ວິທະຍາໄລກະສິກຳ ແລະ ປ່າໄມ້ ພາກເໜືອ ສ້າງນັກວິຊາການ ທາງດ້ານກະສິກຳ ແລະ ປ່າໄມ້ ຮັບໃຊ້ສູ່ສັງຄົມ ໃນປີ 2018

0
266

ຫຼວງພະບາງ: ໃນວັນທີ 10 ສິງຫາ 2018 ນີ້ ທີ່ສະໂມສອນວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ມີພິທີ ສະຫຼຸບການກໍ່ສ້າງວິຊາການຫຼັກສູດຊັ້ນສູງ ກະສິກຳ ແລະ ປ່າໄມ້ ເຂດເນີນສູງ ສົກປີ 2017-2018 ໂດຍການເປັນປະທານໂດຍ ທ່ານ ປທ ທອງສະມຸດ ພູມມະສອນ ອຳນວຍການວິທະຍາໄລກະສິກຳ ແລະ ປ່າໄມ້ ພາກເໜືອ, ມີຮອງອຳນວຍການ, ຫົວໜ້າຫ້ອງການ, ຫົວໜ້າ ແລະ ຮອງຄະນະວິຊາ, ແຂກຮັບເຊີນຈາກຄະນະຜະລິດຕະພັນກະສິກໍາ ມະຫາວິທະຍາໄລແມ່ໂຈ້ (ປະເທດໄທ), ພ້ອມດ້ວຍພະນັກງານຄູອາຈານ ແລະ ນັກສຶກສາລະບົບກໍ່ສ້າງ ຮຸ່ນທີ VI ແລະ ນັກສຶກສາຕໍ່ເນື່ອງຮຸ່ນທີ V ເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ນາງ ໜໍ່ຄຳ ວິລະວົງສາ ໄດ້ຂຶ້ນຜ່ານບົດລາຍງານການກໍ່ສ້າງວິຊາການ ຫຼັກສູດກະສິກຳ ແລະ ປ່າໄມ້ ເຂດເນີນສູງວ່າ: ການຮຽນການສອນໃນຮຸ່ນດັ່ງກາວແມ່ນເລີ່ມແຕ່ ປີ 2015-2018 ມີນັກສຶກສາທັງໝົດ 216 ຄົນ, ຍິງ 105 ຄົນ. ລະບົບຕໍ່ເນື່ອງ 23 ຄົນ, ຍິງ 6 ຄົນ. ລວມທັງໝົດ 239 ຄົນ, ຍິງ 111 ຄົນ. ໃນການສຶກສາທັງໝົດ 3 ປີ, ມີ 6 ພາກຮຽນ, ມີ 104 ໜ່ວຍກິດ ແລະ .

ຜ່ານການຮຽນການສອນໃນໄລຍະ 3 ປີ ນັກສຶກສາໄດ້ເອົາໃຈໃສ່ຕັ້ງໜ້າສຶກສາຄົ້ນຄ້ວາຮໍ່າຮຽນ ຈາກທິດສະດີ ແລະ ການລົງພາກປະຕິບັດຕົວຈິງ.

ນອກຈາກການຮຽນໃນຫ້ອງຮຽນແລ້ວນັກສຶກສາກໍຍັງໄດ້ປະກອບສ່ວນໃນວຽກງານນອກຫຼັກສູດຕື່ມອີກ.

ຈາກຜົນງານດັ່ງກ່າວ ຈຶ່ງໄດ້ມີການຍ້ອງຍໍ ແລະ ໄດ້ມອບໃບຍ້ອງຍໍໃຫ້ແກ້ຜູ້ທີ່ມີຜົນງານດີເດັ່ນ 8 ປະເພດດັ່ງນີ້: ດີເດັ່ນຮອບດ້ານ 4 ຄົນ, ຍິງ 2 ຄົນ; ດີເດັ່ນການຮໍ່າຮຽນ 6 ຄົນ, ຍິງ 2 ຄົນ; ດີເດັ່ນການອອກແຮງງານ 25 ຄົນ, ຍິງ 13 ຄົນ; ດີເດັ່ນອາສາສະໝັກປະກອບສ່ວນວຽກງານຫ້ອງສະໝຸດ 5 ຄົນ; ດີເດັ່ນປະກອບສ່ວນວຽກງານອາສາສະໝັກສິ່ງແວດລ້ອມ 17 ຍິງ, ດີເດັ່ນປະກອບສ່ວນອາສາສະໝັກຈັດລາຍການໂທລະໂຄ່ງ 14 ຄົນ, ຍິງ 7 ຄົນ; ດີເດັ່ນປະກອບສ່ວນ ເຄື່ອນໄຫວວຽກງານກິລາ 14 ຄົນ, ຍິງ 9 ຄົນ; ດີເດັ່ນການປະກອບສ່ວນວຽກງານປ້ອງກັນຄວາມສະຫງົບ 7 ຄົນ, ຍິງ 1 ຄົນ.

ໃນໂອກາດດັ່ງກ່າວ ທ່ານ ທອງສະມຸດ ພູມມະສອນ ໄດ້ມີຄໍາເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຜົນງານທີ່ທາງນັກສຶກສາຍາດມາໄດ້ໃນໄລຍະ 3 ປີ. ຮຽກຮ້ອງໃຫ້ຜູ້ທີ່ໄດ້ຮັບໃບຍ້ອງຍໍໃຫ້ສືບຕໍ່ຮັກສາມູນເຊື້ອດັ່ງກ່າວ. ຕອນທ້າຍທ່ານໄດ້ເນັ້ນໜັກໃຫ້ນັກສຶກສາທີ່ກຳລັງທີ່ຈະສຳເລັດການສຶກສາຄັ້ງນີ້ໃຫ້ນຳເອົາຄວາມຮູ້ທີ່ໄດ້ຮຽນມາໄປໝູນໃຊ້ໃນການປະຕິບັດວຽກງານ ແລະ ການດຳລົງຊີວິດປະຈຳວັນ ເພື່ອພັດທະນາປະເທດຊາດໃຫ້ ຫຼຸດພົ້ນຈາກຄວາມດ້ອຍພັດທະນາໃນອະນາຄົດ.

ຮູບພາບເພິ່ມເຕີມ👇👇

https://photos.app.goo.gl/oikmvEH7AeioCgZf6

================================

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ