ໃນຜ່ານມາ, ສຽງຈົ່ມວ່າຈາກສັງຄົມແມ່ນບໍ່ໜ້ອຍຕໍ່ຄວາມເຂົ້າໃຈຂອງເຂົາເຈົ້າວ່າ: ເປັນຫຍັງແຮງງານຕ່າງດ້າວຈຶ່ງເຂົ້າມາຍາດອາຊີບຄົນລາວເຮົາຫຼາຍແທ້? ເພາະຫຼຽວໄປທາງໃດກໍ່ເຫັນແຕ່ຊາວຕ່າງດ້າວມາເລາະເຮັດວຽກ, ທໍາມາຄ້າຂາຍຢູ່ທົ່ວທຸກບ່ອນ ນັບແຕ່ຊ່າງຕັດຫຍິບໄປຈົນຮອດຊ່າງເຮັດເຮືອນ, ກໍ່ສ້າງອາຄານ, ການລົງທຶນຂຸດຄົ້ນບໍ່ແຮ່, ເຮັດເຂື່ອນໄຟຟ້າ, ຊຸບເປີ້ມາເກັດຂະໜາດໃຫຍ່ໆ ແລະ ອື່ນໆ.

ເຊິ່ງທັງໝົດເຫຼົ່ານີ້ ລ້ວນແລ້ວ ແຕ່ເປັນອາຊີບທີ່ມີບາງຢ່າງ ຄົນລາວເຮົາບໍ່ຢາກສົນໃຈພໍເທົ່າໃດ ໂດຍອ້າງເຫດຜົນຕ່າງໆນາໆ ດັ່ງຄໍາວ່າ: ຢ້ານແຮງງານຕ່າງດ້າວເຂົ້າມາຍາດວຽກເຮັດງານທໍາ, ແຕ່ໃນຕົວຈິງມັນ ບໍ່ແມ່ນແນວນັ້ນ, ແມ່ນຍ້ອນກະໂຕເຮົາເອງຂາດຄວາມດຸໝັ່ນ, ຄວາມອົດທົນພະຍາຍາມໃນການຮຽນຮູ້ວິຊາຊີບຕ່າງໆໃນການພັດທະນາຕົນເອງເຊັ່ນ: ຊ່າງຕັດຜົມ, ຊ່າງຈອດຢາງລົດ ແລະ ຫຼາຍວຽກ ໂດຍງ່າຍກວ່ານີ້ກໍ່ຍັງເຮັດບໍ່ໄດ້, ຖ້າວຽກໃຫຍ່ກວ່ານັ້ນ, ດັ່ງການສ້າງຖະໜົນຫົນທາງ, ໂຮງຈັກໂຮງງານ, ຕຶກອາຄານລະດັບໃຫຍ່ຕ່າງໆ ຖ້າບໍ່ມີແຮງງານຕ່າງປະເທດແລ້ວກໍ່ຈະມີບັນຫາ.


ດັ່ງນັ້ນ, ເຮົາຄວນເຂົ້າໃຈວ່າ, ການເຂົ້າມາເຮັດວຽກຂອງຄົນຕ່າງຊາດກໍ່ຈະເປັນໂອກາດທີ່ດີເພື່ອພວກເຮົາ ຈະໄດ້ແລກປ່ຽນບົດຮຽນ ແລະ ປະສົບການທີ່ດີຕ່າງໆຂອງເຂົາເຈົ້າ. ຜ່ານມາບົດຮຽນໄດ້ເຍືອງໃຫ້ເຫັນແລ້ວທີ່ຫຼາຍໂຄງການທີ່ຄົນລາວເປັນເຈົ້າຂອງ, ແຕ່ເຂົາເຈົ້າກໍ່ບໍ່ເລືອກເອົາແຮງງານລາວ ແລະ ຊ່າງ ລາວມາເຮັດ.
ນີ້ກໍ່ຍ້ອນບັນຫາຄວາມອາດສາມາດ ແລະ ສີມືແຮງງານເຮົາຍັງບໍ່ທັນເກັ່ງ, ຍັງຂາດຄວາມຮັບຜິດຊອບ, ເຮັດວຽກສອງ-ສາມມື້ກໍ່ຂໍເງິນເບ້ຍລ້ຽງແລ້ວ ແລະ ມື້ຕໍ່ມາກໍ່ບໍ່ເຫັນມາວຽກມາການຍ້ອນເມົາຄ້າງ, ເຮັດວຽກບໍ່ເປັນປົກກະຕິ ຢາກມາຍາມໃດກໍ່ມາ ແຖມເຮັດວຽກຂາດຄຸນນະພາບ, ນີ້ຄືຄວາມຈິງ. ແຕ່ຄຽງຄູ່ກັນນັ້ນກໍ່ມີຈໍານວນໜຶ່ງທີ່ເຮັດໄດ້ດີ, ຖ້າເຂົາເຈົ້າໄດ້ຮັບການຍົກລະດັບດ້ານວິຊາການ.


ດັ່ງນັ້ນ, ຈຶ່ງຮູ້ວ່າການເອົາໃຈໃສ່ສຶກສາຮໍ່າຮຽນຍົກລະດັບຄວາມຮູ້ຄວາມສາມາດ ທາງດ້ານວິຊາຊີບຕ່າງໆມັນ ມີຄວາມສໍາຄັນຍິ່ງ ເພື່ອເຂົາເຈົ້າເຫຼົ່ານັ້ນຈະເປັນຜູ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດໃຫ້ ນັບມື້ເຕີບໃຫຍ່ເຂັ້ມແຂງ.


ຂອບໃຈທີ່ມາ: laopost.com

LEAVE A REPLY

Please enter your comment!
Please enter your name here