ມອບ-ຮັບ ອາຄານຜູ້ໂດຍສານສະໜາມບິນສາກົນວັດໄຕ ພາກຂະຫຍາຍ ພາຍຫຼັງດໍາເນີນການກໍ່ສ້າງມາ 6 ປີ

ນະຄອນຫຼວງວຽງຈັນ: ໂຄງການພາກຂະຫຍາຍອາຄານຜູ້ໂດຍສານສະໜາມບິນສາກົນວັດໄຕ ໂດຍທຶນກູ້ຢືມດອກເບ້ຍຜ່ອນຜັນຈາກລັດຖະບານຍີ່ປຸ່ນ ມູນຄ່າ 9.017 ຕື້ເຢັນ ເລີ່ມຈັດຕັ້ງປະຕິບັດແຕ່ປີ 2014 ເປັນຕົ້ນມາ ໄດ້ກໍ່ສ້າງສໍາເລັດ ແລະ ມີພິທີມອບ-ຮັບໂຄງການພາກຂະຫຍາຍສະໜາມບິນສາກົນວັດໄຕ ນະຄອນຫຼວງວຽງຈັນ ຈັດຂຶ້ນວັນທີ 9 ສິງຫາ 2018.

ສໍາລັບໜ້າວຽກໂຄງການພາກຂະຫຍາຍອາຄານດັ່ງກ່າວປະກອບຄື: ຂະຫຍາຍອາຄານຜູ້ໂດຍສານສາກົນ ຂະຫຍາຍເນື້ອທີ່ 13.539 ຕາແມັດ ປັບປຸງໃໝ່ 3.311 ຕາແມັດ ອາຄານຜູ້ໂດຍສານພາຍໃນກໍ່ສ້າງ 7.229 ຕາແມັດ ສິ່ງອໍານວຍຄວາມສະດວກຊົ່ວຄາວ ສໍາລັບອາຄານຜູ້ໂດຍສານພາຍໃນ 1.000 ຕາແມັດ ຫ້ອງບຳລຸງຮັກສາກໍ່ສ້າງ 449 ຕາແມັດ ພ້ອມກັບລະບົບນໍ້າປະປາ ໄຟຟ້າ ນໍ້າເປື້ອນ ທາງແລ່ນເຄື່ອງບິນອອກດ່ວນ ຖະໜົນ ບ່ອນຈອດລົດ ເຂດໃຫ້ບໍລິການ ແລະ ທາງສຳລັບຂົນສົ່ງອຸປະກອນສະໜັບສະໜູນ.

ເຂົ້າຮ່ວມໃນພິທີມອບ-ຮັບຄັ້ງນີ້ມີ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ທ່ານ ຄາຊູຢູກິ ນາກາເນະ ຮອງລັດຖະມົນຕີກະຊວງການຕ່າງປະເທດຍີ່ປຸ່ນ ພ້ອມດ້ວຍບັນດາລັດຖະມົນຕີຮອງລັດຖະມົນຕີ ແລະ ພະນັກງານ -ວິຊາການສອງຝ່າຍເຂົ້າຮ່ວມ.

Cr: Vientiane Mai