ເວທີ​ປຶກສາ​ຫາລື ໜຶ່ງ​ແລວ ໜຶ່ງ​ເສັ້ນທາງ ລົງ​ເລິກ​ຫລາຍ​ຂົງ​ເຂດ

ຂປລ: ການ​ດຳ​ເນີນ​ເວທີ​ເວທີປຶກສາ​ຫາລື ກ່ຽວກັບ​ຊຸກຍູ້​ຂໍ້​ລິ​ເລີ່​ມ ໜຶ່ງ​ແລວ ໜຶ່ງ​ເສັ້ນທາງ ​ໃນ​ວັນ​ທີ 3 ກຸມພາ 2018 ​ໄດ້​ມີ​ການຈັດ​ແບ່ງ​ເປັນ​ຫລາຍກຸ່ມ ​ເພື່ອ​ລົງ​ເລິກ​ການ​ແລກປ່ຽນຄວາມ​ຄິດ​ເຫັນ ​ໃນ​ຫລາຍ​ຂົງ​ເຂດ ​ເປັນ​ຕົ້ນ ການ​ຮ່ວມ​ມື​ລາວ-​ຈີນ ດ້ານ​ການ​ພັດທະນາ​ກະສິກຳ ​ແລະ ​ແກ້​ໄຂ​ຄວາມທຸກ​ຍາກ; ດາວ​ທຽມສ້າງ​ຂົວ​ຕໍ່ສື່ສານ​ສາຍສຳພັນ, ​ໂທລະ​ຄົມ ພາ​ໃຫ້​ຫຍັບ​ເຂົ້າ​ຫາ​ກັນ, ດ້ານ​ວັດທະນະທຳ ຊຸກຍູ້​ການ​ເຊື່ອມ​ໂຍງ; ສົ່ງ​ເສີມ​ການ​ຮ່ວມ​ມື ​ແລະ ພັດທະນາ​ຂົງ​ເຂດ​ພະລັງງານ ລາວ-​ຈີນ ພາຍ​ໃຕ້ ໜຶ່ງ​ແລວ ໜຶ່ງ​ເສັ້ນທາງ; ຊຸກຍູ້​ການ​ຮ່ວມ​ມື​ດ້ານ​ການ​ເງິນ, ຮ່ວມ​ສ້າງສາ​ຍສຳພັນ​ເສດຖະກິດ ລາວ-​ຈີນ ​ແລະ ການ​ຮ່ວມ​ມື​ດ້ານວິທະຍາສາດ ​ແລະ ​ເຕັກ​ໂນ​ໂລ​ຊີ ພາຍ​ໃຕ້​ແນວ​ຄວາມ​ຄິດ ໜຶ່ງ​ແລວ ໜຶ່ງ​ເສັ້ນທາງ.

ທ່ານ ກິ​ແກ້ວ ​ໄຂ​ຄຳ​ພິທູນ ຫົວໜ້າຄະນະ​ໂຄສະນາ​ອົບຮົມ​ສູນ​ກາງ​ພັກ ກ່າວ​ໃນ​​ໂອກາດ​ເປິ​ດ​ງານ​ດັ່ງກ່າວ​ວ່າ: ​ໃນ​ໄລຍະ​ສອງ​ປະ​ເທດ​ໄດ້ເພີ່ມທະວີການຮ່ວມມືທາງດ້ານເສດຖະກິດ, ການຄ້າ, ການລົງທຶນ ເພື່ອເຊື່ອມໂຍງ ລະຫວ່າງ ຍຸດທະສາດ “ການຫັນປະເທດບໍ່ມີທາງອອກສູ່ທະເລ ເປັນປະເທດເຊື່ອມໂຍງ ເຊື່ອມຈອດ” ຂອງລາວ ເຂົ້າກັບຍຸດທະສາດ “ໜຶ່ງແລວ ໜຶ່ງເສັ້ນທາງ” ທີ່ເປັນນະໂຍບາຍທີ່ເປັນຂໍ້ລິເລີ່ມສຳຄັນຂອງຈີນ; ເພີ່ມທະວີການພົວພັນຮ່ວມມືລະຫວ່າງສອງຝ່າຍໃຫ້ນັບມື້ນັບດີຂຶ້ນ ບົນພື້ນຖານການເປັນຄູ່ຮ່ວມຊະຕາກໍາອັນດຽວກັນ. ພ້ອມ​ນັ້ນ, ສະໜັບສະໜູນເຕັມທີ່ຕໍ່ນະໂຍບາຍ “ໜຶ່ງແລວ ໜຶ່ງເສັ້ນທາງ” ປະກອບສ່ວນຢ່າງຕັ້ງໜ້າເຂົ້າ ໃນການປະຕິບັດນະໂຍບາຍດັ່ງກ່າວໃຫ້ປະກົດຜົນເປັນຈິງ ແລະ ນໍາເອົາຜົນປະໂຫຍດສູງສຸດມາໃຫ້ປະຊາຊົນສອງຊາດ.

ເວທີ​ປຶກສາ​ຫາລື​ຄັ້ງ​ນີ້, ມີຄວາມໝາຍສຳຄັນ ​ເພາະ​ເປັນ​ເວທີ​ແລກປ່ຽນ​ແນວ​ຄວາມ​ຄິດ, ຂໍ້​ມູນ​ຂ່າວສານ, ລວມທັງ​ຂໍ້​ສະດວກ ​ແລະ ຂໍ້​ຫຍຸ້ງຍາກ ​ໃນ​ການ​ຮ່ວມ​ມື​ກ້າວ​ເຖິງການຈັດ​ຕັ້ງ​ປະຕິບັດ ຂໍ້​ລິ​ເລີ່​ມ ດັ່ງກ່າວ​ໃຫ້​ມີ​ຜົນສຳ​ເລັດ​ເທື່ອ​ລະ​ກ້າວ. ນອກ​ນີ້, ຍັງ​ມີ​ການ​ນຳ​ສະ​ເໜີ ໜຶ່ງ​ແລວ ໜຶ່ງ​ເສັ້ນທາງ ມີ​ເປົ້າ ໝາຍສົ່ງ​ເສີມ​ການຮ່ວມ​ມື ​ແລະ ພັດທະນາ​ອຸດ​ສາ​ຫະກຳພະລັງ​ງານ; ການ​ສ້າງ​ຕັ້ງ​ລະບົບ ​ເສັ້ນທາງ​ສາຍ​ໄໝທຽນ​ຈິ ​ໄດ້​ສົ່ງ​ເສີມ​ໂທລະ​ຄົມມະນາຄົມ ລາວ-​ຈີນ, ທັງ​ປະກອບສ່ວນ​ສຳຄັນ​ໃນ​ການ​ພັດທະນາ​ການ​ຮ່ວມ​ມື​ດ້ານ​ວັດທະນະທຳ.

ໃນຮູບແມ່ນກອງປະຊຸມພາຍໃຕ້ຫົວຂໍ້ “ຊຸກຍູ້ ການຮ່ວມມືດ້ານການເງິນ ຮ່ວມສ້າງສາຍສຳພັນເສດຖະກິດລາວ-ຈີນ”.