ທ້າຍອາທິດຜ່ານມາ ທີ່ສູນຝຶກອົບຮົມ ແລະ ການຮ່ວມມື ນະຄອນຫລວງວຽງຈັນ, ກົມອົງການຈັດຕັ້ງສາກົນ ກະຊວງການຕ່າງປະເທດ ຮ່ວມກັບ ຫ້ອງການຜູ້ປະສານງານອົງການສະຫະປະ ຊາຊາດ (ສປຊ) ປະຈຳ ສປປ ລາວ, ໄດ້ຈັດກອງປະຊຸມວິຊາການຄະນະກໍາມະການຊີ້ນຳຮ່ວມ ລະ ຫວ່າງ ລັດຖະບານ ແຫ່ງ ສປປ ລາວ ແລະ ອົງການສະຫະປະຊາຊາດ ພາຍໃຕ້ການເປັນປະທານຮ່ວມຂອງ ທ່ານ ໄມທອງ ທໍາມະວົງສາ ຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ ແລະ ທ່ານ ນາງ ຊາຣາ ເຊເກັນເນສ ຜູ້ປະສານງານອົງການ ສປຊ ປະຈໍາ ສປປ ລາວ.

ຈຸດປະສົງ ເພື່ອຮ່ວມກັນທົບທວນຄືນການຈັດຕັ້ງປະຕິບັດຂອບການຮ່ວມມື ລະຫວ່າງ ລັດຖະ ບານ ແຫ່ງ ສປປ ລາວ ແລະ ອົງການ ສປຊ 2017-2021 ຫລື ເອີ້ນຫຍໍ້ວ່າ UNPF 2017-2021 ແລະ ປະກອບຄຳເຫັນໃສ່ບັນດາເອກະສານສຳຄັນຈຳນວນໜຶ່ງ ທີ່ກ່ຽວຂ້ອງກັບການປະເມີນການຈັດ ຕັ້ງປະຕິບັດ ຂອບການຮ່ວມມືດັ່ງກ່າວໃນໄລຍະຜ່ານມາ. ນອກນັ້ນ, ກອງປະຊຸມຍັງໄດ້ພ້ອມກັນປຶກສາຫາລື ກ່ຽວກັບທິດທາງໃນການຮ່າງເອກະສານ ຂອບການຮ່ວມມືສະບັບໃໝ່ 2022-2026 ເພື່ອປ່ຽນແທນສະບັບປັດຈຸບັນ ທີ່ໃກ້ຈະໝົດກຳນົດໃນທ້າຍປີນີ້, ໂດຍຕ້ອງຮັບປະກັບໃຫ້ສອດຄ່ອງກັບແຜນຍຸດທະຍາດ ແລະ ບັນດາວຽກງານບູລິມະສິດຂອງລັດຖະບານ ໂດຍສະເພາະແມ່ນແຜນພັດທະນາເສດ ຖະກິດສັງຄົມແຫ່ງຊາດ ສະບັບທີ IX ຂອງລັດຖະບານ ທີ່ພວມຈະຖືກຮັບຮອງເອົາໃນໄວໆນີ້.

ກອງປະຊຸມຄັ້ງນີ້, ຍັງໄດ້ຮັບຮອງເອົາບົດລາຍງານຄວາມຄືບໜ້າ ການຈັດຕັ້ງປະຕິບັດຂອບການຮ່ວມມື ລະຫວ່າງ ລັດຖະບານແຫ່ງ ສປປ ລາວ ແລະ ອົງການ ສປຊ ປະຈໍາປີ 2019 ແລະ ໄດ້ຕົກລົງເຫັນດີຕໍ່ໂຄງຮ່າງ ແຜນງານຂອບການຮ່ວມມືສະບັບໃໝ່ ໂດຍອີງໃສ່ຫລັກການ 5P ຂອງວາລະປີ 2030 ທີ່ຖືເອົາປະຊາຊົນ, ໜ່ວຍໂລກ, ຄວາມຈະເລີນຮຸ່ງເຮືອງ, ສັນຕິພາບ ແລະ ການຮ່ວມມື ເພືື່ອເປັນບ່ອນອີງ ໃນການສ້າງແນວທາງການພັດທະນາທີ່ກວມລວມ ແລະ ມີຄວາມຍືນຍົງ, ມີການພັດທະນາສັງຄົມ ແລະ ຍົກລະດັບຂີດຄວາມສາມາດຂອງສະຖາບັນໃຫ້ມີປະສິດທິພາບ.

Cr: ຂປລ

LEAVE A REPLY

Please enter your comment!
Please enter your name here