ເມືອງກະລຶມຈັດສັນ ເຄື່ອນຍ້າຍບ້ານທີ່ຖືກນໍ້າຖ້ວມໄປຢູ່ເຂດປອດໄພ

0
291

ເມືອງກະລຶມ : ໂດຍປະຕິບັດຕາມທິດຊີ້ນຳຂອງ ທ່ານເຈົ້າເມືອງໆກະລຶມ ວ່າດ້ວຍຈັດສັນເຄື່ອນຍ້າຍບ້ານທີ່ຖືກນ້ຳຖ້ວມໄປຢູ່ເຂດປອດໄພສະນັ້ນໃນລະຫວ່າງທ້າຍເດືອນ ກໍລະກົດ ຫາຕົ້ນເດືອນ ສິງຫາ 2018 ນີ້ ນຳໂດຍ ທ່ານ ອໍບົວລາ ອ່ອນມະໄລວົງ ຮອງເລຂາພັກ,ທັງເປັນປະທານຄະນະກຳມະການຄອບຄຸມໄພພິບັດຂັ້ນເມືອງ ພ້ອມດ້ວຍພະນັກງານວິຊາການທີ່ກ່ຽວຂ້ອງພ້ອມດ້ວຍ ສອງກຳລັງປະກອບອາວຸດພາຍໃນເມືອງກະລຶມ ໄດ້ພ້ອມກັນປະກອບສ່ວນຊ່ວຍເຄື່ອນຍ້າຍພໍ່ແມ່ປະຊາຊົນບັນດາເຜົ່າ ບ້ານ ວັກໃຕ້ ທີ່ຖືກຜົນກະທົບ ໄປຢູ່ເຂດທີ່ມີຄວາມປອດໄພສູງຕາມທີ່ເມືອງໄດ້ກຳນົດໄວ້.


ທ່ານ ອໍບົວລາ ອ່ອນມະໄລວົງ ຮອງເຈົ້າເມືອງກະລຶມໃຫ້ຮູ້ອີກວ່າ: ບ້ານວັກໃຕ້ແມ່ນນອນຢູ່ໃນແຜນການຈັດສັນຍົກຍ້າຍບ້ານຂອງເມືອງ ແລະ ແຜນດັງກ່າວແມ່ນຍັງຢູ່ໃນຂັ້ນຕອນການບຸກເບີກພື້ນທີ່ ຄາດວ່າຈະສຳເລັດໃນປີ 2019 ເຊິ່ງພາຍຫຼັງບ້ານວັກໃຕ້ໄດ້ເກີດໄພນ້ຳຖ້ວມໃນລະຫວ່າງທ້າຍເດືອນ ກໍລະກົດ ຜ່ານມາ ເຮັດໃຫ້ບ້ານວັກໃຕ້ໄດ້ຮັບຜົນເສຍຫາຍທັງໝົດ 23 ຫຼັງຄາເຮືອນຂອງຈຳນວນເຮືອນທັງໝົດ 23 ຫຼັງຄາ ໃນນັ້ນເຮືອນເປ້ເພ 100% ມີ 2 ຫຼັງ,ເປເພ 60% ມີ 7 ຫຼັງ ແລະ 14 ຫຼັງ ບໍສາມາດຢູ່ພື້ນທີ່ເກົ່າໄດ້ເພາະມີຄວາມສ່ຽງສູງຕໍ່ການໄຫຼຊຸຂອງນ້ຳ ຖ້າຫາກວ່າປະລິມານນ້ຳເພີ່ມຂື້ນອີກ ດັ່ງນັ້ນອຳນາດການປົກຄອງເມືອງກະລືມ ຈຶ່ງໄດ້ເຫັນດີເປັນເອກະພາບກັນແບ່ງກອນກຳລັງເຂົ້າຊ່ວຍເຫຼືອຍົກຍ້າຍບ້ານວັກໃຕ້ໄປຢູ່ຈຸດສູງໄລຍະຊົ່ວຄາວ ໂດຍໄດ້ແບ່ງອອກເປັນ 5 ທິມງານຄື ໜ່ວຍກຸ່ມພັກຮັບຜິດຊອບເຮືອນ 4 ຫຼັງ,ໜ່ວຍວັດທະນະທຳສັງຄົມ 4 ຫຼັງ,ໜ່ວຍເສດຖະກິດ 4 ຫຼັງ,ໜ່ວຍອົງການຈັດຕັ້ງມະຫາຊົນ 4 ຫຼັງ,ໜ່ວຍ ປກສ ແລະ ປກຊ ຮັບຜິດຊອບ 8 ຫຼັງ ເຊິ່ງໃນໜ້າວຽກທີ່ພັກ,ພະນັກງານ ສອງກຳລັງປະກອບອາວຸດໄດ້ຈັດຕັ້ງປະຕິບັດຄັ້ງນີ້ແມ່ນມ້າງເຮື່ອນຂອງຊາວບ້ານທີ່ຕົ້ນຮັບຜິດຊອບ ແລ້ວເຄື່ອນຍ້າຍໃປປຸກສ້າງຢູ່ທີ່ເຂດເມືອງກຳນົດໄວ້ ເລີ່ມແຕ່ວັນທີ 24 ກໍລະກົດ ຫາ ວັນທີ 4 ສິງຫາ 2018 ປັດຈຸບັນສຳເລັດແລ້ວ 100%.


ພ້ອມດຽວກັນນີ້ອຳນາດການປົກຄອງເມືອງກະລຶມ ກໍຄືຂະແໜງການທີ່ກ່ຽວຂ້ອງໄດ້ນຳເອົາເຄື່ອງນຸ່ງຮົມ ແລະ ເຄື່ອງຄົວເຮືອນຈຳນວນໜຶ່ງ ທີ່ໄດ້ຮັບການຊ່ວຍເຫຼືອຈາກຜູ້ໃຈບຸນ ມາມອບໃຫ້ຊາວບ້ານດັ່ງກ່າວ ເພື່ອເປັນການຊ່ວຍເຫຼືອບັນເທົາທຸກ ແລະ ຟື້ນຟູສະພາບຈິດໃຈຂອງຜູ້ປະສົບເຄາະຮ້າຍຈາກອຸທົກກະໄພຄັ້ງນີ້ ໃນຂັ້ນເບື້ອງຕົ້ນ.

ຂ່າວ: ອັດສະວິນ   (ຂ່າວເຂກອງ)