ພິທີມອບຮັບໂຄງການກໍ່ສ້າງໂຮງຮຽນ ມສ ແອດຫຼັງໃໝ່  ແຂວງຫົວພັນ

0
79

ພິທີມອບ-ຮັບ ໂຄງການກໍ່ສ້າງ ໂຮງຮຽນມສເມືອງແອດຫຼັງໃໝ່ ໄດ້ຈັດຂື້ນຕອນເຊົ້າ ວັນທີ 8 ສິງຫາ 2018 ນີ້, ຢູ່ທີ່ ເມືອງແອດ ເຂົ້າຮ່ວມມີ ທ່ານ ພູໂຊນ ທຳມະວິໄຊ ຮອງເຈົ້າແຂວງຫົວພັນ, ທ່ານ ບຸ້ຍດຶກຮ້າຍ ຮອງປະທານຄນະກຳມະການປະຊາຊົນແຂວງເຊິນລາ ສສ ຫວຽດນາມ, ມີບໍລິສັດຜູ້ຮັບເໝົາກໍ່ສ້າງ, ພາກສ່ວນທີ່ກ່ຽວຂ້ອງຂັ້ນແຂວງ ຂັ້ນເມືອງ,ຄູອາຈານແລະນ້ອງຫຼານນັກຮຽນເຂົາຮ່ວມຢ່າງຫຼວງຫຼາຍ.


ໂຮງຮຽນ ມສ ເມືອງແອດຫຼັງໃໝ່ນີ້ ໄດ້ເລີ່ມລົງມືກໍ່ສ້າງແຕ່ວັນທີ 10 ມັງກອນ 2018 ແລະ ກໍ່ສ້າງໄດ້ສຳເລັດ ວັນທີ 5 ກໍລະກົດ 2018, ສຳຫຼວດອອກແບບໂດຍ ວິສະວະກອນພະແນກສຶກສາທິການແລະ ກິລາ ແຂວງຫົວພັນ, ຮັບເໝົາກໍ່ສ້າງໂດຍ ບໍລິສັດຮຶງຟາດກໍ່ສ້າງ, ລວມມູນຄ່າທັງໝົດ 5 ຕື້ດົງ, ເຊິ່ງເປັນທຶນຊ່ວຍເຫຼືອລ້າຈາກແຂວງເຊິນລາ ສສ ຫວຽດນາມ. ໂຮງຮຽນ ມສ ແອດ ຫຼັງໃໝ່ນີ້ ອາຄານກໍ່ສ້າງດ້ວຍເບຕົງເສີມເຫຼັກ, ມຸງດ້ວຍກະເບື້ອງ, ປະກອບມີອາຄານຮຽນ 1 ຫຼັງ, ຂະໜາດ 32×9 ແມັດ, ມີ 4 ຫ້ອງຮຽນ, ມີໄຟຟ້າ, ພັດລົມ ແລະ ເພີນີເຈີປະກອບໃນຫ້ອງ, ມີອາຄານຫ້ອງຄອມພິວເຕີ ແລະ ຫ້ອງທົດລອງ 1 ຫຼັງ, ຂະໜາດ 32×9 ແມັດ, ປະກອບມີ 4 ຫ້ອງ, ມີໄຟຟ້າ, ພັດລົມ ແລະ ເພີນີເຈີປະກອບຄົບຊຸດ, ນອກນີ້ຍັງໄດ້ກໍ່ສ້າງຫ້ອງນ້ຳ 2 ຫຼັງ, ຫຼັງລະ 4 ຫ້ອງ, ພ້ອມທັງສ້າງຫຼັກທຸງ, ປະຕູໂຂງ ແລະ ປ້າຍຊື່ໂຮງຮຽນ.


ຜ່ານການກວດກາຂອງຄະນະຮັບຜິດຊອບ ເຫັນວ່າຖືກຕ້ອງຕາມການອອກແບບ, ດັ່ງນັ້ນບໍລິສັດຜູ້ຮັບເໝົາກໍ່ສ້າງ ແລະ ເຈົ້າຂອງໂຄງການຈິ່ງໄດ້ຈັດພິທີມອບ-ຮັບໂຮງຮຽນຫຼັງໃໝ່ໃຫ້ແຂວງຫົວພັນ, ກ່າວມອບໂດຍທ່ານ ບຸ້ຍດຶກຮ້າຍ ຮອງປະທານຄະນະກຳມະການປະຊາຊົນແຂວງເຊິນລາ ແລະ ກ່າວຮັບໂດຍທ່ານ ພູໂຊນ ທຳມະວິໄຊ ຮອງເຈົ້າແຂວງຫົວພັນ, ພ້ອມມອບຕໍ່ໃຫ້ເມືອງແອດ ກໍ່ຄືຄູອາຈານ ແລະ ນ້ອງຫຼານນັກຮຽນໃນໂຮງຮຽນ ມສ ແອດ ເປັນຜູ້ປົກປັກຮັກສາ ແລະ ນຳໃຊ້ໃຫ້ເກີດປະໂຫຍດສູງສຸດ ແລະ ຍາວນານ.

ຂ່າວ-ພາບ: ແຂວງຫົວພັນ