ໃນວັນທີ 11 ພຶດສະພາ 2021, ທີ່ກະຊວງປ້ອງກັນປະເທດ ໄດ້ມີກອງປະຊຸມ ຄັ້ງປະຖົມມະລຶກ ຄະນະກໍາມະການຄຸ້ມຄອງໄພພິບັດ ຂັ້ນສູນກາງ (ຄພສ) ໂດຍການເປັນປະທານຂອງທ່ານ ພົອ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ ປະທານຄະ ນະກຳມະການ ຄພສ, ມີບັນດາລັດຖະມົນຕີ, ຮອງລັດຖະມົນຕີ ໃນຂະແໜງການກ່ຽວຂ້ອງເຂົ້າຮ່ວມ.
![](https://scontent.fvte2-2.fna.fbcdn.net/v/t1.6435-9/183676714_5416380055103549_5479426902880021717_n.jpg?_nc_cat=100&ccb=1-3&_nc_sid=730e14&_nc_eui2=AeHH4735cIdVmNnpbWpsuW0xG3GO_It_JpYbcY78i38mlkzOx7QTA6RSg-7ppdaLpdQ&_nc_ohc=9AlipRNOdHQAX9EEklG&_nc_ht=scontent.fvte2-2.fna&oh=1955dfac882a885997a8fcc3bd02279b&oe=60BDE15C)
ກອງປະຊຸມດັ່ງກ່າວ, ຈະໄດ້ພ້ອມກັນປະກອບຄຳຄິດເຫັນ ແລະ ເປັນເຈົ້າການຄົ້ນຄວ້າ, ພິຈາລະ ນາຮັບຮອງ ຕໍ່ບັນດາເອກະສານທີ່ທາງກອງເລຂາ ຄະນະກໍາມະການຄຸ້ມຄອງໄພພິບັດ ໄດ້ນໍາສະເໜີ ເປັນ ຕົ້ນ ບົດລາຍງານສະພາບໄພພິບັດ ແລະ ການແກ້ໄຂຊ່ວຍເຫ]nອສຸກເສີນ ໄລຍະ 6 ເດືອນຕົ້ນປີ 2021, ແຜນຈຸດສຸມການການກຽມພ້ອມຕອບໂຕ້ໄພພິບັດ ປີ 2021 ແລະ ຮ່າງຂໍ້ຕົກລົງວ່າດ້ວຍການແບ່ງຄວາມຮັບຜິດຊອບ ຂອງຄະນະກຳມະການຄຸ້ມຄອງໄພພິບັດຂັ້ນສູນກາງ.ໃນໂອກາດດັ່ງກ່າວ, ທ່ານ ພົອ ຈັນສະໝອນ ຈັນຍາລາດ ໄດ້ກ່າວວ່າ: ກອງປະຊຸມຄັ້ງນີ້, ຖືວ່າເປັນຄັ້ງທໍາອິດ ຂອງຄະນະກໍາມະການຄຸ້ມຄອງໄພພິບັດ ພາຍຫລັງທີ່ ຂໍ້ຕົກລົງແຕ່ງຕັ້ງຄະນະກຳມະການຄຸ້ມຄອງໄພພິບັດຂັ້ນສູນກາງ ສະບັບເລກທີ 35/ນຍລົງວັນທີ 28 ເມສາ 2021, ໄດ້ອະນຸມັດຕາມກົດ ໝາຍວ່າດ້ວຍການຄຸ້ມຄອງໄພພິບັດ ເລກທີ 71/ສພຊ, ລົງວັນທີ 24 ມິຖຸນາ 2019 ແລະ ດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະກຳມະການຄຸ້ມຄອງໄພພິບັດ ສະບັບເລກທີ 239/ນຍ, ລົງວັນທີ 18 ພຶດສະພາ 2020.
ປັດຈຸບັນ, ບັນຫາໄພພິບັດ ແລະ ຄວາມສ່ຽງຈາກການປ່ຽນແປງຂອງດິນຟ້າອາກາດ ເປັນຕົ້ນ: ໄພນໍ້າຖ້ວມ, ແຜ່ນດິນໄຫວ, ຄື້ນຊຶນາມິ, ລົມພະຍຸພັດ, ການລະບາດຂອງພະຍາດ, ສັດຕູພືດ, ອື່ນໆ ຖືວ່າຍັງເປັນບັນຫາທີ່ຍັງສືບຕໍ່ເກີດຂື້ນຖີ່ ສ້າງຄວາມເສຍຫາຍ ແລະ ສູນເສຍ ຕໍ່ສຸຂະພາບ, ຊີວິດ, ຊັບສິນ ແລະ ການດໍາລົງຊີວິດຂອງປະຊາຊົນບັນດາເຜົ່າ, ສ້າງຄວາມເສຍຫາຍຕໍ່ພື້ນຖານໂຄງລ່າງເສດຖະກິດ, ສັງຄົມ ແລະ ສິ່ງແວດລ້ອມ, ເປັນການບັນທອນ ແລະ ທ່ວງດຶງຕໍ່ການພັດ ທະນາເສດຖະກິດ-ສັງຄົມ ຂອງບັນດາປະເທດ ໃນໂລກ ລວມທັງ ຢູ່ ສປປ ລາວ ຂອງພວກເຮົາ, ໃນນີ້ ລວມທັງ ບັນຫາການລະບາດຂອງພະຍາດ ໂຄວິດ-19 ທີ່ຍັງສືບຕໍ່ ແລະ ສົ່ງຜົນກະທົບຢ່າງໜັກໜ່ວງ ຕໍ່ສຸຂະພາບ, ຊີວິດ ແລະ ການດໍາລົງຊີວິດຂອງປະຊາຊົນ, ອື່ນໆ. ສະເພາະຢູ່ ສປປ ລາວ ຂອງພວກເຮົາ, ບັນຫາຜົນກະທົບຂອງໄພພິບັດ ແມ່ນໜັກໜ່ວງ ແລະ ສ້າງຄວາມເສຍຫາຍຫລາຍຂຶ້ນແຕ່ລະປີ, ສັງລວມແລ້ວ ໃນໄລຍະ 5 ປີຜ່ານມາ ໄດ້ມີເຫດການໄພພິບັດເກີດຂຶ້ນທັງໝົດ 235 ຄັ້ງ, ສົ່ງຜົນກະທົບໂດຍກົງຕໍ່ປະຊາຊົນ 1.860.165 ຄົນ, ເສຍຊີວິດ 121 ຄົນ, ສ້າງຄວາມເສຍຫາຍ ແລະ ສູນເສຍ ຕໍ່ໂຄງລ່າງພື້ນຖານເສດຖະກິດ-ສັງຄົມ ແລະ ສິ່ງແວດລ້ອມ ຄິດເປັນມູນຄ່າເສຍຫາຍທັງໝົດປະມານ 5.538.247.383.912 ກີບ.
![](https://scontent.fvte2-3.fna.fbcdn.net/v/t1.6435-9/184109068_5416380121770209_1576012225320055838_n.jpg?_nc_cat=111&ccb=1-3&_nc_sid=730e14&_nc_eui2=AeF7X0yHVhccQZpqXRVEZwkBnqkb7PfMXvqeqRvs98xe-n_ld1sjBXanT9-JzE6tJag&_nc_ohc=OCtNXbEeUEsAX9SQQpM&_nc_ht=scontent.fvte2-3.fna&oh=400aa53394668f96c6b3831bf9ff5d2d&oe=60C10CE4)
ເຫດການທີ່ພົ້ນເດັ່ນ ແມ່ນໄພນໍ້າຖ້ວມ ໃນປີ 2018 ທີ່ສາເຫດມາຈາກ ເຂື່ອນເຊປ່ຽນ-ເຊນໍ້ານ້ອຍແຕກພັງ ສົ່ງຜົນກະທົບປະຊາຊົນ ຢູ່ ເມືອງ ສະໜາມໄຊ ແຂວງອັດຕະປື; ໄພ ນໍ້າຖ້ວມສົ່ງຜົນກະທົບຢູ່ 6 ແຂວງພາກກາງ ແລະ ພາກໄຕ້ ປີ 2019 ແລະ ປີ 2020 ນໍ້າຖ້ວມໜັກຢູ່ ແຂວງ ສະຫວັນນະເຂດ.ເລີ່ມແຕ່ທ້າຍ ປີ 2019 ຈົນເຖິງປັດຈຸບັນ, ຜົນກະທົບຈາກການແຜ່ລະບາດຂອງພະຍາດ ໂຄວິດ- 19 ຍິ່ງເພີ່ມຄວາມອັນຕະລາຍຕໍ່ການລົງຊີວິດຂອງປະຊາຊົນ, ຊຶ່ງໄດ້ສົ່ງຜົນກະທົບຢ່າງໃຫຍ່ຫລວງ ຕໍ່ໂຄງສ້າງຂອງສັງຄົມ, ເສດຖະກິດ, ເຮັດໃຫ້ການຜະລິດສົ່ງອອກ-ນຳເຂົ້າ ຖືກຍຸດສະຫງັກ, ຫລາຍທຸລະກິດຫ້າງຮ້ານ ຖືກຍຸດກິດຈະການ, ແຮງງານຖືກພັກວຽກ ແລະ ຫວ່າງງານ. ແນ່ນອນວ່າ, ສປປ ລາວ ທີ່ເປັນປະເທດພວມສູ້ຊົນ ພັດທະນາໃຫ້ຫລຸດພົ້ນອອກຈາກຄວາມທຸກຍາກ, ມາຖືກຄຸກຄາມຈາກໄພພິບັດທໍາມະຊາດ ທີ່ເກີດຢ່າງຮຸນແຮງຂຶ້ນຊໍ້າແລ້ວຊໍ້າອີກ ຍິ່ງຈະເຮັດໃຫ້ການພັດທະນາເສດຖະກິດ-ສັງຄົມ ພົບກັບອຸປະສັກ ບໍ່ສາມາດບັນລຸຕາມຄາດໝາຍທີ່ວາງໄວ້.
ທ່ານ ພົອ ຈັນສະໝອນ ຈັນຍາລາດ ກ່າວຕື່ມວ່າ: ກອງປະຊຸມຄະນະກໍາມະການຄຸ້ມຄອງໄພ ພິບັດຂັ້ນສູນກາງຄັ້ງນີ້, ສຸດທີ່ມີຄວາມໝາຍສໍາຄັນ ແລະ ເປັນຄັ້ງທໍາອິດ ທີ່ພວກເຮົາໄດ້ພົບປະຊຸມກັນ ຕາມຂໍ້ຕົກລົງ ຂອງນາຍົກລັດຖະມົນຕີ ສະບັບເລກທີ 35/ນຍ, ຊຶ່ງພວກເຮົາຈະໄດ້ຮ່ວມກັນຄົ້ນຄວ້າ ປະ ກອບຄໍາເຫັນ ແລະ ເອກະພາບ ຕໍ່ກັບຮ່າງຂໍ້ຕົກລົງການແບ່ງຄວາມຮັບຜິດຊອບຂອງຄະນະກໍາມະການຄຸ້ມຄອງໄພພິບັດຂັ້ນສູນກາງ; ນໍາສະເໜີແລກປ່ຽນຂໍ້ມູນ ກ່ຽວກັບການກຽມຄວາມພ້ອມຮັບມືກັບໄພພິບັດໃນລະດູຝົນປີ 2021 ຂອງບັນດາຂະແໜງການ ໃນຄະນະກໍາມະການຄຸ້ມຄອງໄພພິບັດຂັ້ນສູນກາງ ຕາມທີ່ໄດ້ກໍານົດໃນແຜນການກຽມພ້ອມຕອບໂຕ້ໄພພິບັດປະຈໍາ ປີ 2021 ທີ່ເຊັນຮັບຮອງໄປແລ້ວນັ້ນ, ລວມທັງ ຮ່ວມກັນປຶກສາຫາລື ແລະ ເອກະພາບ ໃນກົນໄກການປະສານງານ ແລະ ການລາຍງານສະພາບໄພ ພິບັດ ແລະ ການຊ່ວຍເຫລືອໄພພິບັດ ທັງໄລຍະສຸກເສີນ ແລະ ການຟື້ນຟູຄືນຫລັງໄພພິບັດ.
ຂ່າວ: ສົມຫວັງພາບ: ເກດສະໜາ