ປີທ່ອງທ່ຽວລາວ 2018 ຜ່ານມານີ້, ນະຄອນຫລວງວຽງຈັນ ບໍ່ສາມາດດຶງດູດນັກທ່ອງທ່ຽວຕ່າງປະເທດ ບັນລຸ 2 ລ້ານເທື່ອຄົນ ຕາມທີ່ວາງຄາດໝາຍເອົາໄວ້ ໂດຍບັນລຸ 1 ລ້ານ 9 ແສນກ່ວາຄົນ. ແຕ່ຖ້າທຽບໃສ່ປີ 2017 ເພີ່ມຂຶ້ນ 3 ແສນກ່ວາຄົນ.

ທ່ານ ພອນຈັນ ແພງພູວັນ, ຮອງຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວນະຄອນ ຫລວງວຽງຈັນ ໃຫ້ຮູ້ວ່າ: ສາເຫດທີ່ເຮັດໃຫ້ບໍ່ສາມາດດຶງດູດນັກທ່ອງທ່ຽວຕ່າງປະເທດໄດ້ຕາມຄາດໝາຍທີ່ວາງໄວ້ ຍ້ອນການວາງຄາດໝາຍໄວ້ສູງເກີນໄປ,ບວກກັບປະເທດໃກ້ຄຽງມີນະໂຍບາຍຊຸກຍູ້ສົ່ງເສີມການທ່ອງທ່ຽວພາຍໃນປະ ເທດ ຫລາຍຂຶ້ນ ເຮັດໃຫ້ນັກທ່ອງທ່ຽວຈາກບາງປະເທດໃກ້ຄຽງເຂົ້າມາທ່ອງທ່ຽວນະຄອນຫລວງວຽງຈັນຫລຸດລົງ. ນອກ ຈາກນີ້ ນະຄອນຫລວງວຽງຈັນ ເປັນແຂວງໜຶ່ງທີ່ໄດ້ຮັບຜົນກະທົບຈາກປັດໃຈຕ່າງຯ ພາຍໃນປະ ເທດທີ່ເກີດ ຂຶ້ນຄືກັບ ຫລາຍແຂວງໃນທົ່ວປະເທດ.

ຢ່າງໃດກໍ່ຕາມ ເຖີງວ່າຈຳນວນນັກທ່ອງທ່ຽວຕ່າງປະເທດ ເຂົ້າມາທ່ອງທ່ຽວຢູ່ນະຄອນຫລວງວຽງຈັນໃນໂອ ກາດປີທ່ອງທ່ຽວລາວ 2018 ຜ່ານມາ ບໍ່ບັນລຸຕາມຄາດໝາຍທີ່ວາງໄວ້ ແຕ່ຖ້າທຽບໃສ່ປີ 2017 ເຫັນວ່າເພີ່ມຂຶ້ນ 3 ແສນກ່ວາຄົນ. ການເພີ່ມຂຶ້ນນີ້ ຖືວ່າຍັງຢູ່ໃນເກນປົກກະຕິ ເພາະແຕ່ລະປີມີນັກທ່ອງທ່ຽວຕ່າງປະເທດເຂົ້າມາທ່ອງ ທ່ຽວນະຄອນຫລວງວຽງຈັນ ສະເລ່ຍແລ້ວເພີ່ມຂຶ້ນ ປະມານ 3 ແສນຄົນ.

ຂ່າວ: ບຸນຕຽງ ຈັນທະວົງ

Lao National Radio

ອອກ​ຈາກ ບ່ອນໃຫ້ຄໍາເຫັນ

ກະລຸນາໃຫ້ຄໍາຄິດເຫັນ
ກະລຸນາໃສ່ຊື່