ໄຊຍະບູລີ: ກອງເລຂາ ຄະນະກໍາມະການຄຸ້ມຄອງໄພພິບັດຂັ້ນເມືອງ, ເມືອງ ພຽງແຂວງ ໄຊຍະບູລີ ໄດ້ໃຫ້ຮູ້ວ່າ: ໃນວັນທີ 28 ມີນາ 2021 ນີ້, ເວລາ 18 ໂມງ 30 ນາທີ ໄດ້ເກີດມີລົມພະຍຸພັດເຮືອນຂອງປະຊາຊົນ 3 ບ້ານ ໄດ້ຮັບຜົນເສຍຫານ ລວມມູນຄ່າເກືອບ 2 ຕື້ກວ່າກີບ. ໃນວັນທີ 31 ມີນາ 2021 ນີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍພາກສ່ວນທີ່ກ່ຽວຂ້ອງຈາກແຂວງ ແລະ ເມືອງພຽງ ໄດ້ລົງກວດກາເບິ່ງຜົນເສຍຫາຍຕົວຈິງຢູ່ເຂດທີ່ຖືກຜົນກະທົບດັ່ງກ່າວ, ພ້ອມທັງໄດ້ເນັ້ນໜັກໃຫ້ພາກສ່ວນທີ່ກ່ຽວຂ້ອງກວດກາ ແລະ ເກັບກໍາຂໍ້ມູນຜົນເສຍຫາຍຂອງປະຊາຊົນ ແລະ ບໍລິສັດທີ່ປູກກ້ວຍຄືນໃຫ້ລະອຽດ ພ້ອມທັງສັງລວມລາຍງານຫາຂັ້ນເທິງຕາມຂັ້ນຕອນ ແລະ ໃຫ້ການຊ່ວຍເຫລືອເບື້ອງຕົ້ນ ແກ່ຄອບຄົວທີ່ຖືກກະທົບໜັກຢ່າງຮີບດ່ວນ.
![](https://scontent.fvte2-1.fna.fbcdn.net/v/t1.6435-9/166760713_1592955614241546_8376022522749527186_n.jpg?_nc_cat=110&ccb=1-3&_nc_sid=730e14&_nc_eui2=AeHdnAa8dVGoEyp3k3fuVwGPsGip95bHnNywaKn3lsec3MK7xQbVbZJmDqeJI1y-U2Y&_nc_ohc=H9lCc_FhdCoAX8qNTrj&_nc_ht=scontent.fvte2-1.fna&oh=a0e07e3d94e383f514526597b0538e90&oe=6089E3ED)
ສຳລັບ ຜູ້ທີ່ໄດ້ຮັບຜົນກະທົບ ແລະ ເສຍຫາຍຢູ່ 3 ບ້ານ, ມີ 8 ຄອບຄົວ, ຈໍານວນ 25 ຄົນ, ຊັບສິນຂອງລັດ 3 ແຫ່ງ ແລະ ສວນກ້ວຍ 2 ບໍລິສັດເສຍຫາຍຢ່າງໜັກໜ່ວງ ຄື: ບ້ານ ນາແລ ໄດ້ຮັບຜົນກະທົບ 5 ຄອບຄົວ, ມູນຄ່າຜົນເສຍຫາຍ 11 ລ້ານກວ່າກີບ, ບ້ານ ວັງຄໍາ 2 ຄອບຄົວ, ມູນຄ່າຜົນເສຍຫາຍ 1 ລ້ານກວ່າກີບ ແລະ ບ້ານໜອງບົວທອງ ມີ 1 ຄອບຄົວ, ມູນຄ່າເສຍຫາຍ 2 ແສນກວ່າກີບ, ໂຮງຮຽນປະຖົມໂພນຊຽງ ເສຍຫາຍມູນຄ່າເສຍຫາຍ 2 ລ້ານກວ່າກີບ, ໂຮງຮຽນປະຖົມນາແລ ເສຍຫາຍມູນຄ່າ 1 ລ້ານກວ່າກີບ, ຫ້ອງການບ້ານ ນາແລ ມູນຄ່າ 3 ລ້ານກີບ, ສວນກ້ວຍຂອງບໍລິສັດ ບົວບານ ຖືກເສຍຫາຍເນື້ອທີ່ 63 ເຮັກຕາ, ຈໍານວນຕົ້ນກ້ວຍ 142.000 ຕົ້ນ, ລວມມູນຄ່າເສຍຫາຍ 16 ຕື້ກີບ, ບໍລິສັດ ຕາຄິງ 10 ເຮັກຕາ, ມີ 31.000 ຕົ້ນ, ມູນຄ່າເສຍຫາຍ 3 ຕື້ກວ່າກີບ.
![](https://scontent.fvte2-1.fna.fbcdn.net/v/t1.6435-9/167219537_1592955607574880_8556771403813418024_n.jpg?_nc_cat=102&ccb=1-3&_nc_sid=730e14&_nc_eui2=AeE3-Q5mZIJwFIRem4V8dwIxNR7xTdT_Gc41HvFN1P8ZzkzB_Dz6JWa6h27FLXLZ_0o&_nc_ohc=vCAluE0sVxMAX-Xp6fu&_nc_ht=scontent.fvte2-1.fna&oh=8ae7ce7fd4f2eddf95722284b114066f&oe=608A2D3C)
ຂ່າວ-ພາບ: ອຸ່ນເຮືອນ ໂພທິລັກ