດຕະຖານສາກົນ ມາຊ່ວຍພິສູດ, ກວດກາທາງດ້ານເຕັກນິກ, ຊອກໃຫ້ເຫັນສາເຫດທີ່ພາໃຫ້ມີການແຕກຫັກຂອງເຂື່ອນ ແລະ ຍັງສາມາດເຊີນຕົວແທນຂອງລັດຖະບານ ຂອງປະເທດທີ່ມີບໍລິສັດຜູ້ປະກອບການ ແລະ ຂາຫຸ້ນ ທີ່ຈົດທະບຽນຢູ່ ມາໃຫ້ຄຳປຶກສາ ຫຼື ສັງເກດການໄດ້, ທັງນີ້ກໍ່ເພື່ອແນ່ໃສ່ເຮັດໃຫ້ການສືບສວນ-ສອບສວນ ມີຄຸນນະພາບສູງ, ມີຄວາມໂປ່ງໃສ ແລະ ເປັນທີ່ຍອມຮັບຕໍ່ທັງພາຍໃນ ແລະ ຕ່າງປະເທດ. ພາຍຫຼັງທີ່ມີຜົນການສືບສວນ-ສອບສວນອອກມາແລ້ວ ຈຶ່ງດຳເນີນການໃນບາດກ້າວຕໍ່ໆໄປ. ພ້ອມດຽວກັນນັ້ນ, ກອງປະຊຸມ ກໍ່ໄດ້ຕົກລົງແຕ່ງຕັ້ງ ຄະນະກໍາມະການລະດັບສູງຂອງລັດຖະບານ ເພື່ອກວດກາເຖິງຄວາມຮັບຜິດຊອບ ຂອງເຈົ້າໜ້າທີລັດ ທີ່ກ່ຽວຂ້ອງກັບການອະນຸມັດການກໍ່ສ້າງ ຕະຫຼອດເຖິງການເຕືອນໄພລ່ວງໜ້າຕ່າງໆ ທີ່ພົວພັນກັບ ເລື່ອງທີ່ເກີດຂຶ້ນນີ້ ພາຍໃຕ້ການຊີ້ນຳຂອງທ່ານຮອງນາຍົກລັດຖະມົນຕີ ບຸນທອງ ຈິດມະນີ, ປະທານອົງການກວດກາລັດຖະບານ;

5. ກອງປະຊຸມຕົກລົງໃຫ້ຄະນະກຳມະການສະເພາະກິດ ແກ້ໄຂໄພພິບັດລະດັບຊາດ ແຕ່ງຕັ້ງຄະນະ ເພື່ອດຳເນີນການ ປະເມີນຜົນເສຍຫາຍ ແລະ ຜົນກະທົບຂອງໄພພິບັດ ຄັ້ງນີ້ໂດຍໄວ. ຄ່ຽງຄູ່ກັນນີ້, ກໍ່ໃຫ້ຄະນະດັ່ງກ່າວສ້າງຕັ້ງໜ່ວຍງານໜຶ່ງຂຶ້ນ ເພື່ອສ້າງແຜນຟື້ນຟູໄພພິບັດທັງສະເພາະໜ້າ ແລະ ຍາວນານ ເພື່ອລາຍງານລັດຖະບານ ແລະ ກຳນົດບູລິມະສິດຂອງການລົງທຶນ, ຈັດສັນງົບປະມານ ແລະ ເລີ່ມລົງມືດໍາເນີນການຟື້ນຟູໂດຍໄວ ພາຍຫຼັງນ້ຳລົດລົງ ;

6. ຕົກລົງແຕ່ງຕັ້ງຄະນະຮັບຜິດຊອບກວດກາຄືນ ທາງດ້ານເຕັກນິກ ແລະ ຄຸນນະພາບ ໃນການກໍ່ສ້າງ ແລະ ພັດທະນາເຂື່ອນຕ່າງໆ ທີ່ກຳລັງກໍ່ສ້າງ ແລະ ກໍ່ສ້າງສຳເລັດແລ້ວ ໃນທົ່ວປະເທດຂອງພວກເຮົາ ໂດຍມອບໃຫ້ກະຊວງພະລັງງານ ແລະ ບໍ່ແຮ່ ເປັນເຈົ້າການ ສົມທົບກັບກະຊວງໂຍທາທິການ ແລະ ຂົນສົ່ງ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງວິທະຍາສາດ ແລະ ເຕັກໂນໂລຊີ, ແລະ ຊ່ຽວຊານຈາກສາກົນ; ຖ້າກວດພົບສິ່ງຜິດປົກກະຕິໃນການອອກແບບ ຫຼື ໃນມາດຕະຖານກໍ່ສ້າງ ກໍ່ໃຫ້ມີການລາຍງານໃຫ້ລັດຖະບານ ເປັນແຕ່ລະກໍລະນີ ເພື່ອຫາມາດຕະການປັບປຸງແກ້ໄຂ. ພ້ອມກັນນີ້, ລັດຖະບານຈະໃຫ້ໂຈະຊົ່ວຄາວໃນການພິຈາລະນາຮັບເອົາການສະເໜີໂຄງການໃໝ່ໄວ້ກ່ອນ ເພື່ອສຶກສາຄືນໃໝ່ຍຸດທະສາດ ແລະ ແຜນພັດທະນາເຂື່ອນໄຟຟ້າ ໃນ ສປປ ລາວ ຕໍ່ໄປ ເພື່ອເປັນບ່ອນອີງໃຫ້ການດຳເນີນການຕໍ່ໄປ;

7. ຍ້ອນວ່າໃນໄລຍະນີ້ ໃນທົ່ວປະເທດກຳລັງຖືກຄຸກຄາມຈາກໄພນ້ຳຖ້ວມ ຈຶ່ງໃຫ້ຄະນະກຳມະການປ້ອງກັນ ແລະ ຄຸ້ມຄອງໄພພິບັດແຫ່ງຊາດ ສືບຕໍ່ຕິດຕາມ, ກວດກາ ແລະ ສະຫຼຸບລາຍງານສະພາບນ້ໍາຖ້ວມ ໃນຂອບເຂດທົ່ວປະເທດຢ່າງເປັນປະຈຳ ພ້ອມທັງຮີບຮ້ອນ ປະສານງານກັບທ້ອງຖິ່ນ ເພື່ອໃຫ້ການຊ່ວຍເຫຼືອແກ່ປະຊາຊົນຢ່າງທັນການ. ພ້ອມນີ້, ກໍ່ໃຫ້ສືບຕໍ່ເອົາໃຈໃສ່ຕິດຕາມ ສະພາບດິນຟ້າອາກາດ ໃນຂອບເຂດທົ່ວປະເທດ ແລະ ແຈ້ງເຕືອນໄພພິບັດ ໃຫ້ທົ່ວເຖິງ ແລະ ທັນການ, ໂດຍມອບໃຫ້ຂະແໜງການ ແລະ ທ້ອງຖິ່ນ ເອົາໃຈໃສ່ ແລະ ກຽມຄວາມພ້ອມໃນການເຄື່ອນຍ້າຍປະຊາຊົນ; ຖ້າຫາກສະພາບຄວາມສ່ຽງໄພກໍ່ໃຫ້ມີການເຕືອນໄພ ລ່ວງໜ້າຢ່າງທັນການ, ຂໍໃຫ້ພາກສ່ວນທີ່ກ່ຽວຂ້ອງຈົ່ງເຝົ້າລະວັງ, ແລະ ຢູ່ປະຈໍາການ ທີ່ທຸກໆເຂື່ອນໄຟຟ້ານ້ໍ້າຕົກ ໃນທົ່ວປະເທດ, ແລະ ຂໍໃຫ້ມີການຈັດການ ການບໍລິຫານ ນ້ໍາຢູ່ເຂື່ອນຕ່າງໆ ຢ່າງເໝາະສົມ ເພື່ອປ້ອງກັນອຸປະຕິເຫດ ບໍ່ໃຫ້ເກີດຂຶ້ນໄດ້ ;

8. ກອງປະຊຸມລັດຖະບານສະໄໝວິສາມັນຄັ້ງນີ້ ໄດ້ສະແດງຄວາມຂອບອົກຂອບໃຈ ຕໍ່ບັນດາປະເທດເພື່ອນມິດ ທັງຢູ່ໃກ້ ແລະ ຢູ່ໄກ ແລະ ອົງການຈັດຕັ້ງສາກົນຕ່າງໆ ຕໍ່ກັບຄວາມຫ່ວງໄຍ, ແລະ ກໍາລັງໃຈ, ພ້ອມທັງ ການສະໜັບສະໜູນ ແລະ ການໃຫ້ຄວາມຊ່ວຍເຫຼືອທາງດ້ານທຶນຮອນ, ເຄື່ອງອຸປະກອນ ແລະ ເຄື່ອງອຸປະໂພກ-ບໍລິໂພກ ທີ່ຈຳເປັນ ຢ່າງທັນກັບສະພາບການ ແກ່ລັດຖະບານ ແລະ ປະຊາຊົນລາວ ເພື່ອຊ່ວຍແກ້ໄຂສຸກເສີນແກ່ຜູ້ປະສົບກັບໄພພິບັດ ໃນຄັ້ງນີ້. ຂໍສະແດງຄວາມຂອບໃຈ ເປັນພິເສດ ຕໍ່ໜ່ວຍກູ້ໄພ ແລະ ອາສະສະໝັກຈາກປະເທດເພື່ອນມິດ ໂດຍສະເພາະຈາກ ສສ. ຫວຽດນາມ, ສປ. ຈີນ, ຣາຊະອານາຈັກໄທ, ສ. ເກົາຫຼີ, ສ. ສິງກະໂປ ແລະ ປະເທດອື່ນໆ ທີ່ມາສົມທົບກັບໜ່ວຍກູ້ໄພພາຍໃນປະເທດຂອງພວກເຮົາ ດຳເນີນການກູ້ໄພ ແລະ ຊ່ວຍເຫຼືອຜູ້ປະສົບໄພ ດ້ວຍຄວາມເສຍສະຫຼະ, ໂທລະຫົດ-ອົດທົນ ແລະ ດ້ວຍຈິດໃຈມະນຸດສະທຳອັນສູງສົງ; ປະຊາຊົນລາວບັນດາເຜົ່າສຸດທິຊາບຊື້ງ, ຂອບໃຈ ແລະ ຮູ້ບຸນຄຸນຢ່າງສູງ ຕໍ່ນ້ຳໃຈໄມຕີຈິດດັ່ງກ່າວ ຢ່າງບໍ່ມີວັນຈະຫຼົງລືມໄດ້;

9. ກອງປະຊຸມຂໍສະແດງຄວາມຂອບໃຈ ຕໍ່ປະຊາຊົນລາວບັນດາເຜົ່າໃນຂອບເຂດທົ່ວປະເທດ ທີ່ໄດ້ມີຄວາມຫ່ວງໄຍ ຢ່າງຈົດຈໍຕໍ່ເຫດການໃນຄັ້ງນີ້ ແລະ ໄດ້ເສຍສະລະ ທັງກຳລັງຊັບ ແລະ ກຳລັງແຮງ ຂອງທຸກໆຄົນ ສຸມໃສ່ຊ່ວຍເຫລືອ ດ້ວຍຄວາມເຫຼື່ອມໃສຢ່າງແທ້ຈິງ.

ຂໍຍ້ອງຍໍສັນລະເສີນ ກຳລັງທະຫານ, ກໍາລັງຕໍາຫຼວດ, ໜ່ວຍອາສາສະໝັກ, ແພດ-ໝໍ, ນັກຂ່າວ ແລະ ສື່ມວນຊົນທັງພາຍໃນ ແລະ ຕ່າງປະເທດ; ຂໍຊົມເຊີຍບັນດາພະນັກງານ-ລັດຖະກອນ, ທຸກໆອົງການຈັດຕັ້ງພັກ-ລັດ, ອົງການ ຈັດຕັ້ງມະຫາຊົນ, ແນວລາວສ້າງຊາດ, ຜູ້ປະກອບການ, ນັກທຸລະກິດ, ຄູບາອາຈານ, ນັກສິນລະປິນ ແລະ ປະຊາຊົນລາວທຸກຫົນແຫ່ງທັງພາຍໃນ ແລະ ຕ່າງປະເທດ ທີ່ໄດ້ປະກອບສ່ວນ ແລະ ສະແດງອອກເຖິງກຳລັງແຮງ ແຫ່ງຄວາມສາມັກຄີ ເປັນຈິດໜຶ່ງໃຈດຽວ ໃນການຊ່ວຍເຫຼືອປະຊາຊົນລາວ ທີ່ໄດ້ຮັບຜົນກະທົບຈາກໄພພິບັດ ໃນຄັ້ງນີ້ ຊຶ່ງເປັນການແບ່ງເບົາເຫດການຄັ້ງນີ້ໃຫ້ຫຼຸດຜ່ອນລົງ.

ຂໍສະແດງຄວາມຮູ້ບຸນຄຸນ ຕໍ່ສະຫາຍເລຂາທີການໃຫຍ່, ປະທານປະເທດ ບຸນຍັງ ວໍລະຈິດ ທີ່ໄດ້ໃຫ້ການເອົາໃຈໃສ່ຊີ້ນຳ ແລະ ໃຫ້ກຳລັງໃຈ ຕໍ່ຜູ້ປະຕິບັດໜ້າທີຢ່າງໃກ້ຊິດ; ຂໍຂອບໃຈຕໍ່ບັນດາສະຫາຍ ກຳມະການກົມການເມືອງ ແລະ ຄະນະເລຂາທິການສູນກາງພັກ, ພັກນັກງານອາວຸໂສ, ບັນດາທ່ານລັດຖະມົນຕີ, ອົງການປົກຄອງທ້ອງຖິ່ນ, ໂດຍສະເພາະແມ່ນແຂວງອັດຕະປື ທີ່ໄດ້ໃຫ້ຄວາມເອົາໃຈໃສ່ຕິດຕາມ, ຊີ້ນໍາ ການປະຕິບັດໜ້າທີ່ຂອງລັດຖະບານ; ຂໍຂອບໃຈຕໍ່ສະມາຊິກສະພາແຫ່ງຊາດ, ສະພາທ້ອງຖິ່ນ, ບັນດາອົງການນິຕິບັນຍັດ, ອົງການຕຸລາການ, ອົງການຈັດຕັ້ງທາງສັງຄົມ, ສະພາການຄ້າ ແລະ ອຸດສາຫະກໍາ, ສະມາຄົມທຸລະກິດ ລວມທັງ ນັກປະດິດຄິດແຕ່ງ, ນັກຮ້ອງ ທີ່ໄດ້ສະແດງຄວາມຮູ້ສຶກ ແລະ ສົ່ງກໍາລັງໃຈ ໃຫ້ແກ່ຜູ້ປະສົບໄພ ແລະ ຜູ້ກໍາລັງປະຕິບັດໜ້າທີ່ຢູ່ນັ້ນ ໃຫ້ມີກຳລັງໃຈ ແລະ ກຳລັງກາຍ ເພື່ອຕໍ່ສູ້ກັບຜົນຮ້າຍຂອງມະຫາຕະໄພໃນຄັ້ງນີ້. ຂອບໃຈຕໍ່ອົງການຈັດຕັ້ງຂອງພັກ, ລັດຖະບານ, ທະຫານ, ຕຳຫຼວດ, ອົງການຈັດຕັ້ງມະຫາຊົນ, ອົງການແນວລາວສ້າງຊາດ, ສະພາແຫ່ງຊາດ, ອົງການນິຕິບັນຍັດ, ອົງການຕຸລາການ, ອົງການຈັດຕັ້ງທາງສັງຄົມ, ສະມາຄົມທຸລະກິດ ແລະ ບັນດາບໍລິສັດຮ້າງຮ້ານຕ່າງໆ ທີ່ໄດ້ໃຫ້ການຊ່ວຍເຫຼືອທາງດ້ານຊັບສິນ, ວັດຖຸສິ່ງຂອງ ແລະ ກໍາລັງແຮງ ເພື່ອປະກອບສ່ວນໃຫ້ແກ່ການແກ້ໄຂໄພພິບັດໃນຄັ້ງນີ້, ໂດຍໄດ້ມີການເຕົ້າໂຮມເອົາເຄື່ອງຊ່ວຍເຫຼືອ ແລະ ນຳໄປມອບໃຫ້ຜູ້ປະສົບໄພ, ເຫັນວ່າສິ່ງເຫຼົ່ານັ້ນເປັນຄຸນຄ່າທາງດ້ານຈິດໃຈ ທີ່ບໍ່ສາມາດປະເມີນໄດ້ ;

10. ຈາກທຸກໆສິ່ງທີ່ກ່າວມາຂ້າງເທິ່ງນັ້ນ ພວກເຮົາເຊື່ອວ່າ ຈະສາມາດຜ່ານຜ່າອຸປະສັກ ແລະ ຄວາມຫຍຸ້ງຍາກ ໄປໄດ້ຢ່າງແນ່ນອນ. ໃນໂອກາດນີ້, ຂ້າພະເຈົ້າຮຽກຮ້ອງມາຍັງພີ່ນ້ອງຮ່ວມຊາດ ໃນທົ່ວປະເທດ, ເວລານີ້ ຍິ່ງກວ່າເວລາໃດໝົດ ພວກເຮົາຕ້ອງເພີ່ມທະວີຄວາມສະໝານສາມັກຄີກັນຢ່າງເປັນປຶກແຜນ, ສືບຕໍ່ມູນເຊື້ອວິລະຊົນຂອງຊາດເຮົາ, ສືບຕໍ່ປົກປັກຮັກສາມູນເຊື້ອວັດທະນະທໍາອັນດີງານຂອງຊາດເຮົາໄວ້ຕະຫຼອດໄປ. ຂໍຮຽກຮ້ອງມາຍັງ ພະນັກງານ, ທະຫານ, ຕໍາຫຼວດ ຢູ່ບັນດາຂະແໜງການທັງສູນກາງ ແລະ ທ້ອງຖິ່ນ ໃຫ້ຍົກສູງຄວາມຮັບຜິດຊອບ ແລະ ຄວາມເປັນເຈົ້າການ ໃນການປະຕິບັດວຽກງານຂອງຕົນ ໃຫ້ສູງກວ່າເວລາປົກກະຕິ ເພື່ອພ້ອມກັນສູ້ຊົນ ແກ້ໄຂບັນຫາໄພພິບັດໃນຄັ້ງນີ້ ໃຫ້ສຳເລັດ ແລະ ລຸລ່ວງໄປ ໂດຍດີ ;

11. ຂໍມອບໝາຍໃຫ້ຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ ແລະ ຄະນະກຳມະການປ້ອງກັນ ແລະ ຄຸ້ມຄອງໄພພິບັດແຫ່ງຊາດ ແລະ ທຸກພາກສ່ວນໃນກົງຈັກຂອງພັກ ແລະ ລັດ ຈົ່ງພ້ອມກັນຜັນຂະຫຍາຍ ຈິດໃຈຊີ້ນຳຂອງກອງປະຊຸມລັດຖະບານ ສະໄໝວິສາມັນໃນຄັ້ງນີ້ ໃຫ້ເປັນແຜນວຽກລະອຽດ ທັງໃນສະເພາະໜ້າ ແລະ ຍາວນານ ເພື່ອຈັດຕັ້ງປະຕິບັດ ໃຫ້ມີປະສິດທິຜົນ ພ້ອມທັງ ສະຫຼຸບລາຍງານໃຫ້ລັດຖະບານ ຢ່າງທັນການ ໃນການຈັດຕັ້ງປະຕິບັດໃນແຕ່ລະໄລຍະ.

ກອງປະຊຸມໃນຄັ້ງນີ້, ຍັງໄດ້ຍາດເວລາພິຈາລະນາຮັບຮອງເອົາກົດໝາຍ ຈໍານວນ 3 ສະບັບ ຄື:

1. ກົດໝາຍ ວ່າດ້ວຍທີ່ດິນ;

2. ກົດໝາຍ ວ່າດ້ວຍຄົນພິການ;

3. ກົດໝາຍ ວ່າດ້ວຍການປ້ອງກັນຄວາມປອດໄພ ດ້ານລັງສີ ແລະ ນິວເຄຼຍ.

ທັງໝົດນັ້ນ, ແມ່ນຜົນຂອງກອງປະຊຸມລັດຖະບານ ສະໄໝວິສາມັນປະຈໍາເດືອນ ສິງຫາ 2018. ສໍາລັບກອງປະຊຸມສະໄໝສາມັນ ປະຈໍາເດືອນນີ້, ຄາດວ່າຈະດໍາເນີນໃນວັນທີ 22-24 ສິງຫາ 2018.