ທ່ານ ສົມຫວັງ ຄຸຣຸລັດ ປະທານບໍລິຫານໂຮງງານ ໄດນາມິກ ໄບໂອ ເອຕາໂນນ ຈຳກັດ ໃຫ້ສຳພາດຫວ່າງບໍ່ດົນມານີ້ວ່າ: ໂຮງງານ ໄດນາມິກ ໄບໂອ ເອຕາໂນນ ເປັນໂຮງງານຜະລິດເອຕາໂນນ 99,5% ແລະ ນ້ຳມັນແອັດຊັງຊີວະພາບ ຫຼື ກາສໂຊຮໍ ອີ 10, ອີ 20 ແລະ ອີ 85 ເຕັມຮູບແບບ ດ້ວຍເຕັກໂນໂລຊີທີ່ທັນສະໄໝ, ບໍ່ເປັນມົນລະພິດຕໍ່ສິ່ງແວດລ້ອມ, ເປັນໂຮງງານແຫ່ງທຳອິດຂອງ ສປປ ລາວ, ມີກຳລັງການຜະລິດເອຕາໂນນ ແຕ່ 10 ພັນລິດ ເຖິງ 50 ພັນລິດ/ວັນ ແລະ ຜະລິດນ້ຳມັນແອັດຊັງຊີວະພາບ ແຕ່ 1 ແສນລິດ ເຖິງ 5 ແສນລິດ/ວັນ ເຊິ່ງປັດຈຸບັນກຳລັງກະກຽມດຳເນີນການກໍ່ສ້າງ ມູນຄ່າລົງທຶນທັງໝົດ 125 ຕື້ກີບ ເປັນການລົງທຶນພາຍໃນ 100% ແລະ ຄາດວ່າຈະໄດ້ເລີ່ມຜະລິດໃນທ້າຍປີ 2019.

ທ່ານ ສົມຫວັງ ຄຸຣຸລັດ ໃຫ້ຮູ້ຕື່ມວ່າ: ທີ່ຕັ້ງຂອງໂຮງງານ ໄດນາມິກ ໄບໂອ ເອຕາໂນນ ຈຳກັດ ແມ່ນຕັ້ງຢູ່ບ້ານນາຂາມ ເມືອງປະທຸມພອນ ແຂວງຈຳປາສັກ ມີເນື້ອທີ່ທັງໝົດ 15 ເຮັກຕາ. ຈຸດປະສົງກໍ່ເພື່ອປະກອບສ່ວນໃນການພັດທະນາເສດຖະກິດ-ສັງຄົມຂອງຊາດ, ແຂວງ ແລະ ທ້ອງຖິ່ນ ໃຫ້ເຕີບໃຫຍ່ຂະຫຍາຍຕົວນັບມື້ດີຂຶ້ນເລື້ອຍໆ ທັງເປັນການຫລຸດຜ່ອນການນຳເຂົ້ານ້ຳມັນເຊື້ອໄຟຈາກຕ່າງປະເທດ ຕາມນະໂຍບາຍທີ່ພັກ-ລັດຂັ້ນເທິງ ແລະ ພາກສ່ວນກ່ຽວຂ້ອງກຳນົດອອກ ທັງປະກອບສ່ວນຊຸກຍູ້ສົ່ງເສີມປະຊາຊົນຜູ້ທີ່ຜະລິດກະສິກຳ ເຮັດໃຫ້ປະຊາຊົນມີວຽກເນັດງານທຳ, ມີລາຍຮັບ ແລະ ມີຊີວິດການເປັນຢູ່ດີຂຶ້ນເລື້ອຍໆ.

ທ່ານ ສົມຫວັງ ຄຸຣຸລັດ ກ່າວຕອນທ້າຍອີກວ່າ: ວັດຖຸດິບທີ່ນຳໃຊ້ໃນການຜະລິດຂອງໂຮງງານ ແມ່ນມັນຕົ້ນ ສະເລ່ຍ 300 ໂຕນ/ວັນ, ຍ້ອນແນວນັ້ນ ນອກຈາກຮັບຊື້ມັນຕົ້ນດິບ ແລະ ມັນຕົ້ນຕາກແຫ້ງຂອງປະຊາຊົນພາຍໃນແຂວງຈຳປາສັກ ແລະ ແຂວງໃກ້ຄຽງແລ້ວ ໂຮງງານພວກເຮົາຍັງຈະໄດ້ສຸມໃສ່ສົ່ງເສີມ ແລະ ຝຶກອົບຮົມທາງດ້ານວິຊາການໃນການປູກມັນຕົ້ນໃຫ້ແກ່ຊາວກະສິກອນຢູ່ທ້ອງຖິ່ນຮາກຖານໃນເຂດໃກ້ຄຽງໂຮງງານ ແລະ ເຂດອື່ນໆຕາມຄວາມເໝາະສົມ ເພື່ອປູກມັນຕົ້ນໃຫ້ໄດ້ຄຸນນະພາບ ດ້ວຍຂັ້ນຕອນທີ່ຖືກຕ້ອງ.

ຂ່າວ-ພາບ: ທູນທອງໃຈ

LEAVE A REPLY

Please enter your comment!
Please enter your name here