ຄົນເຮັດວຽກທັງຫລາຍອາດມີແດ່ທີ່ຮູ້ສຶກເບື່ອ ແລະ ເລີ່ມທໍ້ກັບວຽກທີ່ເຮັດ ບາງເທື່ອບັນຫາກໍ່ໃຫຍ່ຈົນຕ້ອງປ່ຽນວຽກ, ແຕ່ບາງເທື່ອກໍ່ອາດຈະແກ້ໄຂໄດ້ຢູ່ທີ່ຕົວເຮົາ ແລະ ໃຈເຮົາເອງ ສຳລັບໃຜທີ່ເບື່ອວຽກ ລອງໃຊ້ເຕັກນິກ 6 ຂໍ້ຕໍ່ໄປນີ້ໄດ້:

1.ລະບາຍ ຫລື ປຶກສາຄົນທີ່ໄວ້ໃຈໄດ້: ການໄດ້ລະບາຍ, ປ່ອຍທຸກກັບຄົນທີ່ເຮົາໄວ້ໃຈ ຈະຊ່ວຍໃຫ້ເຮົາຜ່ອນຄາຍຄວາມເຄັ່ງຄຽດໄດ້ ໂດຍສະເພາະຖ້າເລືອກຄົນທີ່ເບິ່ງໂລກໃນແງ່ດີ ແລະ ຈັດການຊີວິດໄດ້ດີມາເປັນທີ່ປຶກສາ ເຂົາອາດຈະເຮັດໃຫ້ບັນຫາຂອງທ່ານນ້ອຍລົງໄດ້.

2.ລາພັກຮ້ອນ: ຫາໂອກາດລາພັກເພື່ອຕື່ມພະລັງງານໃຫ້ໂຕເອງແດ່ ເພື່ອຄວາມສົດຊື່ນ ແລະ ຕື່ມພະລັງໄວ້ສຳລັບການເລີ່ມເຮັດວຽກໃນຮອບໃໝ່.

3.ຄິດເຖິງຂໍ້ດີຂອງວຽກທີ່ເຮັດ: ລອງຄິດເຖິງຂໍ້ດີຂອງວຽກທີ່ເຮັດຢູ່ ຫລື ຄິດຍ້ອນໄປເຖິງຕອນທີ່ເຮົາໄດ້ວຽກໃໝ່ໆ, ຕອນທີ່ເຮົາຢາກເຮັດວຽກນີ້ຍ້ອນຫຍັງ, ເມື່ອພົບແລ້ວທ່ານກໍ່ຈະຮູ້ສຶກວ່າວຽກຂອງທ່ານກໍ່ມີຄຸນຄ່າ ແລະ ບໍ່ໜ້າເບື່ອດັ່ງທີ່ຄິດ.

4.ຕົກແຕ່ງໂຕະເຮັດວຽກ ຊ່ວຍສ້າງບັນຍາກາດໃໝ່ໆ: ບາງເທື່ອການເຮັດວຽກໃນບັນຍາກາດເກົ່າໆກໍ່ເປັນພາກສ່ວນໜຶ່ງທີ່ເຮັດໃຫ້ເບື່ອໜ່າຍ ລອງຫາຫຍັງໃໝ່ໆມາວາງເທິງໂຕະເຮັດວຽກ ອາດຈະເປັນຕຸກກະຕານ້ອຍໆ, ດອກໄມ້, ຊື້ເຄື່ອງຂຽນໃໝ່ໆມາໃຊ້ ຫລື ຈັດວາງສິ່ງຂອງໃໝ່ເພື່ອປ່ຽນບັນຍາກາດແດ່.

5.ເຮັດໂຕໃຫ້ສົດໃສສົດຊື່ນ: ບາງເທື່ອຄວາມເບື່ອກໍ່ເກີດຈາກໃຈເຮົາເອງກໍ່ມີ ຖ້າເຮົາພະຍາຍາມຄິດເຖິງແຕ່ເລື່ອງດີໆ, ຍິ້ມໄວ້ຕະຫລອດ, ບໍ່ເມົາແຕ່ຄິດວ່າເບື່ອ ເຮົາກໍ່ຈະມີກຳລັງໃຈຫລາຍຂຶ້ນ.

6.ຕັ້ງເປົ້າໝາຍນ້ອຍໆໃນທຸກໆມື້: ເປົ້າໝາຍໃນໄລຍະຍາວອາດຈະເຮັດໃຫ້ເຮົາທໍ້ແດ່ໃນບາງເທື່ອ, ລອງຕັ້ງເປົ້າໝາຍໃນໄລຍະສັ້ນ ເຊັ່ນ: ໃນແຕ່ລະມື້ຈະເຮັດຫຍັງແດ່ ແລ້ວໄປຍັງເປົ້າໝາຍນັ້ນ ຊີວິດເຮົາກໍ່ຈະມ່ວນຂຶ້ນຄືກັບຫລິ້ນເກມທຸກໆມື້.


ຂອບໃຈທີ່ມາ:www.krabork.com

LEAVE A REPLY

Please enter your comment!
Please enter your name here