ໃນຕອນແລງຂອງວັນທີ 8 ກຸມພາ 2019, ກອງປະຊຸມສະຫຼຸບວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ທົ່ວແຂວງຫຼວງພະບາງ ປະຈໍາປີ 2018 ໄດ້ປິດລົງດ້ວຍຜົນສໍາເລັດອັນຈົບງາມພາຍ ຫຼັງທີ່ໄດ້ດໍາເນີນມາເປັນເວລາ 2 ວັນ, ໂດຍການໃຫ້ກຽດເຂົ້າຮ່ວມຂອງທ່ານສຈ.ປອ ບໍ່ແສງຄຳ ວົງດາລາ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.

ກອງປະຊຸມໄດ້ສຸມໃສ່ການສະຫຼຸບຄືນການຈັດຕັ້ງປະຕິບັດໜ້າທີ່ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໃນ 1 ປີຜ່ານມາ, ພ້ອມທັງວາງທິດທາງແຜນການສຳລັບປີ 2019, ລວມທັງ ໄດ້ມີການປະກອບຄວາມຄິດຄວາມເຫັນທີ່ສ້າງສັນຈາກຫຼາຍພາກສ່ວນ ໃນຫຼາຍບັນຫາທີ່ສຳຄັນ.
ອີງຕາມບົດລາຍງານການເຄື່ອນໄຫວວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວປະຈຳປີຜ່ານມາ, ວຽກ ງານຖະແຫຼງຂ່າວໄດ້ມີການພັດທະນາທາງດ້ານວິທີການ ແລະ ຮູບແບບການນໍາສະເໜີຂໍ້ມູນຂ່າວສານ, ສາລະໜ້າຮູ້ ແລະ ຄວາມບັນເທີງ ຜ່ານສື່ຕ່າງໆ ໂດຍສະເພາະ ວິທະຍຸ, ໂທລະພາບ ແລະ ໜັງສືພິມ ຊຶ່ງໄດ້ຊ່ວຍເຮັດໃຫ້ສັງຄົມໄດ້ຮັບຂໍ້ມູນຂ່າວສານດ້ານຕ່າງໆ ຊັດເຈນ ແລະວ່ອງໄວ້ກວ່າເກົ່າ.

ວຽກງານວັດທະນະທໍາ ກໍ່ໄດ້ຢຶດໝັ້ນທິດນໍາ ປົກປັກຮັກສາ ແລະ ເສີມຂະຫຍາຍຮີດຄອງປະເພນີ ວັດທະນະທໍາອັນເປັນມູນເຊື້ອຂອງຊາດ, ຂອງທ້ອງ ຖິ່ນ ກໍ່ຄື ເອກະລັກສະເພາະຂອງຊົນເຜົ່າຕ່າງໆ ພາຍໃນ ແຂວງໄດ້ເປັນຢ່າງດີ, ປົກປັກຮັກສາມໍລະດົກໃຫ້ຊົງຄຸນຄ່າ ແລະ ຍືນຍົງ; ຂະບວນການ ສີລະປະວັນນະຄະດີ ຢູ່ແຕ່ລະໂຮງຮຽນ ແລະທ້ອງຖິ່ນຮາກຖານບ້ານກໍ່ໄດ້ເຄື່ອນໄຫວ ຮັບໃຊ້ວັນສໍາຄັນຕ່າງໆຂອງຊາດ ແລະ ຂອງພັກ, ລວມທັງການສະເຫຼີມສະຫຼອງປີທ່ອງທ່ຽວລາວ 2018.

ສຳລັບວຽກງານທ່ອງທ່ຽວ ກໍ່ໄດ້ເອົາໃຈໃສ່ໃນການພັດທະນາ ແລະ ສົ່ງເສີມການທ່ອງທ່ຽວ ຕິດພັນກັບການອະນຸລັກປົກປັກຮັກສາ ແລະ ເສີມຂະຫຍາຍມໍລະດົກ ທາງດ້ານທຳມະຊາດ, ປະຫວັດສາດ ແລະ ວັດທະນະທຳໄວ້ໃຫ້ຍືນຍົງ ແລະ ສົ່ງເສີມການທ່ອງທ່ຽວ ດ້ວຍຫຼາຍຮູບແບບ ແລະຫຼາຍສີສັນ, ພິເສດແມ່ນໄດ້ເຮັດສໍາເລັດບັນດາກິດຈະກໍາໃນການສະເຫຼີມສະຫຼອງປີທ່ອງທ່ຽວລາວ 2018 ໂດຍສາມາດດຶງດູດນັກທ່ອງທ່ຽວໃຫ້ມາທ່ຽວຫຼວງພະບາງໄດ້ເຖິງ 755.019 ຄົນ, ຊຶ່ງເພີ່ມຂື້ນ 15,19 ສ່ວນຮ້ອຍ ຖ້າສົມທຽບໃສ່ປີ 2017.

ໃນກອງປະຊຸມຄັ້ງນີ້, ບັນດາຜູ້ເຂົ້າຮ່ວມຍັງໄດ້ຮັບຟັງການໂອ້ລົມຂອງ ທ່ານສຈ.ປອ ບໍ່ແສງຄໍາ ວົງດາລາ, ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ຊຶ່ງທ່ານໄດ້ເນັ້ນໜັກຫຼາຍບັນຫາສຳຄັນແລະ ເປັນເຂັມຊີ້ທິດເຍືອງທາງ ໃຫ້ແກ່ການຈັດຕັ້ງເຄື່ອນໄຫວວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຂອງແຂວງຫຼວງພະບາງສຳລັບປີນີ້ ແລະ ໄລຍະຕໍ່ໄປ, ເປັນຕົ້ນແມ່ນທ່ານໄດ້ເນັ້ນໃຫ້ ຄະນະນຳພະແນກ ຖວທ ແຂວງ ສືບຕໍ່ປະຕິບັດວຽກງານສືກສາອົບຮົມການເມືອງແນວຄິດ ເປັນກົກ, ແລະ ເຕົ້າໂຮມຄວາມສາມັກຄີ ໃຫ້ເປັນປຶກ ແຜ່ນ ໂດຍຖືເປັນພັນທະໜ້າທີ່ ແລະ ຄວາມຮັບຜິດ ຊອບການເມືອງຂອງຕົນ, ຄຽງຄູ່ກັບການປັບປຸງຂອດທີ່ຄົງຄ້າງຂອງວຽກງານທຸກດ້ານ , ລວມທັງ ການສ້າງເງື່ອນໄຂອຳນວຍຄວາມສະດວກໃຫ້ແກ່ປີທ່ອງທ່ຽວລາວຈີນ 2019 ແລະ ການຮັກສານາມມະຍົດເມືອງຍອດນິຍົມແຫ່ງການທ່ອງທ່ຽວ ຈາກວາລະສານວັນເດີລັດ ທີ່ໄດ້ມອບໃຫ້ແກ່ແຂວງຫຼວງພະບາງອີກຄັ້ງ ໃນປີ 2019.

ໃນກອງປະຊຸມຄັ້ງນີ້, ຍັງໄດ້ມີການມອບໃບຍ້ອງຍໍຂອງທ່ານເຈົາແຂວງ ໃຫ້ແກ່ບັນດາພາກສ່ວນ ແລະ ບຸກຄົນດີເດັ່ນທີ່ໄດ້ມີສ່ວນຮ່ວມຜະລິດສາລະຄະດີ ມະຫັດສະຈັນເມືອງງອຍ ໂດຍສາມາດຍາດໄດ້ອັນດັບທີ່ 1 ໃນທົ່ວປະເທດ ແລະ ຜູ້ທີ່ປະກອບສ່ວນພັດທະນາວຽກງານ ຖວທ ຂອງແຂວງຫຼວງພະບາງ, ພ້ອມທັງມອບໃບຍ້ອງຍໍຂອງຫົວໜ້າພະແນກ ຖວທ ແຂວງໃຫ້ແກ່ບັນດາພາກສ່ວນ ແລະ ບຸກຄົນດີເດັ່ນໃນການປະຕິບັດວຽກ ງານວິຊາສະເພາະຂອງຕົນຕື່ມອີກ.

ເຂົ້າຮ່ວມກອງປະຊຸມວຽກງານ ຖວທ ແຂວງຫຼວງພະບາງໃນຄັ້ງນີ້, ຍັງມີທ່ານວົງສະຫວັນເທບພະຈັນ, ຮອງເຈົ້າແຂວງຫຼວງພະບາງ ພ້ອມດ້ວຍຜູ້ຕາງໜ້າບັນດາພະແນກ ແລະ ຂະແຫນງການກ່ຽວຂ້ອງ ແລະ ພະນັກງານທົ່ວພະແນກ ຖວທແຂວງ ຕະຫຼອດຮອດ ຫົວໜ້າ ແລະ ຮອງຫົວໜ້າຫ້ອງການຖວທຈາກ 11 ເມືອງ ແລະ 1 ນະຄອນ ທົ່ວແຂວງຫຼວງພະບາງ.

ຂ່າວ: ອາພຸດເດດ ບຸບຜາ

ອອກ​ຈາກ ບ່ອນໃຫ້ຄໍາເຫັນ

ກະລຸນາໃຫ້ຄໍາຄິດເຫັນ
ກະລຸນາໃສ່ຊື່