ຄົ້ນຫາຜູ່ສູນຫາຍ ທີ່ສະໜາມໄຊ ວັນທີ 10/8/2018 ຍັງບໍ່ພົບເພີ່ມ

    ອີງຕາມການລາຍງານຂອງເຈົ້າໜ້າທີ່ພາກສະໜາມຟື້ນຟູ ແລະ ແກ້ໄຂຜົນກະທົບຈາກໄພພິບັດປະຈຳຢູ່ເມືອງສະໜາມໄຊ ແຂວງ ອັດຕະປື ໃນມື້ ວັນທີ 10ສິງຫາ2018, ເຈົ້າໜ້າທີ່ກ່ຽວຂ້ອງບໍ່ສາມາດພົບເຫັນສົບຜູ້ເສຍຊີວີດຈາກເຫດໄພພິບັດເຂື່ອນໄຟຟ້າເຊປ່ຽນ-ເຊນ້ຳນ້ອຍ ເຮັດໃຫ້ມາຮອດປະຈຸບັນຈຳນວນສົບຜູ້ເສຍຊີວິດຍັງແມ່ນ 35 ໃນນັ້ນເກັບກູ້ຢູ່ພາກສະໜາມຈຳນວນ 32 ສົບ ແລະ ເສຍຊີວິດຢູ່ໂຮງໝໍ 3 ສົບ ໃນນີ້ມີ ເດັກນ້ອຍອາຍຸຕໍ່າກວ່າ 10 ປີ 1 ສົບ.

    ສ່ວນວຽກງານສ້ອມແປງສຸກເສີນຕາມເສັ້ນທາງ 18 ເອ ແຕ່ເທສະບານແຂວງ ຫາບ້ານໃໝ່ ມາຮອດປະຈຸບັນແມ່ນສາມາດສອ້ອມແປງໄດ້ 34 ກມ ຈາກແຜນການທັງໝົດ 44 ກມ.

    ໄດ້ລົງສ້ອມແປງສຸກເສີນເສັ້ນທາງເລກທີ 9004 ຈຸດບ້ານຕະມໍຢອດ ພ້ອມທັງໄດ້ຕິດຕັ້ງເຕັ້ນສຳເລັດ 439 ຫຼັງ ຈ່າຍເງິນໃຫ້ຄອບຄົວຜູ້ໄດ້ຮັບຜົນກະທົບ ຈຳນວນ 1.171 ຄອບຄົວ ໃນຈຳນວນ ຄອບຄົວລະ 500.000 ກີບ ເປັນຈຳນວນທັງໝົດ 586 ລ້ານກວ່າກີບ.