ໃນວັນທີ 22 ມີນາ 2021 ທີ່ ໂຮງຮຽນສາມັນກິນນອນຊົນເຜົ່າ ເມືອງນ້ຳບາກ ໄດ້ຈັດພິທີມອບຂອງຂັວນລາງວັນ ໃຫ້ນ້ອງນັກຮຽນ ຜູ້ທີ່ມີພອນສະຫວັນຮຽນດີ-ຮຽນເກັ່ງ ປະຈຳພາກຮຽນ 1 ແລະ ນັກຮຽນເກັ່ງທີ່ໄດ້ຄະແນນ 7 ຂຶ້ນໄປ ໃນສົກຮຽນ 2020-2021, ໂດຍການເປັນປະທານຂອງທ່ານ ຄຳເຜີຍ ມີຕາຜົນ ຜູ້ອຳນວຍການໂຮງຮຽນ, ເຂົ້າຮ່ວມມີ ຄະນະອຳນວຍການ, ຫົວໜ້າ ແລະ ຮອງ, ຄູ-ອາຈານ ແລະ ນ້ອງນັກຮຽນເຂົ້າຮ່ວມ ຢ່າງພ້ອມພຽງ.
ຈຸດປະສົງຂອງການມອບຂອງຂັວນລາງວັນ ແລະ ຍ້ອງຍໍໃນຄັ້ງນີ້, ເພື່ອເປັນການປະຕິບັດຕາມແຜນພັດທະນາຂອງໂຮງຮຽນວາງອອກ, ເພື່ອເປັນການປະຕິບັດເນື້ອໃນ 5 ຫລັກມູນການສຶກສາຂອງກະຊວງສຶກສາທິການ ແລະ ກິລາ ວາງອອກ, ເປັນການສົ່ງເສີມໃຫ້ນ້ອງນັກຮຽນໄດ້ສະແດງຄວາມຮູ້ຄວາມສາມາດຂອງຕົນເອງ ແລະ ເປັນການຝຶກຝົນຫລໍ່ຫລອມຕົນເອງ ໃຫ້ກາຍເປັນນັກຮຽນທີ່ຮຽນດີ-ຮຽນເກັ່ງພາຍໃນໂຮງຮຽນ ແລະ ສາມາດເປັນຕົວແທນເຂົ້າຮ່ວມສອບເສັງຂັ້ນເມືອງ, ຂັ້ນແຂວງ ແລະ ຂັ້ນອື່ນໆ.
ໃນພິທີໄດ້ມີການມອບຂອງຂວັນລາງວັນ ທີ່ເປັນອຸປະກອນການຮຽນ ເຊັ່ນ: ປື້ມຂຽນ ແລະ ບິກ ໃຫ້ນ້ອງນັກຮຽນ ຜູ້ທີ່ຮຽນດີ-ຮຽນເກັ່ງ ປະຈຳເດືອນ ອັນດັບທີ 1 ຈຳນວນ 17 ຄົນ, ຍິງ 9 ຄົນ, ອັນດັບທີ 2 ຈໍານວນ 20 ຄົນ, ຍິງ 15 ຄົນ. ຮຽນດີຮຽນ-ຮຽນເກັ່ງປະຈຳພາກຮຽນ 1 ອັນດັບທີ 1 ມີ 19 ຄົນ, ຍິງ 9 ຄົນ, ອັນດັບທີ 2 ມີ 15 ຄົນ, ຍິງ 10 ຄົນ.
ໃນໂອກາດດັ່ງກ່າວ, ທ່ານ ຄໍາເຜີຍ ມີຕາຜົນ ກໍໄດ້ຍ້ອງຍໍຊົມເຊີຍຕໍ່ຜົນງານ ທີ່ນ້ອງນັກຮຽນຍາດມາໄດ້ທີ່ຜ່ານມາ. ພ້ອມນີ້, ໄດ້ເນັ້ນໜັກໃຫ້ນ້ອງນັກຮຽນ ເອົາໃຈໃສ່ຄົ້ນຄ້ວາຮ່ຳຮຽນໃຫ້ຫລາຍ, ຮຽນໃຫ້ເກັ່ງ, ພ້ອມກັນແຂ່ງຂັນຍາດເອົາຂອງຂວັນລາງວັນໃຫ້ຫລາຍ ແລະ ພ້ອມກັນປະຕິບັດ 3 ຂໍ້ແຂ່ງຂັນ ແລະ 5 ຫລັກມູນຂອງການສຶກສາ ທີ່ກະຊວງສຶກສາທິການ ແລະ ກິລາ ວາງອອກ.
