ມານາພອນ ອິນທະສອນ ນັກສຶກສາ ຄສປ ຄວ້າລາງວັນຊະນະເລີດໃນການແຂ່ງຂັນອອກແບບສະຖາປັດຕະຍະກຳສາດ ປະຈຳປີ 2021
![](https://tholakhong.com/wp-content/uploads/2021/11/f.jpeg)
ໃນວັນທີ 2 ພະຈິກ 2021 ຜ່ານມາ, ຄະນະສະຖາປັດຕະຍະກຳສາດ (ຄສປ) ມະຫາວິທະຍາໄລແຫ່ງຊາດ ໄດ້ຈັດງານແຂ່ງຂັນການອອກແບບສະຖາປັດຕະຍະກຳສາດ ສໍາລັບນັກສຶກສາສະຖາປັດຕະຍະກຳສາດ ປະຈຳປີ 2021 (ຜ່ານສື່ອອນລາຍ).
![](https://tholakhong.com/wp-content/uploads/2021/11/ff.jpeg)
ງານແຂ່ງຂັນອອກແບບຄັ້ງນີ້ ໃຫ້ກຽດເຂົ້າຮ່ວມໂດຍ ທ່ານ ສິນຖາວອນ ດາລາວົງ ຄະນະບໍດີ ຄສປ, ທ່ານ Prof.Dr.Youngil Lee ປະທານສະມາຄົມສະຖາປັດຕະຍະກໍາສາດ ອາຊຽນ ພ້ອມດ້ວຍບັນດາທ່ານຄະນະກຳມະການ ແລະນັກສຶກສາ ເຂົ້າຮ່ວມ.ການແຂ່ງຂັນອອກແບບສະຖາປັດຕະຍະກຳສາດ ສໍາລັບນັກສຶກສາທີ່ກຳລັງສຶກສາໃນຫຼັກສູດສະຖາປັດຕະຍະ ກຳສາດ, ມະຫາວິທະຍາໄລແຫ່ງຊາດໄດ້ເລິ່ມຕົ້ນມາແຕ່ປີ 2014.
![](https://tholakhong.com/wp-content/uploads/2021/11/vw.jpeg)
ນັບແຕ່ນັ້ນມາທາງ ຄສປ ກໍໄດ້ຈັດການແຂ່ງຂັນອອກແບບສະຖາປັດຕະຍະກຳສາດຂຶ້ນເປັນປະຈຳທຸກປີ, ເພື່ອຄັດເລືອກເອົານັກສຶກສາທີ່ເປັນຕົວແທນເຂົ້າຮ່ວມການແຂ່ງຂັນໃນລະດັບອາຊີ.
ຄຽງຄູ່ກັບການສົ່ງນັກສຶກສາເຂົ້າຮ່ວມງານແຂ່ງຂັນອອກແບບໃນແຕ່ລະປີ ເຊິ່ງຄະນະອາຈານ ແລະນັກສຶກສາໄດ້ມີການເກັບກ່ຽວເອົາບົດຮຽນໃນການແລກປ່ຽນ ກັບບັນດາມະຫາວິທະຍາໄລຂອງຕ່າງປະເທດ.
![](https://tholakhong.com/wp-content/uploads/2021/11/fds.jpeg)
ພ້ອມນິີ້ກໍໄດ້ຮ່ວມມືກັບ ຄະນະສະຖາປັດຕະຍະກຳສາດ ມະຫາວິທະຍາໄລສຸພານຸວົງ ແລະພາກວິຊາສະຖາປັດຕະຍະກຳສາດ ມະຫາວິທະຍາໄລຈຳປາສັກ.
ສຳລັບປີນີ້ແມ່ນປີທີ 2 ທີ່ໄດ້ສືບຕໍ່ຮ່ວມມືກັບ 2 ມະຫາວິທະຍາໄລ ໃນການຈັດການແຂ່ງຂັນເຊິ່ງມີນັກສຶກສາຜ່ານການຄັດເລືອກເຂົ້າຮ່ວມແຂ່ງຂັນທັງໝົດ 12 ຄົນຈາກ 3 ມະຫາວິທະຍາໄລ ແລະຈັດຂຶ້ນພາຍໃຕ້ຫົວຂໍ້ການແຂ່ງຂັນ: ກ່ຽວກັບ Contexual Design : Creating Space , Re-interpreting tradition.
![](https://tholakhong.com/wp-content/uploads/2021/11/wcvw.png)
ຜົນການແຂ່ງຂັນປະກົດວ່າ ນາງ ມານາພອນ ອິນທະສອນ ນັກສຶກສາປີທີ 3 ຈາກພາກວິຊາສະຖາປັດຕະຍະກຳສາດ ຄສປ ມະຫາວິທະຍາໄລແຫ່ງຊາດ ສາມາດຍາດລາງວັນຊະນະເລີດ ພ້ອມທັງເປັນຕົວແທນຂອງສຶກສາລາວ ເຂົ້າຮ່ວມການແຂ່ງຂັນການອອກແບບສະຖາປັດຕະຍະກໍາສາດຄັ້ງທີ 10 (The 10th ACARA) ທີ່ຈະຈັດຂຶ້ນທີ່ປະເທດອິນໂດເນເຊຍໃນມໍ່ໆນີ້, ເຊິ່ງຜົນງານການອອກແບບຂອງ ມານາພອນ ແມ່ນມີແນວຄວາມຄິດມາຈາກຮູບແບບວິຖີຊີວິດທີ່ເປັນເອກະລັກຂອງຊາວນາທີ່ມີຊີວິດແບບຮຽບງ່າຍ, ມີແນວທາງການດຳລົງຊີວິດຢ່າງຊັດເຈນ ແລະ ມີວິຖີຊີວິດຕິດພັນກັບກະສິກຳໂດຍສະເພາະແມ່ນການເຮັດນາປູກເຂົ້າ, ເຊິ່ງເປັນການດຳລົງຊີວິດແບບພໍພຽງ, ໃນປັດຈຸບັນນີ້ມັນຖືກທັບທົມໄປດ້ວຍຕຶກອາຄານ ແລະຄົນຍຸກໃໝ່ກໍບໍ່ຄ່ອຍຄຸ້ນເຄີຍແລະບໍ່ເຫັນຄຸນຄ່າກັບວິຖີຊີວິດກະສິກຳ, ສະນັ້ນຈຶ່ງມີແນວຄວາມຄິດຢາກສະແດງຄຸນຄ່າທາງການກະສິກຳ ໂດຍການສ້າງອາຄານພື້ນທີ່ທີ່ຕອບສະໜອງຕໍ່ຊຸມຊົນຊາວນາແລະຕອບສະພາບແວດລ້ອມ (ທົ່ງນາ) ເພື່ອໃຫ້ເປັນພື້ນທີ່ຮຽນຮູ້ຢ້ຽມຊົມວິຖີຊີວິດຂອງຊາວນາ ພ້ອມທັງເປັນພື້ນທີ່ແຫຼ່ງທ່ອງທ່ຽວທາງທຳມະຊາດທີ່ດຶງດູດນັກທ່ອງທ່ຽວແລະປະຊາຊົນໃນປະເທດມາຢ້ຽມຊົມ ແລະ ສຳຜັດພື້ນທີ່ເອກະລັກ ແລະເພື່ອເປັນການພັດທະນາການກະສິກຳການປູກເຂົ້າ ພ້ອມກັບການພັດທະນາແບບຍືນຍົງ “ເພື່ອເປັນການຮັກສາສິ່ງເກົ່າ ພ້ອມກັບການພັດທະນາແບບຍືນຍົງ”